Malaysia, Johor aom suangmanpha zuakna ah damiah lutin, RM130,000 manneiding puakhia

Malaysia, Johor aom suangmanpha zuakna ah damiah lutin, RM130,000 manneiding puakhia

Malaysia, Johor Baru huamsung aom Shopping Mall khatah damiah te’n suangmanpha zuakna “Goldsmith Outlet” khat abuluh laitak uh Video Clip pen Social Media ah ki thehzak hi. Guta damiah tepen mi 4 pha uh a, amai uh akitheilo dingin Mask tawh tuamcip uhhi.

Zanni Saturday nitaklam 7:23pm hunpawl in Johor Baru, Bandar Dato Onn Shopping Mall sungah thupiang ahihi. Damiah te’n suangmanpha zuakna suaisai abuluh laitak mitampi in mukha uh a, Video Clip akizaihkha tepen Social Media ah ki thehzakpah zihziah hi.

Damiah tepen manlang mahmah uh a, hiam tuamtuamzong puading in ki ummawh hi. Damiah mi 2 te’n sekgolpi tawh suangmanpha kikoihna Display Tray te seekkham ziahziah in, Jewellery suangmanpha teng aluakkhia mengmeng uh ahihi. Damiah te khatin thautawh akibang vankhatzong puading in ki ummawh a, tuapa in adangte’n suaisai abuluh laitak in ageipan cinbawl kici hi.

Ahi zongin hih damiah lutna ah thau agingkhia in akilawn khatzong omlo a, mihingzong aliam kuamah omlo hi ci’n Johor Baru Selatan District Police Chief Assistant Commissioner Shahurinain Jais in genkhia hi.

Hih guta damiah te Jewellery Shop sungah alutlaitak in Security asemte aomlohlian laitak ahihi. Security Guard asempa pen dailengbuk “Toilet” ah apaikhiatlian laitak hicitciat a, Security Guard atunlian ciangin damiah te taikhia vingveng uhhi.

Video: Four masked men took just three minutes to storm a goldsmith outlet at a shopping centre here last night and cart off RM130,000 worth of jewellery

Suangmanpha zuakna Jewellery Shop sungahzong vanzuak nasem Salesman pen Counter sungah mi 4 aom uh hi a, ahi zongin damiah te’n tua Salesman te olmawh vetlo in, sekpi tawh Display Counter teng satkham ziahziah in, adeihteng uh luatkhia mengmeng uhhi.

Hih damiah te alut hunsungpen Minute 3 sung bekbek sawt a, tuasung in suangmanpha bekbek akigawm in RM130,000 manding puakhiaziau uh cihi. Hihvai tawh kisai in “Section 395/397 of the Penal Code” thukhun zui in thu kibawl a, Police te’n athu akanciansan laitak cih kiza hi.

More: Malaysia, Nilai aom Suai zuakna ah gutalut, Myanmar hiding ki ummawh

Hih damiah te alutlaitak in Bandar Dato Onn Shopping Mall sungah midang vanlei vanzuak tampi aom zihziah hi a, ahi zongin damiah te’n kuamah zahtak neilo, lau neilo in Minute 3 sungin adeihteng uh abuluh khiaziau uh ahihi. Hih damiah te lutna suaisai pen Poh Kong Jewellery hi a, abeisa in damiah te’n aluhzelzel tezong Poh Kong Jewellery temah tamphadiak hi. Poh Kong te ki nopneh phadiak leh kilawmphial hi. Shopping Mall sungah mitampi muhtang in hihbangin agamtata te’nbel gamdangmite hong nopneh in, damiah hongtaihtaih dingmah uh himawk hi, ki dopsiam ni. Sawltak #zomidaily