China in Pakistan gumkhia kik leuleu

China in Pakistan gumkhia kik leuleu

Feb. 9, 2017: UN makaihna tawh UN Security Council (UNSC) ah Pakistan pansan Jaish-e-Mohammad (JeM) terrorist kipawlna phuankhia leh India suamna a kigolh mun mahmah Masood Azhar pen “global terrorist” ci-a ciamteh ding hi ci-a sawmna (proposal) pen China in a beisa kha khat val in a dal bangin tu-in zong UN Security Permanent member veto a neih zangin dal leuleu hi. Masood Azhar pen US, UK leh France in “global terrorist” in ciamteh ding hi ci-in UNSC a sawmna (proposal) a neih ahi hi.

Obama’ administration in zong Azhar pen “global terrorist” in ciamteh dingin na sawm ngei a, China in na dal hi. Pakistan in bel Massod Azhar pen a inn ah kikhumcip (house arrest) hi ci hi. Donald Trump’ administration in bel terrorist ci-a kiciamteh limlim tungah US khauh takin kigamta ding hi ci hi.

UNSC in al-Qaeda, Taliban & IS Sanctions Committees vai-ah lung kituak takin pan’khawm ding vai kikupna nei-in vote khiatna nei uh a, tua-ah zong vote khat in dal a, a vote pen a sim thamin a kikhia ahih manin a kitel loh hangin China’ dal hi dingin ki-ummawh hi. Nung kumin UNSC ah hih bangin vote a kiseel sim (hidden veto) thu tawh kisai India in a deih lohna thu na pulak napi China in hih banga vote khiat zomna dingin na dal a, kha thum a kiseel sim in vote khiatna kinei to lai-in tua khit in kidal sawm ta a, sawmna/geelna (proposal) thak a kibawl ciangin kibeisak ding hi.

JeM pen UN in terrorist organisation in a ciamteh khit hi napi-in China in bang hangin JeM phuankhiapa leh a makaipipa Azhar pen terrorist kipawlna makai hi ci-in ciamteh nuam loh hiam cih gen nuam lo hi. Azhar pen 1999 in Indiate’ IC-814 vanleng kipikawi (hijacked) na ah a makaipi leh a geelpa hi a, tua vanleng kipikawi sunga tuangte Afghanistan ah kibawhsak a, a kikhahkhiatna dingin India thonginn a thongkia Azhar leh JeM terrorist-te a kikhahkhiatna ding JeM ten ngen uh hi.

India kumpi pen BJP party makaih NDA coalition ten kumpi a let lai uh hi a, NDA ulian ten Azhar leh JeM terrorist-te vanleng ah escort (tuanpih in cing) in vanleng kipimang leh a tuangte khempeuhte kikhekpih in kikhahkhia uh hi. Tua khit nungin nung kum January 2-5, 2016 in India galkapte headquarter Pathankot kisuam in galkap 7 kithat a, a suamte 4-6 kikal kithat in nautang khatin sih lawh hi. Hih Pathankot suamna pen Azhar geelna hi kici hi.

Indian MEA spokesperson Vikas Swarup in Pathankot suamna pen Azhar geelna ahih manin a gam belhna Pakistan zong kigolh a, Pakistan zong terrorist huhna pia (terrorist sponsored state) ci-in ciamteh ding hi ci-in UN ah pulak a, Pakistan leh China in dal in Pathankot suamna vai-ah Pakistan min gen khak loh ding hi ci uh hi. China in Pakistan tungah Azhar huhna pia nawn kei un a cih hangin Azhar pen Pakistan a a thuneihna leh a vangliatna hat mahmah ahih manin China in Pakistan thuzawh zo lo hi.

India in Trump administration policy in UN ah Trump in Obama in ‘War on Terror’ a cih a zop toh a, Trump in a ciamsa bangin terrorist beisakna ding ‘Eradication of Terror’ kici hong sep khiatna dingin US tungah lametna lianpi nei a, tua dingin US Secretary of State Rex Tillerson in China tungah nawhna nakpi takin a neihna ding deih hi. Source: The Hindu/ Thang Khan Lian