ZIUSA pan Lungdamna: Zinmangte’n lawhcing takin innlam zuanta ding
Dear … muan leh suan, zahtak, it leh ngaih;
ZIUSA kipawlna sung a mapanpih Lawm leh Gualte,
Zomi laizom u leh nau, nu leh pate aw,
Akua mahpeuh cidam in vai a ding zo dingin hong lam-en ingh.
Kei leh ka mapanpih ZIUSA EC panmunlen tengzong cidam in ma ka pang thei uhhi.
ZIUSA maban zawhna thu khat hong kopak nuam ingh.
July kha sung a ih bawl, Zomi Khawmpi USA 2014 pawipi ah Zinmang in ahong pangdingin ih cial, Pu Gin Kam Lian leh azi Pi Ciin Khawm Cing, leh Sianu Cingsan (Man Suan Cing)-te, Khawmpi khitciang in US gam sung a om Zomi-te hong pha kawikawi in, kha nga val ahong taamkhit uh ciangin, inn lam zuan dingin dingkhiata uhhi. Amaute tawh ih kikholhna pen nuam ih sak mahmah hangin, a maban un nangak gige ahih manin, mai anawt uh ahi hi. Lam khat panin, ZIUSA kipawlna vaihawmna tawh US gam sung a om Zomi-te pangkhawm in Khawmpi lawhcing takin ih bawlkhit ciang, ih Zinmangte zong cidam lungnuam takin innlam azuankik zo uh ahih manin, Maban Lawhcinna hi ci in lungdam thu hong pulak ingh.
Sianu Cingsan pen hih lai ka gelh laitak, Dec. 9, 2014 ni in, Los Angeles pan Singapore tawnin Yangon azuan Vanleng tung ah atuang ding hita hi. Pu Kamlian-te nupa pen Dec. 11, 2014 nitak in, San Francisco pan Taipei tawnin Yangon zuan ding uhhi. Zingmang dang khat ahi, Tg. Biamung pen Khawmpi amanzawh asawtlo in sangkahna zom dingin ahong ciahsanpah ahi hi.
Zomi Khawmpi USA pawipi hong siim in, Zinmangpi in ahong pang amau teng tung ah, ZIUSA kipawlna leh US gam sung a om Zomi-te tang’in, khat vei, lungdamna thu ih kokik hi. Maban tampi nusia in, hun leh vai tampi hong pia a, tha leh ngal, nei leh lam tampi ahong paikhia, thu leh la tawh, lasakna tawh US gam a om Zomi-te hong veh, Pu Kamlian, Pi Cingno, Sianu Cingsan, Tg. Biamung-te tung ah ih lungdamna lian mahmah a, hici bang a hong zinna uh a gah limci mahmah hi cih kimu sinsen thei hi. Amaute tawh Anungta Pasian hong omkhawm henla, a zinna a ciahna panin nisim maban a kalsuannate ah cidam lungnuam takin mainawt in, lawhcinna angahna ding un thu ih ngetsak hi. Anungta Pasian in thupha hong piaksak tahen.
Zinmangte inzong, ZIUSA kipawlna Makaite, Tangmite a kipan, a munmun a om Zomi Innkuan kipawlna Makaite, Pawlmite khempeuh tung ah lungdamna hong ko uh ahih manin, vaikhakna bangin hih lai tawh hong gensawn hi ingh.
Tuipi galkai Zomi-te sung pan US gam sung a om Zomi-te pen thupha asangdiak ahihna tawh kizui in, gam leh minam itna tawh piakkhiatna zong kihat mahmah hi cih thu, tutung a Zinmangte khualzinna sung panin ih mu thei hi. Pu Kamlian-te leh Sianu Cingsan pen ZIUSA kipawlna leh US gam sung a om Zomi-te’n sunsiah limci mahmah kitun zotuak hi cih thu zong hong gen uh a, nakpi takin angtan huai hi. Zomi-te sunsiah tunna tawh vaitun nuamtuam mahmah ding cih thu theihpih ihhih manin ih lung a kim mahmah hi.
Mailam ah hici bangmah in pangkhawm in, ih gam leh lei vai, ih minam vaite ah ma pangkhawm zelni ci in, lungdamna thu hong pulak ingh.
Lungdam.
GSKhup
President
Tulsa, OK
Dec. 9, 2014
Comment piaknop aomleh...