Z.A.M Kap Mung @ Tg. Enpi

Z.A.M Kap Mung @ Tg. Enpi

2006 Kum June kha-in Malaysia Kuala Lumpur Khuapi laaizang Kota Raya –Cinpi & Khampi te’ Zosai pan-in ZAM kiphut-a, sawtlo-in UN Office-tawh kinaái, inndei zaipi, bitna amuanhuai inn-khat saápding kizong-in Jalan Choo Cheng Khay kisaap-in “Zomi Innpi” min kivawhhi.

Sumlehpaai omlopi-a akipan kahih man-uh’n innsaáp masa leh bond-pen U Zam Dal leh Pa Kim te-in hongsik-uh himahleh khacin sim-in RM tuul vaalta piakzop tohtohding ahihman-in naákpi-in haksatna kiphu-kha toto-hi (tu-a makaaite’ mapan zia-tawh naákpi tak-in kilamdang-hi).

Zomi Innpi-ah Kap Mung, Munno leh Pakelu-tawh koteng giak-in, neéklehdawn kitatsatlo ciang-in ka-om uhhi. Kap Mung leh Munno te-in UNHCR pan-in Social Support angah nading ka’ haanciampih Pasian-in thupha hongpia-in anihtuak-in kha-khat Rm520 tuak-khawng ngahden uhhi.

Zomi Innpi Innsaáp piakding hun hongtun sim-in ataangpi-in “Pawlpi Sum Kicinglo” hidenkeei-hi, banghanghiam cihleh member fee RM10 bek hi-in, kumsum RM50 akicih teei hang-in hongkipia kimlo, member-lah 600-700 kiim khawngbek hi-a, 2007 February-in 2700 pha-panhi.

Innsaáp piakding sim-in Kap Mung leh Munno’ kiang pan-in leitawi kala denhi. U bangmah-in hongnei-uh ahihman-in phunlo puamlo-in hongpia den uh-a, Zomi Innpi akizom toto thei hongsuak-hi. Anneek mahmah-zong tute’ kiang-ah leitawi kalaák hang-in bei pahpah ahihman-in amau’ a-mah ka-neekpih den ahihi.

ZAM-tawh kisa lungdam kohding mi thupi kiteel hileh Tg. Kap Mung leh Nu Munno adawk masapente’ lak-ah kihel uhhi. Anihtuak-uh’n Nau bangmah-in bawl-in, ziingvaái nitaákvaái ka-hawm khoppih hi uh-a, hong awilohna om lehzong amau zah-in hong paupih-ngam Malay-ah kuamah omlo-hi.

Tg. Kap Mung-pen New Zealand-ah valeeng-in tualaai pan-in nasep hihtheih sunsun-tawh innlam ate en-in panpih-hi. Ahizong-in tuma asawtlo-in lungleen teng-tawh Laitui Khua-ah ciah-a, tua-a kipan New Zealand-ah pai-kiik nawnlo-in anunungpen hu asan ciangdong Laitui Khua-ah omhi.

Tu-in ZAM’ Patron Thupi mahmah khat ahi Tg. Kap Mung-in Daihna Sung-ah Tawlngakna hongngah ahihman-in ZAM Founder khat ka’ hihna leh ZAM’s First Secretary ka’ hihna-tawh lungzuansialna kahong pulaak-hi. Lungzuansial, Tg. Zokhai