Malaysia, Kuala Lumpur khuasung ah Immigration Department te’n zanni Wednesday ni in Operation “Operasi” bawl uh a, gamdangmi agukom illegal immigrants akigawm in mi 125 mankhia uh cih theSun pan kiza hi.
Director-general Datuk Seri Mustafar Ali in agenkhiatna ah Malaysia gamsung ah gamdangmi Permit kician neilo “illegal immigrants” tamlua mahmah ahih manin nisim in siansuah kulden cihi.
Gamdangmi tampitak Student Visa tawh honglut uh a, Malaysia gamsung hongtun uhciang in nasepzong in omsuak uhhi. Visa abeikhit ciangin omsuak in Permit neilopi in nasep kipan uh a, Overstay vive mi tampitak om cihi.
Zanni akiman mi 125 te lakah numei mi 10 kihel a, adangte pen pasal vive hizaw uhhi.
Zanni Operasi abawlna ah mi 350 bang abanban in sikngekngek uh a, bangtawh om uhhiam cih atawi laidal leh Card te etcianna neihsak uhhi. Mi 350 asit lakah mi 125 pen illegal in aom uh ahihlam mukhia uhhi.
Operasi pan amatkhiat uhte pen Indonesian, Indian, Nepalese, Bangladeshi, Pakistani, Filipino, Afghanistan cih gammi tuamtuam ahi uhhi.
Bukit Bintang kuamsung ah Operasi amankhit ciangin Press Conference bawlpah uh a, bangmah Permit tawi aneilo agukom tepen akimatleh khauhtakin daan kipiading hi “We will take serious action against them now” ci’n Director-general Datuk Seri Mustafar Ali in genkhia hi.
Tuaban ah Immigration leh DBKL te kipawlkhawm in vanzuakna sai “Shop Owners & Employers” te deihphatak in sitcianna kineiding hi. Gamdangmi Documents kician neilo, Permit leh Visa kician neilo in nasem leh innsaap in aomte pen anasepna Boss te leh inn asaapsak innteek te’nzong thuakding cihi.
Related: Malaysia, Puchong vengsung ah Operasi lut, gamdangmi 66 kiman
Tukumsung bekbek in Malaysia gamsung ah Operasi (Operation) 5908 vei kibawl khinta hi. Gamdangmi Foreigner akigawm in 62,654 kisit khin a, tualak ah mi 17,971 kimankhin hi ci’n Mstafar in genkhia hi. ZD Sawltak #zomidaily
Comment piaknop aomleh...