Bang hangin naheh ciangin na aw ngaih sese hiam? ~ Job Cinpi

Bang hangin naheh ciangin na aw ngaih sese hiam? ~ Job Cinpi

Mihingte khat le khat i kizopna pen kampau tawh a kizom bangin kingaihsun kha hi. Ahi zongin a taktak ciangin mihingte khat le khat i kizopna pen lungtang tawh a kizomte i hi hi. Mi nih kitawng uh a, a nih un heh mahmah tuak uh ahih manin a aw uh ngaihsak semsem uh hi. Kinai om mahmah uh a, damtakin kigen uh leh zong kiza mahmah ding uh hi. Ahi zongin a thaneihzahin awng uh a, a lungkimlohna uh gen khia uh hi.

Mihingte pen lungsim ngaihsutna tawh a kisim hi hang ci-in ka gen khin hi. Lungsim tawh a kizomte i hih manin kitot kiselna a om ciangin khat le khat lungsim kipumkhat thei nawn lo hi. Khat le khat a lungsim uh kigamla semsem hi. Tua manin a pumpi uh kinai mahmah napi a lungsim uh a kilamlat manin a lungsim uh a kigamlatna zah tawh kizui-in awte ngaih semsem nuam thei hi.

Lungsim kipum khat a, lungsim kinei mite peuhmah awdam le kawkhum takin kiho ding uh hi. Mi nih a lungsim uh a kigawm tak ciangin pum khat suak thei pan uh hi. Pum khat a suah uh ciangin aw nangawn tawh kiho kul nawn lo thei hi. Lungsim a kinei semsem le aw nem semsem ding hi. Lungsim a kipum khat zote mi hek bek tawh zong a lungsim om zia kimu thei uh hi.

Innkuan sung nupa kaal sungah awnem awkhum tawh kiho siam ding pen thupi mahmah hi. thuneihna le kithupitsakna tawh aw ngaihsak lualua, pheng pau lala den cihte pen lungsim a kigamlasak semsem gamtat hoih lo khat ahi hi. Na aawsuah in na lungsim omzia a lak ahih manin na innkuanpihte le nang tawh a om na it na ngaihte tungah na aw nemsak den in. Job Cinpi (Zomi laisim nuamte)