Philippine President in mi 3000 athahlupkhit banah thahding tampi omlai ci

Philippine President in mi 3000 athahlupkhit banah thahding tampi omlai ci

Philippine President Rodrigo Duterte in agamsung ah guihtheih khamtheihzang te avek in ki thatkhinzo nailo ahih manin, kha 6 sung hun hongpiato lai un ci’n genkhia cih AFP News pan kizasawn hi.

Philippine President Rodrigo Duterte in agamsung ah Election kiteelna abawl laitak in President ka ngahleh Philippine gamsung ah guihtheih khamtheih zangteng khempeuh kha 6 sungin avekin siansuahding, thatlum mangding hi ing ci’n kamciam pia ngei hi.

May khasung Election panin Rodrigo Duterte in Philippine President dingin hong teelcing takpimawk a, President panmun a ngahkhit akipan agamsung ah guihtheih khamtheih zangteng hong siansuah takpipah ziahziah hi.

Tukum May khapan in tunidong Philippine gamsung ah guihtheih khamtheih zatvaitawh aki nahvawh aki thatlum bekbekpen mi 3000 valkhinta ciliang hi. Tua 3000 athahluppen pha sazonailo, thahlupding tampi omlai ahih manin, ahun kha 6 sung hong piatolai un aci himawk hi.

President Rodrigo Duterte pen um 71 phakhinta a, agamtatzia tepen gammahmah lel hi. President kasuahpa in hizah in Philippine gamsungah guihtheih khamtheihzang ahuaisialua liangding in ka ngaihsun khakei ci’n Sunday ni in aomna Davao City pan Reporters te kiangah genkhia hi.

President Rodrigo Duterte in hihbang in gamsungmi zatui zangte athahlup sakgawp pen United States, European Union Parliament leh United Nations te’n mawhsak mahmah uhhi.

Ahi zongin President Rodrigo Duterte in tuate mawhsakna te thudon hetlo sawnsawn a, US President Barack Obama bangpen “son of a w***” ci’n kogiap lel hi. Tuaban ah UN Secretary-General Ban Ki-moon zong “fool” cihsanlel hi.

Rodrigo Duterte in Philippine President ngahtheih nadingin Election Campaign abawl hunlai in President angahleh gamsung siansuahding a, mi 100,000 bang thah akulleh ki thatlumding cihi. Tua aki thatlumte ii aluanghawm pen Manila Bay tuipisung ah kipaiding a, ngahsa te lungdam mahmah in thaulawh kingkengding uh cimawk hi.

May khapan President asepsung in mi luang 3000 valin sihlawhkhin himahleh thahlupding tampi omlai ci’n kha 6 ahun laktohsawmlai ahih mawkleh mihing luang bangzah in thahlup hong thuaktolai mawktam maw?….. ZD Sawltak #zomidaily