Zomi Innkuan kalsuanzia ding ~ Rev. Khup Za Go

Zomi Innkuan kalsuanzia ding ~ Rev. Khup Za Go

• I Zogam Sian in hong tawisang a,
• Zo mipil, mi siamte hong pia a,
• A hoihna damtui bang hong luang a,
• Topa’ hoihna Zomi’n pak bang tawita.

Hih la kisa ka zak simin a thu a la hoih ka sa a, a sate lah siam ka sa hi. Ahi zongin i Zogam leh Zomite pen hih laphuakte cih i bang hiam cih thu ka ngaihsut ciangin ka dip a kua hi. Zomi nam a lunghimawh, lai gelh a hahkat ahi Sia J. Gin Za Tuang in 1973 kumin Zomi Innkuan Laibu kici khat Tedim khua pan hong hawmkhia hi. Zogam leh Zomi buppi innkuan khat bangin hong gen ciangin a ki-it ding, a kingai ding i hihna, i kinaina hong langsak phadiak tawh kibang hi.

Tuin zong Zo suan, Zo tate teng innkuan khat, khua khat zah bangin kikum le’ng ka ci hi. Zomi innkuan kalsuanzia ding i cih ciangin i gam i lei khantoh nading a gen nuam hi hang a, khantoh nading thu a gen ding i hih ciangin i khantoh theih lohna, i haksatna bangteng hiam cih thu gen masa lehang tua tung panin bang ci lehang i haksatna, i buainate vangsak thei ding i hi hiam ci-in i kikum ding hi. Zatote in cina mi khat a gal panin a muhna tawh zatang zatui tawh mawk bawl loin a et, a vel ngiatngiat mah bangin i gam i lei, i minam zong puah ding, hah ding, zun ding i cih ciangin i gam leh i minam in natna bang ngah a, bang zatui pia ding, at loha dam zo lo ding zah hiam ci-a i ngaihsut masak (study)ding kisam hi. Tua bang lian mahin tuin zong i haksatnapite kikum pah ngekngek dih ni.

1. Kumpi ki-ukna in hong khen hi:

Gamkeek Mikang kumpi in hong khan main Kawlzaang ah a teng pawl om, khamtung mualtung ah a teng pawl i omzo hi. Mikang kumpi in India a uk tungin kumpi khat ukna, vaihawmna sungah Zo minam khempeuh a om khin hi. Ahi zongin India gam ukna sung pan Kawlgam province khata 1937 kuma a khenkhiat ciangin Zomi pawlkhat Kawlgam province sung ah, pawlkhat Assam leh Bengal province sungah i kikhen hi. 1897 kumin Burma, Bengal leh Assam province sunga Zomite gam khata gawm ding thu Chin-Lushai Conference, Calcutta ah kikupna leh thukimna a om ciangin Bengal gama omteng Assam province-a om Lushai Hills ah a kigawm hangin Kawlgama omte tawh a kigawm ding thu gam vaihawmte in mangmat nawn lo uh hi.

Tua huna kipanin Mikang kumpi tung pan suahtakna i ngah ciangin zong uk khat sungah hong kigawm kik nawn loin India, Burma leh Pakistan ci-in seh thum hong kisuah hi. Pakistan pan Bangladesh a tuamin hong lenkhiat kik leuleu ciangin tua gama om Zomite omna Chittagong Hill Tracts pen Bangladesh huam sung a hih ciangin tuin India, Burma leh Bangladesh ci-in sialdai hong kikaih nelh hi. A taktakin India uk khat sungah i om lai nangawnin gam khat, state khat, district khat cih bang sungah hong koih khawm loin Chin Hills, Lushai Hills, Assam,Tripura, Cachar Hills cih bangin bilbem tuam ciat ah hong kikhum tuam a hihmanin lunsim leh ngaihsutna tuam puain minam khat, innkuan khat i hih lam i phawk nawn kei hi.

