Python gulpi in ganhing khat singdawn ah anek laitak kimu

Python gulpi in ganhing khat singdawn ah anek laitak kimu

Gulpi in ganhing anek laitak mukhaleng atamzaw laugawp in ki linglawng gawpding hi. Ahi zongin gul a it “Snake Lover” khat ahi Michelle Hunjak ading inbel gulpi in ganhing anek laitak tuakkha ahih manin, Jackpot angahkha bangin kituak in kampha kisa mahmah hi.

Ms. Michelle Hunjak pen nung Sunday ni in asanggamnu tawh Australia gamsung aom Byron Bay’s Lighthouse panin aciahkhiat laitak lamkal ah Python thampi khatin Possum akici ganhing khat nane in singdawn ah kikhai lenglang mukha uhhi.

Hihte unaupen numei ahih uhhang in lauhetlo uh a, Michelle Hunjak bangin gul ka it a, hihbangin gulin aneklian laitak kamuhkhak nasia kasa mahmah ci’n kipak in genzawlai hi. Gul in hihbangdan anetheiding in ka ngaihsun kha ngeikei ci’n 9news.com.au te kiangah genkhia hi.

Hihte unaupen Sydney pan hi uh a, gulin ganhing anekpen lauhetlo in Minute 15 sungbang enkawm, Video zaihkawm in adenciang midangtezong hongki kaikhawm in ki en ngeingai hi.

Hih gul pen Carpet Python akicite hiding in ki ummawh a, tua gulte pen 1.4 Meter bang sauthei hi.

Australian Reptile Park ah Head Reptile Keeper asem ahi Dan Rumsey kicipa ii genna ah Python gulpi te’n amau ii alu sangin azah sagihbang agolzaw pen nethei uh cihi.

More: Malaysia: Dailenbuk sungah gulpi khat nakivial venvan

Hih Python gulte’n Possum akici Australia gamsung aom ganhing namkhat te nenuam phadiak uh cihi. Python gulte’n ganhing golpipi nenuamzaw uhhi, banghanghiam cihleh ganhing golpi anek uhciangin agil uh kialkikpak nawnlo ahih manin, an nekpahpah kullo kici hi. ZD Sawltak #zomidaily