Malaysia Refugee lakah IS migilo te akihelding patau ahih manin, kumpi te’n Database ngen
Malaysia gamsung ah UNHCR Card tawi Refugee leh Asylum Seeker akigawm in mi 150,204 bang omding hi ci’n Prime Minister’s Department te’n nungdiak in pulakkhia uhhi. Tua UNHCR Card tawite sungah migilo, mi ngongtatsawm Terrorist honkhat omding in ummawh uh ahih manin, Malaysia kumpi te’n UNHCR te tungah Database apiaknading un ngetna nei cih CNA te’n genkhia hi.
Malaysia Deputy Home Minister Nur Jazlan in agenkhiatna ah IS (Islamic State) militants galkap te honkhat Malaysia gamsung ah honglutkhin khatheiding uh cihi. Tua migilo te’n Malaysia gamsung ah nuamtak in aomtheih, azintheih nadingun UNHCR (United Nations High Commissioner for Refugees) te tungpan in Refugee Card ngenkhin khading uh cihi.
UNHCR zumpi te’n Refugee Card apiakding uhciang in amauthu tawh thusitna aneiziau uh hi a, Malaysia kumpi thunei Home Ministry Officers te thusitna “Vetting process” ah kihelkhakna omlo hi. Tuaban ah Biometric Data zong kilalo ahih manin, hih Refugee Card akipia te sungah migilo Transnational crime, human trafficking, terrorism cihte ah akihel mihoihlo pawlkhat kihelkhading uhhi. Tua ahih manin UNHCR te ii mimal tangthu ciaptehna Database pen akideih ahihi ci’n Deputy Home Minister in genkhia hi.
UNHCR zumpi inzong Refugee mimal pen khangsemsem ci’n genkhia uhhi. Tulaitak Malaysia gamsung ah gamdangmi tamlua in khuasung mipi te alunghimawh, apatauh mahmah laitak ahih manin, Malaysia gamsung ah aguklut te khakcipding leh matkhiatding hunmahmahta hi. Tualak ah UNCHR Route pen khatin kihel hi ci’n Deputy Minister in genbeh hi.
Tuahang in Malaysia kumpi in UNHCR tawh kipawkhawm in, Refuee Card apiaksa uh mi 150,000 val te khatta in sitcianna neihding alunggulh uh hi a, Proof of Concept (POC) programme aki patkhiatsawm uh ahihi.
Tua Proof of Concept (POC) programme vaitawh kisai in abeisa April 01 ni akipan kikupna aki neizelzel hi a, UNHCR zumpi in athu in hong thukimpih uhhi. Ahi zongin Refugee te thukhempeuh Details piakkhiatding pen Mutual Agreement aom hangin hong piakhia nuamlo uhhi. UNHCR te’n hihvai ah hong panpihnuamlo uh ahih manin, nasepzong ziakai saktuam uhhi.
Tua ahih manin Malaysia Home Ministry te’n Refugee kipawlna Community makaite tawh Direct in kizopding ki ngaihsun a, amau tungtawn in Refugee khatciat ii Biometrics lakding leh amai, amit Scan bawlding, Facial Recognition bawlding ki ngaihsun cihi.
Malaysia Refugee leh Asylum Seeker lakah atamzaw pen Myanmar gammi vive hi uh a, Refugee Population ii 90% pen Myanmar gampan hong paikhia te kici hi. Tualak ah atamzaw pen Rohingya leh Chin in ki ciamteh a, Myanmar gammi limlim mi 133,725 bang phalai uhhi. Tuazom ah Pakistan 3,548; Sri Lanka 2,328; Yemen 2,095; Somalia 2,062; Syria 1,980; Iraq 1,461; Afghanistan 1,082; Palestine 698; Iran 440 cihbang ahihi.
Related: Malaysia Refugee te lakah TB natna tampi kimu ahih manin ki lunghimawh
Malaysia Refugee leh Asylum Seekers khempeuh te sungpan in 67% pen pasal hi uh a, 33% pen numei ahihi. Refugee leh Asylum Seekers sungah naupangzong tammahmah a, kumcingnailo kum 18 nuaisiah mi 37,000 bang pha cih kiza hi. Sawltak #zomidaily
Comment piaknop aomleh...