Ei leh ei ki theihna pilna (Reflection from Psalm 39)

Ei leh ei ki theihna pilna (Reflection from Psalm 39)

Mihing te pen ei leh ei kua ka hi hiam cih ki theih nading ahaksa penpen ahihi. Late 39 hilcianna(study) ka neih ciangin, Kumpipa David nuntakna pan tha ka lakna hi banghi.

David in kumpi hong sep sungin, atapa Absolom leh a mi muan a thu dotpi ahi Ahitophel in, langpang ahih manin, a kumpi tokhom om na Jerusalem khuapi nusia in mun dang ah bu hi. Tua laitak in alungsim sung ah avanpuak agihdan ding leh ahaksat dan ding pen ama bang lian in atuahkhak ngeinai lo ei te in i gen hangin, i kam leh I lai in gen siam zo lo ding a hihi.

Aneu 1 leh 2 na sung ah, David in,akampan in hih migilo ta ding thuh kik na pausia a pau khak loh nading ka kam ka keek kei ding hi a cih bek tham loh in, kam hoih kampha te na ngawn ka pusuak sak kei ding hi aci hi. Hih thu pen mihing te in a ki zo hetlo mun khat ahihi. I lungsim sung a i thuaklah thu te gen khia kei le hangh I ci ana zo ding zah in I om thei mikmeek hi. Banghang hiam cih leh i vangik in, i sung ah adim phetphat hi. Mi pawlkhat bang hi le hang, “ Ka sung a piang ka ta aw, nang lel lel hong kih ta kei lua ingh, nu leh pa thu manglo te Pasian in thupha hong pia lo ding ahi” i ci nuam pha mahmah ding hi. Nu leh pa te in I ta te it mahmah hang i cih hangin, hong langpang le uh, i hamsiat ngamlah kei ding hi. David in tua khempeuh a na ki dawm mahmah ahihi.

Tua bang in daitak in a om ciangin, alungtang sungah thuaklah mahmah a hihna a maban ah agen hi. Tua haksatna,hehna, thangpaihnate a sung ah meikuangbangin om hi. Alung ngaihngaih haksatna gik semsem a hih manin, apulak khiatna ding azonzon ciangin, a Topa a Pasian tung ah pulak khiat ding hong phawk kha lian hi. Tua tak ciangin, Pasian kiangpan thukhat hong ngah hi. Tua in, anuntakna bangzah in a tomna, nite pen simin nuntak huai cih thute a tel nadingin thu na ngen ngeungau hi.

A neu 5: Pasian hong kop nuntakna pen Pasian mai ah husan khat zah in tom ahihna na telsan hi. Hih bang haksatna te tuak kei leh leitung ah Isarael te kumpi ding in Pasian in ana koih pen kipah huai, angtan huai leh ki phatsak huai thu khat ahihi. Ei leh ei aman in ki telsiangna taktak I neih loh ciangin, leitung minthanna te pilna siamna, hauhna mel hoihna te kidemna te nung I zui kha thei hi.

Tuate in eite hong hu,honghuh,hongkem zolo ding ahihlam ki phawkkha ngeilo hi. Tua ahih man in Pasian hong it na in, eite haksatna, dongtuahna(afflictions) te hong pia zela, dawi mangpa hong nawgkai sak na bekbek in I ngaihsut ciangin, hepkhiat ding bekbek I ngaih sut manin,”Nangma deih bang maw,Topa “ I ci zo kei a, I kam te I cip zo kei hi. Pasian tungah zong ki ko ki pulakna, ki niam khiatna kam te zong I pau zo kei hi cih muh thakna ka nei hi. Late 119:67 ah, haksatna ka tuahma in keimah in ka lam pial a, tun ahih leh na thu ka mang ta hi” aci hi. Late 119:92 ah” na thu leh na kammal te in ka lunggulh pen te hi kei zenzen leh ka haksatna sungah ka ki sia khin ding hi” aci leu leu hi.Late119:72 ah” hih bangin haksatna te ka tuah pen kei a ding in manpha mahmah hi. Tua hi leh kei mah in, na thukip te kasin kha thei bek ding hi” aci hi.

