Beetroot cindan atomkim

Beetroot cindan atomkim

A kung ni 3 ah khatvei tui pia ding hi. Kiak kho ding, lungno dal ding, bawltawm lungno zaa te bek zangh ding hi. Khallai in ni 75-90 ki kal in ki la thei hi. Phalbi aa ki ciingte ni 100-120 sungin kila thei hi. Acre 1 sungah pum 120000 piang thei hi. A deih khuahun pen a lumna 12 – 19 sung deih hi. A tampen a lumna 35 vallo ding hi. A kungpo nading leitangh lumna 7 deih hi. Adeih leitangh thukna alna ph 6-8 hi ding hi.

Lei vom ding, a lei kitam baih ding, tui a hup sehnel hawllei deih hi. A tang a ki ciing suakpah a hihmanin ciin nading mun limtak puah ding kisam hi. Leitangh pen hoihtak kal in nelsak ding hi. Nin omsak lo dingaa lei vui dikdek leh hoih hi. Hoihtak a lei lem sitset ding hi.

Beetroot pen ut hunhun in kiciing thei hi. Leisungah centimiter 1- 3 thuksak ding hi. Ciing baih leng kila baih hi. Mehteh mehgah dangte mahbangin tui a kawt ding thupi hi. Hamkhuh in leikawt dat a ngah nadingin bawl ding thupi hi. A neulai in a lakkhawh ding kisam hi. Alak kho kei leng nitang, khuavak, tui te, an te kiakte in neksak ahihman in khanghak hi.

Kiak ki khawhsak kei leh a piang dingzah piangzolo hi. A tamzaw in ni 75-90 sungin ki la hi. Khuahun, leihoihna, natna hang leh a nam zui in a piang kilamdang mahmah hi. A tamzaw in hector 1 ah ton 15 pan 25 kikal piang thei hi.

Beetroot pen a tunglam pan in tui i buaksangin a lei a nel dingin buak leng hoihzaw hi.

Beetroot nekna leh cidamna

Beetroot pen Hindi te’n Chukandar ci hi. Spain te’n Remolachas ci hi. Sen te in Hong cai ci uh hi. Beetroot pen meh ding mawkmawk bek hilo in cidamna dingin tuma kumtampi laipek in kizangh khin hi.

1. Sikhang kiamsak hi. Sikhang kiam nading zatang tang 4 neksangin beetroot 250ml ne leng hong cidamsak zaw hi kici hi.

2. Lungtang natna dal hi. Cancer a pianloh nadingin dal hi.

3. Sin a’dingin hoih mahmah hi. Calcium, Betaine, Vitamim B1, Iron leh antioxidants tampi kihel hi.

4. Guh le tang thakhauhsak hi. Beetroot a nezel mikhat pen a ne ngeilo mikhat sangin tawlhak zaw hi.

5. Sisungah cikhum dat a tamluatloh nadingin sem hi. Khuak nasepna thahatsak hi.

6. Folic acid tampi kihel ahihman in nupi naupaii te in nekhuai mahmah hi.

7. Sex thahat nadingin zongh hoih hi. Sex hormones tampi piangsak hi. Sex thahatlo te thakhauhsak thei hi. Rome Emperor hunlaipek in kizangh khin hi ci in ki ngen hi.

8. Mit khua muhna thahatsak hi. Gihluatna, thauluatna zongh kiamsak hi.

Beetroot pen a pumneute nek huai zaw hi. Liamna a nei te leh a hingmel sitsetlo te nek ding hoih lua lo hi. Leisung pan in i tawhkhiat zawh ni 2 sung nekpah ding hoih hi. Refrigirator sungah ni 7-10 sung kikoih thei hi. Nikhat in 200-250ml nek huai hi. Siamsin Library