2. Min in hong khen hi:

Mikang kumpi hong khan main zong leitung pilna siamna nei loin eimau leh eimau gal leh sa peuha a kinei thei minam khat i hih manin kilawhna min takpi zong zat taang kician i neih loh laitakin hong uk kumpite in Kawlgam sunga om deuhteng Chin, India uk sung ahi Assam, Manipur leh Tripura gama omteng Kuki cih min hong vawh uh hi. 1890 zawh lam ciangin pawlkhatte in Lushai Hills cih gam sungah Lushai min puain hong uk ciangun ei zong minam tuam ciat mah i kisa hi. Tua a hih manin tu hun nangawnin eimau kivawhna min Zomi, Mizo, Laimi cih sung panin koi pen zang ding i hi hiam cih thu i kikup ciangin kithukim zo nawn lo tham loin gamdangte hong piak tawm Kuki leh Chin cih minte a len vinven nuam awl zong i om lailai hi.

3. Pau in hong khen hi:

kampau in hong kikhensak hi. Lai tawh kop lo-a gam sungah a vak kawikawi minam khat i hihna tawh i tenna, i khanna khua leh gam zuiin kampau tuam ciat i nei hi. Mikang kumpi leh Khristian misonarite in lai leh pau hong piak ciangin Chin Hills sungah Tedim, Falam, Haka; Lushai Hills ah Lusei, Mara (Lakher); Manipur, Cachar Hills, Tripura leh Chittagong Hills ah zong Lusei pau hiam, Tedim pau hiam, Haka pau hiam sinsak zangsak lehang minam khat pau khat zang mi suak ding uh hi cihna om nawn loin tua gama om Zopau khat peuhpeuh tawh lai kibawl hi. Tua bangin 1900 hun laia a mun leh gam zuia themkha a kilamdang pau 60 phial i zatte sung panin tuin Lai Siangtho leh La Bu pau sawmnih val thamin i kikhennen lai hi.

4. Ngeina leh tatzia i hong khen hi:

Kampau bek hi loin i ngeina leh i tatzia in Zomi innkuan bangkua hong kikhensak hi. Pawlkhatte in uzaw innluah gamluah i hih laitakin pawlkhatte pen nautum innluah gamluah i hi hi. Kitenna tawh kisai man leh mual, sihna dahna gamtatdan kibang kim lo hi. Minam pawi a hi Khuado, Sialsawm (Lawm An), Pawl Kut, Mim Kut leh Chavang Kut cih bangin a tuam ciat i nei hi.Hih bang nengneng in hong kikhensak hi.

5. Biakna thu in hong khen hi:

Mikang kumpi hong khan tawh kitonin Khristian Mission hong tung hi. Tua hun laiin leitung Khristian mission makaite in Pasian thu a za nai lo minamte leh gamte ah a manlanga Pasian thu a kizelh nadingin comity agreement ci-in gam a khen uh hi. Hih thu tawh kituakin Chin Hills ah American Baptist Mission, Lushai Hills saklam ah Welsh Presbyterian Mission, Lushai Hills khanglam ah British Missionary Society (Baptist), Manipur leh Assam gam ah American Baptist Mission cih bangin leitang hawm uh hi. Hih comity agreement zui se loin Lushai Hills khanglam Chin Hills kigi lam ah Lakher Pioneer Mission lut a, Manipur khang lam gamah Indo-Burma Pioneer Mission lut hi.

Amaute pen pawl (denomination) thu puak dinga hong pai hi loin Lungdamna Thu (Gospel) puak dinga hong pai hi napi-in amau hong nutsiat zawh nangawn ciangin Khristian ciatciat hihna tawh pawlpi khat ah kigawm ding thu kigen nawn loin Baptist, Presbyterian, Methodist, Seventh Day Advantist, Evangelical, Salvation, A.G., Roman Katholik cih bangin khuakhat sung bek ah zong biakinn tuam sat ciat i hih manin Mizogam Murlen khua-a om Pu Sing Dai kici in “Phung khen buk ah hei aw e” ci-a Khristiante la hong phuahsan mah bangin i biakinnte pen phung khen buk i suaksak khin hi.

