Nupi nawipialai khat gul in tukha in anawi anekha atangek tawh anih un sihlawh

Nupi nawipialai khat gul in tukha in anawi anekha atangek tawh anih un sihlawh

India gamsung ah nupikhat alup laitak in gul in tukha hi. Tuabangin gul in atukkhit ciangin atangek pen nawitui piakha sawnsawn hi. A nawitui sungahzong gul ii agu “poisoned milk” naki helta ahih manin, anu leh atangek anih in sihlawh uh cih AFP pan kiza hi.

India, Uttar Pradesh State sungah thupiang hi a, tua nupinu pen kum 35 aphakhin khat ahihi. A ihmut laitak in gul in tua nupinu tukha in, ahi zongin aman theikhalo hi. Akhanlawh ciangin gul in atuklam phawkkhalo ahih manin, atangek pen nawitui apiakha ahihi.

Tua a tangek pen kum 3 aphapan numeino khat ahihi. Tuabangin gul in atukna ah gu lutkha in, anuta un cinatlawh ahih manin, Thursday ni in zato ah puakding in kipaipih hi. Ahi zongin zato tungmanlo in lamkal ah anu leh atangek anih un sihi ci’n Police Inspector Vijay Singh in AFP te tungah genkhia hi.

Tua nupinu atukha gulpen nupinu alupna ahilo, adang inndei sungkhat ah kimu in, ahi zongin kimanzolo in kitaisuah sawnsawn hi.

Tua nupinu leh atangek tepen Postmortem kibawlding ci a, ahi zongin asihna ahangpen tuahsia in asi “Accidental Death” ci’n Police te’n ciamtehphot uhhi.

More: Gul it mahmahkhat agulkhawisa in viallum

India gamsung ah gul bekbek nam 300 Species bang omding kici a, tualak ah nam 60 bangpen gu akhauh mahmah in akiciamteh ahihi. Tua gu akhauh phadiak te lakah Indian Cobra, Krait, Russell’s Viper, Saw-scaled Viper cih gulnam tepen lauhuai mahmah kici hi.

“American Society of Tropical Medicine and Hygiene” kici kipawlna te’n 2011 kumin Study hoihtak akankhiatna ah leitungbup ah kumsim in gul ii atukkhak mi 100,000 lakah 46,000 pen India gamsung ah hiden hi ci’n pulakkhia uhhi. Sawltak #zomidaily