David in, atapa leh hih midang te langpan na te atuah ciangin, Pasian in akamciam a pel lohna, ahuutna, a kepna, amah amuanhuaina a thuciam te kipin akhona cih te a hong mu khia a, athupi pen ah, anuntakna in Pasian lo tawh bangmah ahih loh lelna hong ki phawk kha ahihi. Late 90:12 ah “Ka nileh ka hun te a hibang ding in, hong sim/hong tuat sak theihna pilna hong pia in” a ci na hihi. Kei kua ka hi hiam cih aki tel te in, ki niam khiat tawntung uh hi.Haksatna in pilna hongpia a tua bangmite thukhual in, thungaihsun uh ahih man in, pau phengpheng zanglo uh hi.

Lai Siangtho in, zingciang hun ding hong kamciam lo a, tuni hun ding bek hongkamciam ahihi.Cihnopna in, mailam a ding Pasian kamciam omlo a ci ka hi kei a, I nuntakna pen zingciang I hing lai ding cih thu I gen theihloh dingin a hong koih cih thu ahihi. Tuni in gupna ni hi a ci tawntung hi. Tu hun lian in, I nuntak zia pen a si vat thei, anavat thei, I ngaihsut loh thusia lasia zong ki tuakkha thei a, ki si ki mai mang thei thu a hih na thu te, pilna laibu I cih “Wisdom Literature” Thu hilhsia, Paunak, Job, Solomon lai khak te in ei te thu hong hilh tawntugng ahih man in, I simtangtang ding athupitna ka phawk thak hi.

Thupha I ngah ciangin, a ki khil in hong pai daudau mah bang in, haksatna i tuah ciangin zong tua bang mah ahihi. 2Sammual 16:5-11, David in ata pa leh Ahitophel langpan na hun sungin, agaltai na lamah galkap mangte tawh Bahurim khua a tun ding ciang un, Shimei a kici,Saul kumpi pa tanau khatin in, suang leh lei phil tawh theh in, ko in hamsiat in aom a, agalkap mangpa Zeruiah ta pa Abishai in, “Kupi pa aw, hi bang zawzen a, hong bawl pen a ngawng ka va tan ding” aci hi. Kumpi pa in, “Pasian in David hamsiat in ci ahih man in hih bangin hong ci a hi zaw hi.

Bang hang hong hi cih na hi hiam cih theih na ding thu a om kei hi. Ka si ka sa pan a apiang khia ka tapa tektek in hi bangin hong bawl ahih leh midang te pen gen na vet om lo a ci lel a, a kam ahum a, akhut alik kei hi. David in, Pasian tawh lungtang khempeuh pia in ki nai mahmah den ahih man in, banghangin kei tung hi thupiang, kei tungah thu nei taktak kua hi hiam cih a thei hi. “Hih bang ka tuah haksatna te Pasian in hongmu in, keitung a hong koih sak sa kamciam thupha(covenat blessing) teng hong pia kik ding hi kha zaw ding hi” a cih beh lap hi.

Aneu 6 na: hih neihsa lamsa zongin a khol khol a hau vetvat teng in zong, a sih khit uh teh kua in ngah ding cih zong athei kua mah om lo ahih na na gen beh hi. Kei kua ka hiam cih ki tel le hang, mite huhin, Pasian nasepna ah tampipi ki pia nuam mah ding hi ven maw ka na ci sim giugiau hi.

Aneu7: A lametna pen Pasian tung bek ahih na na pulak hi. Mihing te tung ah I lamet ngam ding, hong hu/huh zong ding kua mah I nei kei cih phawk tawntung a, hong ki huh zawhloh ciangin khasiat hetloh ding thupi mahmah hi.