Gospel hangin kha nuntakna leh leitung nuntakna ah zong lai leh khantohna i ngahna pen i thei ciat hi. Ahi zongin zatui khat pen a zang siamte aa dingin damna a hih laitakin a zang khialte aa dingin siatna a hih mah bangin ei gam ah zong biakna pen kilang neihna leh kikhenna i suaksak hi.

Hih zaha Zomi innkuan sial ek denten banga hong kikhensak pen leitung vai leh minam lungsim bek pana a ngaihsun pawlkhatte in Mikang gamkekte (British colonialism and divide and rule policy) hang ngawh gige uh a hih manin

• Mim bang pianna i gam tulta i pian gam ngei, ngei it kei le’ng,
• Keekta’n nuihsiam lel, siam lel,
• Lelta ding aw e, gual.
• Tang bang khanna i sim gam zaang,
• I zo gam zaang e’n khual kei le’ng
• Gual in nuaisiah nelhsiah nei, neita ding aw e, gual
• a ci tawh,
• Kiak lo tulta lum suang delh bangin
• Keekta’n nuaisiah a,
• Teeng khawi-in nei e, guai aw e.
• Khang thei lo vua seino gual aw,
• Ham bang huai siam vua,
• Lawkta tau zil pian gam lei,
• Henkol sut, henkol sut le’ng e

a na ci ngeungeu bek pawl om uh hi. Ei pawl suakta kisa-a Halleuijah, Hosanna, Amen ci-a i kiko ziahziah laitakin henkol sut ding a hanciam pawl peuh na om thei ngiau! Hih bang pian la 1960 pawl in Zangkong ah Tg Kham Za Ngo (Mualbem) in a sut vanglak ciangin khawl hun thei lo phial a’i ve.

Zomi leh Zolai a ngaihsun mahmah khat ahi Sia Gin Khat Suan (Tamu) in “Zomite tawm si, hai si, zawng si,” ci-a a hawmthawh pau theih mah bangin a tunga thu ngate hangin i kikhenkhenna lam ah mangthang khin dekphial i hih ciangin tuin bang lawhta ding i hi hiam? Minam kipumkhat nading, kihotheih nading, khantoh nading, kamkum nading, vaihawm nadingin i minam leh gambup a huamzo ding kipawlna khat vaihawm kisam lo ding ahi hiam?

Tua kipawlna ah minam kilomkhatna (integration), minam min (nomenclature), tangkam (common language), ngeina (customs & culture), biakna pawlpi (united Church), gam sung kihotheihna leh mawinawtna (peace & development) komiti cih bangin leitung vai, biakna vai leh kumpi lam ah i makaite leh mipil misiamte hong kikum leh thu khat peuhpeuh hong piang pelmawh ding hi. Hih thute thakhatin a piang thei thu hi loin a khang a khanga hong mengkhia ding thute ahi hi.

Kamsang Nehemiah in Judah mite’ haksatna leh tuahsiatna ahi zongin, Jerusalem khuapi leh kulhpite siatna thu a zak ciangin ahi zongin na sem thei loin, antangin Pasian kiangah thu ngen niloh hi. Minam makaite, biakna makaite, sum bawl a cithawizaw, a om theizaw diakte, pilna siamna a neite, a khangto gamte ah nasema a omte in “Hong pai un, zahkona i ngah nawn loh nadingin i Zogam kulhpi ciang pha ni” nong cih ding uh hunta hi lo hiam? Hih bang ngimna leh kipawlna vaihawmna a om peuhmah leh sum tawh ka huhzo kei zong, pilna siamna tawh ka kuppih thei kei zongin, vantung Pasian tungah thupha a ngetsak dingin a mansa ka hi hi.

I Zogam kil bang khang gual tung tuangin, Sim leh mal tui bang kigawm pumkhat suakin ma suan khawm ve ni. Lia leh tang tung kituak, pilna siamna sit loin, Gam leh nam aa dingin sem ciat ve ni. Rev. Khup Za Go