Johor Baru leh Kuala Lumpur kikal ah Bus kibung, mi 14 si, 16 liam, Myanmar 2 kihel

Johor Baru leh Kuala Lumpur kikal ah Bus kibung, mi 14 si, 16 liam, Myanmar 2 kihel

Malaysia, Johor Baru panin Kuala Lumpur khuasunglam zuanin atai Express Bus khat tuzing Saturday (Dec 24) in kibung ahih manin, mi 14 in sihlawh a, adangzong mi 16 bang liam cih Straits Times pan kiza hi. Bus tuahsiatna munpen Johor sung aom Muar khua gei ah ahihi.

North – South Expressway tungah atailaitak in Muar khuagei ah zingsang 4am hunpawl in atuahsia hi a, Passenger asi te leh aliam te Muar khuasung aom Sultanah Fatimah Specialist Hospital ah kipuak cihi.

Muar khua pan Police Chief khat ii genna ah asi tepen pasal 6, numei 8 hi a, numeino naupang khatzong kihel cihi.

Aliam te lakpan mi 7 pen Malaysian te hi a, 6 pen Singaporean te hi in, Myanmar 2 leh agammi akitheilo khatzong kihel cihi.

Zingsang 4am hunin Johor Fire and Rescue Department te kiangah Distress Call aki zaksakkhit ciangin aphual ah Firemen mi 25 in delhpah uh cihi.

Department’s Deputy Director Mohd Yusof Mohd Gunnos ii genna ah hih tuahsiatna a encian uhciang in lampi siatna omlo a, khuahunzong sialo, guahzulo cihi. Tua ahih manin Muar Police te’n athu kancianlaiding uh cihi.

More: Berlin khuapi a Christma Market Lorry zanga migawilum sakpa kithatta

Aliam lakah akihel Myanmar 2 acihte kuate ahidiam? Zomi tezong Johor Baru lamah nasem mitampi ki om ahih manin, lunghimawh simtham hi. ZD Sawltak #zomidaily