US, Illinois State ah Kawlgam mikhat zukhamsul in midang innsung ah pumlutsawm

US, Illinois State ah Kawlgam mikhat zukhamsul in midang innsung ah pumlutsawm

USA, Illinois State sung aom pasal khat Wednesday ni zingsanglam in midang innsung khatah mawklutsawm ahih manin palik te’n man uh cih Indy Channel pan kiza hi. Tua pasalpa pen amin Tluang Kip Thang kici ahih manin, Myanmar, Chin State panin US gamsung apeem peemta khat hikha ngelngel dinghi.

Tluang Kip Thang pen kum 36 aphakhin khat hi a, atheih ngeiloh innsung khatah alutsawm laitak in kum 12 aphapan numeino khatin mukha ahih manin, tuapan in thunei te kizasak in akiman ahihi.

Hihvai Report akibawlna ah Wednesday ni zingsanglam 5:45am hunpawl in 200 Block of Walnut Street aom innkhat buluhsawm “Burglary” ahih manin, Southport Police te kisampah cihi.

Southport Police te atun ciangin Tluang Kip Thang pen manpah uh a, zu zong khammahmah hileh kilawm cihi.

Innneinu Melissa Tanner ii agenkhiatna ah Tluang Kip Thang pen innmai tawlet “window’ panin innsung lutsawm a, tualaitak in atanu kum 12 aphapan khatin mumasa cihi. Innsung ah pumlut sawmgawp ahih manin, atanu zong lau in awnggawp hi.

Tuaciang in innneinu in Tluang Kip Thang kiangah banghih nahiam ci’n adotleh, “theilo, ka lawmte hongpaiding” ci’n dawngkik pongmawk cihi.

Southport Police te sampah uh a, atun ciangin kimansuak pahhi. Inn buluhna, mihuangsung ah guklutna, zukham ankham in vakvaina “Burglary, Criminal Trespassing, Public Intoxication” cihbang thu 3 tawh akiman ahihi.

Southport Police Chief Tom Vaughn ii genkhiatna ah hih Tluang Kip Thang ii abeisa gamtatna Record teng a etkik uhciang in midang te huangsung ah mawklutna “Trespassing” tawh tamveipi kiman ngei cimawk hi. Tuabang in midangte huangsung ah Trespassing tawh akimatna ahang khempeuh pen zukham luatman cisawnsawn hi.

Police Chief ii genna ah hih Tluang Kip Thang in tua numei kum 12 pen amitsuan hilozaw khading a, zukham ahih manin alup nading azong hizaw khading cihi.

More: Johor Baru leh Kuala Lumpur kikal ah Bus kibung, mi 14 si, 16 liam, Myanmar 2 kihel

Palik bupa ii upmawhdan ahihleh phadawmlai hi. Numeino kumcingnailo khat buansawm cihkhawngtawh thu kibawl mawkleh zumhuai bekthamlo, athuakding zong baihlo khading hi. Kawlgam, Zogam khawngah omlaihun bangdan in zukhamkhit nungin khuasung phengvak kawikawi cihdanbel gamdang ah zat huai hetlo hi. ZD Sawltak #zomidaily