Matut nading akisam D-7

Matut nading akisam D-7

D-1 – DAMNA & Cidamna – I nuntakna ah i ma i tut nadingin damna kisam hi. Hih damna ah lungsim cidamna, pumpi cidamna, kha cidamna kisam hi. Lungsim cidam nadingin thuhoih, lahoih ngaihsutna tawh cidam sak ding hi-a, pumpi cidam nadingin nisim exercise lakna le a limci nek le dawnte nekna dawnna neih ding ahi hi. Kha cidam nadingin nisim LST simna le Thungetna kisam hi. Kha cidamna in a thupi penpen hi-a, i kha cidam photphot leh i lungsim, i pumpi zong cidam ding hi. Tua ahih manin matut gualzawh nadingin D-1 ahi DAMNA i thupit ngaihsut ding ahi hi.

D-2 – DEIHNA & Tupna

Matut gualzawhna cihpen deihna ahihkeh tupna neihna panin hong piang ding hibek hi. Bangmah deihna, tupna i neih kei leh bangmah matutna le gualzawhna i nei kei ding hi. Mi lawhcing, mi gualzote’n deihna kician, tupna kician a neih manun leitungah tangthu zaknop hong gelhkhia uh hi. Mi lawhcing, mi gualzo i suah theih nadingin D-2 ahi DEIHNA i neih ding ahi hi.

D- 3 – DAWNNA & Muakna, pomsiamna

Leitung mihing ihih mah bangin ei tungah zong haksatna, buaina, natna, satna, dahna, kahna hong tung thei ahi hi. Tuate i tel masak, i deih masak ahihloh hangin eitung hong tun ciang lungkim tak leh lungnem takin i vaidawn mai ding ahi hi. Vaidawn ahihkeh dawnna icih ciangin mangbatna le lungkhamna i tuahciangin ei tungah omsuak ding hilo ahih manin pomsiam in tuate tung pan thu manpha sin sawm ni, cih a gen nuam ihi hi.

Haksatna le buainate in i nuntakna sungah hong picingsak ding, hong muibun sak ding kisinna van hoihte hong suak ding ahih manin i tuah khak, i phutkhak lungkham buainate lungkim takin dawn in sangsiam sawm ni. Experience is the best teacher cih paunak a om mah bangin i matut nadingin thaza hong suaksak ding D-3 ahi DAWNNA limci tawh kalsuan ni.

D-4 – DUHNA & Lunggulhna

Nisim nuntakna ah asia- apha, ahoih-ahoihlo cih bangin nam nih ta in ei hong umcih den ahi hi. Tuate bangin nam nih ta in ei hong buaisakna sungah eima lakpen, eima duhpen in i nuntakna hong ukin hong kalsuan sak hi. Asia lam a deih, a duhte in nisim in asia bek mah mu khia in, a sia bek mah piangsak ding uh hi.

Asia bek lunggulh in a kalsuante nuntakna ah gualzawh matutna kician om ngeilo hi. Tua ahih manin i nuntakna ah thuhoih, thuphate duhpen deihpen in nei ni. Pasian thu laigilte duh in, limsa ni. A manpha gamtatnate duhin nuamsa ni. Tua hi-a i nuntakna ah matun gualzo mi khat i suah theih nadingin D-4 ahi DUHNA hoih nei-in kalsuan ta ni.

D-5 – DAWNNA & Kiginkholhna

Mihingte pumpi sungah seh thum suah seh nih bang tui ahi hi. An nelo in ni tampi kinungta thei-a, ahi zongin tui dawn loin ni tam kinungta theilo hi. Tua mah bangin mi lawhcing gualzo khat i suah theih nadingin pilna, siamna, sum le pai akipan laisimna, thungetnate tawh nisim in kiphungvuh in tui dawn bangin dawn a, khantoh ding ahi hi.

Pilna le theihna i ngah theih nadingin i hun neih khempeuh kiginkholhna dingin i zatsiam ding ahi hi. Tua hi-a matut gualzawh nadingin D-4 ahi DAWN cih phawkin kiging khol, kithadim sak, kithawi kholh ding ahi hi. Tua hileh i lawhcing ding hi.

D-6 – DOTNA & Thu le la kanna

Na khempeuh in zia le tong nei ciat ahih manin i kalsuanzia ding le i gamtat zia dingte a theisa mite tungah dotna i neih ding ahi hi. I tup i ngimna i mualsuah theih nadingin i sepnop, i bawlnop ii thu le late i kan masak, i dawp masak, i dotcian masak ding kisam hi.

Ngasa man nuam mipa in ngen khuh dan, ngakuai siah dan a theih masak kisam a, tuate sepdan bawldan, sepzia bawlzia a kan masak a dot masak kisam hi. Tua mah bangin i matut gualzawh nadingin D-6 ahi DOTNA i neih ding thupi hi. I theihlohte mite tunga dotna va bawl dingpen haksa sak hetloh ding ahi hi.

D-7 – DEN A TENG CIAPTEHNA

A tunga i gensateng pen i matut gualzawh nadinga kisam D-6-te hi-a, a thupipen le a tawpna ah D-7 ahi DEN A TENG CIAPTEHNA ahi hi. Den a i gensateng ciamteh in kalsuan leng i ma tunin mi lawhcing, mi gualzo, mi manpha i suak ding hi. Deihsakna lianpi tawh, Dong Mung