Khapi a tawng niloh Ui (Barking At The Moon) ~ Rev. Zam Khat Kham

Khapi a tawng niloh Ui (Barking At The Moon) ~ Rev. Zam Khat Kham

Tuma kum tam simsim lai-a Our Daily Bread laihawm sunga ka sim khak khat hong share nuam ing: Dr. M.R. De Haan in a gelh hi a, “Barking At The Moon” ci-in thulu kipia a, Manglai-a ka share leh pawlkhat in ei’ pau-in hong tei/letkhiat ve, nong share veve, hong ci uh ahih manin hi zong sa veve mah ka hih manin hih lai-ah Zokam in kong share leuleu hi.

Khapi A Tawng Niloh Ui ~ Barking At The Moon (M.R. De Haan, April 28, 1997)

A pau ciangin zahpihna leh simmawhna kammal pian vive a zang denkeii semawk sitni (attorney/lawyer) khat hangin thukhenmang khat in nuamsa het lo hi. A tua ci gamtat nawn loh nading hapsuk giap pian cih ahi zongin, pau lo-a a om nadingin gen, cih ahih zongin hih khol lo a, nui hiithiat lel-in a khut sunga khedan peuh petpet lel hi. Bangcia tuazah a lungduai zo mawk hiam, ci-in mite in lamdangsa mai uh hi.

Nitak-an nek khopna khat ah a lawmte khat in, “Bang dinga a kipilsak lua mahmah hua sitnipa bang hiam khat cih lo na hi hiam?” ci-in dong hi. A khut sunga sikkeu-ka a kuang sungah koih suk hiat phot zawzen-in, a khut tegel tung ah a kha nga kawmsa-in, “Ka khua vuah ui khat a nei meigong nupi khat om ngei. Kha liik ni hi peuh leh tua nu’ ui in khapi tawng niloh veh aw,” ci-in dawng kik hi.

Thukhenmangpa tuateng a cih khit teh a an nek zom kik hi. Tua mun-a om kha khat lungnuam thei mahmah lo ahih manin, “Tua teh tua ui leh tua khapi bang ci ahia, thukhenmangpa?” ci-in dong hi. Thukhenmangpa in, “A khapi bel a tan ngei-a tang ahi ve!” ci-in dawng kik hiat lel hi.

Mawhna kicite lakah mi gensiatna kici mawhna banga midangte’ ading siatna a piangsak mawhna om lo kha mai ding hi. I hihna lopi-a hong kigen ciangin siatna pen siatna tawh thuh ding ngaihsun masa lian kha ding hi hang.

Ahi zongin Khazih (Christ) sutna taktak i cih pen siatna kici peuhmah hoihna tawh zawhna hi a, Topa adinga nuntak suak teiiteiina ahi hi. A man lo pi-in kibawlsia-in, ahi lo pi-in kimawhsaka singlamteh tungah thahna thuak dinga a kipaipih laitak nagnawnin a thukik het lo i Honpa a sun dingte i hihi (Mark 15:3-5; I Peter 2:21-23).

I kiim i paam-a uihang banga hong tawngtawng mite lakah i nuntak sungin Pasian’ ading i tan ngei-a i tan zawh nading Pasian’ hehpihna i kisap luat dan!

Ei’ tunga hong kibawlna bangbanga thuhkik lianlianna pen migit thukhual vai den het lo hi! (It’s not always kind to respond in kind)

• I want the love that always sweetly bears
  
• Whate’er my Father’s hand may choose to send;
  
• I want the love that patiently endures
  
• The wrongs that come from enemy or friend. —Anon.
  
• (A poem te bel a hoihna siasak zaw kha lehang ci-in tei nawn dah ni.)
  

Mi pawlkhat in kul khol lopi-in midang pawlkhat gengen (gensia cih ding hi mai!) nuam lua keii mawk uh hi. Pawlkhatte’ adingin thuaklahhuai pianpian thei hi. Thuaklah kei ni. Mihingte in bel i hihna ciat mah kuama’ sawl se loh mah-a a kipulaklak lel mah hi ve hang maw. Lunghihmawh nading om lo hi, i dinmun ah kiptakin ding lel ni. Rev. Zam Khat Kham