Aneu 8 : mawhna tawh a ki pelh ding mah lunghi mawh pen hi. Pasian pen a siangtho mahmah ahih lam phawk tawntung ahihna ki lang hi. Hong hehpih in hong gum khin, thumthum kul kei, a theihsa hi na ci lo hi. Pasian tawh nai tak aton khawm te in, mawh na ki suan theihna nei uh hi. Ki suang suang den in suahtakna ngah lo cih na ahi kei hi. Lungsim tawng pen Zeisu sisan in hong silsiang khit teh, nisim in nin hong bang kik zel a , om hithiata koih mai ding hi lo ahih na, tua bang te pen mihai te hi acihna ki tel hi. Ka mawhna pan hong hon in la, mihai te tawh hai khawm nuam keng a ci ahihi.

Aneu 9: Kam cip in, daitak in thuak lel ning banghang hiam cih leh hih thu te nang ma sephi a ci thei hi. Nisim in, inn sung, nupakal, tek leh mo, khangham leh khangno te I buai theih tawntugng na te in, Pasian in kei tung ah phalna om ahihman in hi bang piang ahi cih theih loh na hang ahi pha pen hi cih ka mu thak hi.

A neu10-11 te ah, Pasian in, a ma tung ah thuhilhna ding in akhutngak pen a hepkhiat ding na ngen hi. Pasian in mihing te, ahih kei leh, ata it te a mawhna hangin thu a hilh ciangin, a neihsa lamsa te lakkhiatsak vingveng a, mihing in Pasian lo tawh husan khat bek I hih lel na aphawkna a nalui kik hi.

Aneu 12-13: Pasian kiangah alungtang ki tamzan in thu angetna ki mu thei hi. Khitui luangin, kap in, “ Ka thum na hong tapeuh ve a ci ahihi. Tawmvei ka nuntakna nong kop pen lungnuam tak in nung ta nuam lua si ingh e, hong za ve na beng hong ngat ve maw, nang tawh ki gamla ki sa si ingh e” a ci nuam a hihi. I Topa tawh a ki gamla in I ki ngaih sut hun om, hong taisan hi I cih hun zong om thei tham hi. I sunglam a hong puahnop ciangin, ki tamzan in thu I ngen hi.

Pasian pen tua bang a lungsim kitamzan te athusim leh amau te tawh aki nai pen ahihna zong David in Late 51:17 ah na pulak khia zo hi. Tua ahih man in, Pasian in ei te ei leh ei aman in i ki muh i ki tel taktak nadingin thu hong hilh zelzel ciangin, eite tawh a gamla ah a om hi tuan lo in, I thuak haksatna te pen thuakhak leh sauvei ahih man in, Topa in hong nusia ta a sa kha I hi zaw hi. A ki tamzan ,akisik kik lungsim sim mawh lo a, a ki nai pen ahihna I tel ding a ki sam hi.

Abup in David nuntakna I et ciang, atawpna ah, galven hun hong nei ve ve hi. A mah in, khantawn galdo nate a tuahkhak hangin, Pasian mawhsakna leh taisatna, ut bang a, gamtat nate neilo hi. Mawhna sungah akiat pak hun pen in, galdo ding akuan khiat loh hun pen ahihi.

Laisim U leh nau te tha kong hanthot nopin, I haksatna, hong ki pampaihna, supna baina, sihna manna, dongtuahnate in Pasian hong nusiatna hi lo a, I hihna taktak I ki phawk tawntung nading thu hilhna, pilna hong ki piakpak na thu ahi zaw hi. Tua banghun sungin, I thuak siam I puak siam nading a ziate honghilh ahih zawkna I mu siam ding hi. Ki niam khiatna, gal te itna, kilemna ding cihte ngaihsun in, I nuntak hun i ni I kha te mantak leh pilvang tak in sim kawm ding a, David bangin,Pasian i belh ciat ding hi. Topa Pasian in, thupha hong pia ta hen! Dim Lun Zam