Zomi Khawmpi Zinmangte khualzinna ding geelna

Zomi Khawmpi Zinmangte khualzinna ding geelna

Dear … muan leh suan, zahtak; Zomi Innkuan kipawlna Makaite, Tangmite, leh Laizom U leh Nau, Lawm leh Gualte aw,

Zomi Khawmpi USA picing takin bawlzo ihhih manin akua mahpeuh angtang ni ci in ka ngaihsun hi. Khawmpi thu leh ih Maban tawh kisai thu kong kohma in, ih Khawmpi Zinmangte tawh kisai thu hong kopak nuam ingh.

Tg. Bia Mung

Khawmpi Zinmang khat ahi, Zomi Siamsin Makaipi Tg. Bia Mung pen a sangkahna zom nuam ahih manin, July 19, 2014 (Saturday) ni in Washington DC pan Yangon zuankikta ding hi. Lawm Bia Mung cidam in a innlum tungkik a, a maban a zopkik theihna dingin thungetna tawh panpih ni. Ama ipsung pan amah leh amah kisik in tuipi gal khat ah ei tawh hun hong zangkhawm Makaipi Bia Mung leh Zomi Siamsin kipawlna tung ah ih lungdamna lian mahmah hi. Lawm Bia Mung tung lungdam ako nuam, kam avaikhak nuam, thupha apuak nuam ih omleh a zin tunna, a u pa Home Phone: 717-334-2785, ahihkei leh Cell Phone: 717-357-9537 tungtawn in kihopih thei hi. Sunsiah a tunzo ih omleh lungdam huai mahmah ding hi. Deihsakna a nei peuhmah in manlang in sunsiah tunna khaksawm ni ei.

Pu Gin Kam Lian

Zinmangpi Pu Gin Kam Lian in US leitang ka sikbuang in Zomi-te ten’na State tuamtuam, adiak in Zomi Innkuan kipawlna omna munte vapha nuam ingh, Zomi Movement tungtang tuipi galkaai Zomi-te mapanna a thupina pulak in lungdam vako ning, tuaciang, mailam ih Minam Mabante kuppih nuam ing ci ahih manin, tu ni a kipan in Tulsa khuapi panin hong zinkhiata hi. Ama zinna peuh ah a kha kawikawi dingin Tulsa khuapi a om Pa Kim (Lamzang) hong kipiakhia ahih manin, mawtaw tawh hong pha kawikawi thei ding suak hi.

Pu Kam Lian leh a zi Pi Cing zinna ding vai pen ZIUSA kipawlna in mawhpuak la in vaihawmpih zawh ahihpahloh hangin, a munmun a om Zomi Innkuan kipawlna Makaite in a lem bangbang in ih panpih ding, zin ih do ding, hun ih geelpihh ding hong hanthawn ingh. Pu Kam Lian zinna ding geelna ahaam in anuai a dan hiphot hi.

July 19, 20 Weekend
Fort Worth, Dallas
Contact: Pa Tul Mung leh Tg. Lian Tuang

July 26, 27 Weekend
San Antonio, Houston, Austin
Contact: Pa Sian Ngen Kam

August 2, 3 Weekend (Hih zong kikheel thei hi)
Nashville, Bowling Green
Contact: Pa Tual Khan Suan, Pa Thang Khawm Pau

August 9, 10 Weekend pen Atlanta pha ding maw, ahihkei leh Florida zuan ding cih thu kikipsak zo nailo hi. Atlanta khuapi ah pen a tanaute ahi Nu Ningmang Taithul tawh kizom thei ding a, Miami lam ah Rev. Vung En Thang tawh kizom thei ding hi.

Atlanta khuapi leh Florida State sung teng azinkhit ciang, Chicago khuapi, Michigan State sung teng zin dingin geelna om hi. August kha beilam in New York khuapi ah UN Conference khat akah dingin geelna kinei a, tua sung tengin Washington DC Area teng ah zin kawikawi nuam hi. Pu Kam Lian-te nupa in September kha beima in Kawl gam lam zuankik nuam hi.

Pu Kam Lian tawh a kithuza nuamte in ama Cell Phone: 918-813-2591, ahihkei leh, amah tawh hong kithuah, Pa Kim’ Cell Phone: 918-406-3406 tungtawn in kihopih thei ding hi.

Pu Kam Lian pen kum (25) val sung gam leh minam a’ding a kipumpiak, Minam Makaipi khat ahih manin, ahong tuntunna ah minam itna tawh muak in limtak in pahtawi sawm ni. Ama ipsung pan kisik in itna tawh hong kuankhia uh ahih manin, tuipi gal khat a thupa sang laizom a mipihte inzong itna ih lakciat ding hi.

Sianu Cingsan

Khawmpi Zinmang khatmah ahi, Sianu Cingsan zong, Zomi-te omna mun khempeuh ah Pasian phatna late, gam leh minam itna late sa kawikawi in tha hong pia dingin hong zinkhia khinta hi. Sianu Cingsan ahong zinnapeuh ah, ama siamnate hamphatpih, lungdampihbek hilo in, ama hong itna tawh amah leh amah kisik a hong kuankhiatna phawin, itna mahtawh zindo a lungdamna ih lah theih ding hanciam ni.

Sianu Cingsan pen, ZBCA Khawmpi siim a hong pai Nashville & Louisville khuapi a thu-um mite thusianna tawh Tulsa panin July 14 ni in hong ding khiakhin hi. Ama khual zinna ding geelna pen ahaampi in anuai a dan hiding hi.

July 19, 20 Weekend
Nashville, Bowling Green, Louisville

July 26, 27 Weekend
Atlanta, Charlotte

August 2014
Florida State sung teng

September 2014
Chicago leh Michigan State sung teng

October 2014
Tulsa, OKC, Kansas City leh Texas State sung teng

November 2014
Washington DC Area leh New York State sung teng

2014 December kha kaal masa sungin Kawl gam lam zuankik nuam hi. Sianu Cingsan tawh thukiza nuamte in ama Cell Phone: 918-982-8487 tawh kihopih thei hi. A khual zinna ding vai khempeuh, Sianu Suihlun (Cell 918-206-0498) in a vaansak hizaw ahih manin, Sianu Suihlun tungtawn inzong kikan thei ding hi. Khawmpi Zinmangte, tuipi galkaai Zomi-te’n itna tawh thupha pia in, pahtawi ni ci in hong hanthawn ingh ei. Lungdam. GSKhup – Tulsa, OK (July 17, 2014)