Zomi Cup 2015 ah Tukpeng tawh ki lawmtatna nuamtak in kizo ~ Hau Za Cin

Zomi Cup 2015 ah Tukpeng tawh ki lawmtatna nuamtak in kizo ~ Hau Za Cin

Pasian hehpihna tawh Zomite leitung gam tuamtuam ah i om kawikawi hi. Hong bawlpa in deihna leh ngimna lianpi nei a hong koih hi cih upna bek hinawnlo in theihna lianpi hong om semsem hi. Gam tuamtuam ah i om pen khuaipite in pak tuamtuam pan pakzu tuamtuam dawn kawikawi in a bu ah a ciahpih ciangin khuaizu limpen a neih banga Zomite in leitung pilna leh hauhna, theihna tuamtuam tawh Zomi leh Zogam puah dinga Topa hong koih ahi hi. Ama minthanna ding leh Ama gam zaina dinga hong zang nuamin Zomite hong lamsang hi.

Tua khempeuh a tangzai semsemna dingin Singapore a om Zomite leh Malaysia ah om Zomite in Tukpeng tawh kilawmtatna hun nuamtak in ZOMI CUP 2015 phualpi Kuala Lumpur, Malaysia ah February 2, 2015 niin nuamtak in kinei thei hi. Hih hun ah ZIS leh ZAM in zingsang lam khatvei, nintak lamin khatvei Tukpeng suih kidemna kinei a, anih in Singapore Zomite in zo dektak tuak hi! Hih hun ah a kihel dingin Singapore pan Dr. Hau Za Cin, Pa Khup Khawm Mung, Dr. Chin Khan Lun Guite, Tg. Eric Suan Za Tuang, Tg. Luai Hming Thang, Tg. Pau Kim Sing, Tg. Pau Khua Mung, Tg. Hau Deih Mung, Tg. Lian Sawm Sing, Tg. Do Thawn Tuang, Tg. Pau Mun Khai, Tg. Dal Sian Kam, leh Lia Cing Sian Nem te January 31, 2015 nitak nai 9 in Bus tawh pai in KL zankim 1:30am in Zomi Innpi (ZAM Phualpi) kitung hi. Zankim pi himah leh lungduai takin Zomi Association of Malaysia ah President Sia Hau Suan Khai in maitai takin hong dawn siuseu a, ka tawl uh hong dam pah hathat hi. Ka lupna ding uh Sia Khoi Sian Tuang in na phah dimdiam a, tua ah nuamtakin k alum hithiat uh hi.

Zingsang khuavak ciangin tho in kiphiatsiang in ka khuadak uh leh kiallap ne dingin hong dawn Sia Kam Lian Mung tawh kongkhak ah ka kituak uh a, ama’n Malaysia ah om Zomi khempeuh hong zindona – moh, aktui leh niangtui lim mahmah gilvah takin hong nekpih phitphet in tua panin tukpeng suihna ding lam ka zuan uh hi. Malaysia khuapi Kuala Lumpur sunga meileng nuam mahmah tungah tuang dingin ka kithawi uh ciangin Sia Mung leh Sia Khoi Tuang makaih mah in ZAM te in ka paina ding khempeuh uh hong sik leuleu in nuamtak in Tukpeng Tualpi ka tung uh hi. Hih mun pen ZOMI CUP kipat masakna suihna mun hi a, tukum in zong ZOMI CUP suihna mun mah ahi kik hi.

Tualpi gei ka tun phei uh ciang… taivo taivo, hoih lua, siamlua, goalllll… cih bang awging ka galzak pah uh a, Zomi gim hong nam vangvang pah hi. Zopuan silh, Zonik teng kigalmuh in a phual ka tun uh ciang nungak tangval, nupi papi, numei naupangte amau khua ciat thapia in na awng ziahziah uh a, nupite bang a tate uh palpai dekdek in na diang zakzak uh hi. Zomite in tukpeng mah nuam kisa veve mawk hi ei guai, ka ci sim pah hi.

Zomi makaite in hong na dawn in ka dawn ding uh tui, ka hai ding uh kamkhai (chewing gum) leh moh cih bangin hong na pia pah uh a, ka lawp semsem uh hi. Zingsang nai 10am hi a, ZOMI CUP 2015 sungah a kihel Team 32 sung pan Team 16 a kahto ding a suih nunung ni penpen uh ahi hi. Team 4 in sui ziahziah lai ahih man in tua khua 4 te kisui ka en uh a, siam thei mahmah in nopci mahmah hi. “A kihta sim pian pah hi,” cih bang pian in koh zong ka upmawh sangin Zomite na ‘kisinzaw uh’ ei ka ci uh hi. Ahi zongin koh siamna zong ka musak nuam veve uh hi J. Amau suih khit ciangin Singapore Zomi leh Malaysia ah om Zomite ka kisui pah takpi uh a, inntekte in hong zo hi. Nitak lam ciangin ZOMI CUP 2014 champion Anglangh Khua te tawh ka suih leuleu uh leh amau hong zo leuleu a, “Tuni bel 2-0 tuak bek khumsak mai ni,” ka ci uh hi. Ka vekpi un mimal siamna kilak tek ni ciin penalty ka suih uh leh ka vekpi un ka khum uh hiJ.

Sun ann limtak hong nekpih khit uh ciangin Zomi Adventist Church ah ZAM leh ZIS makaite kimuh khopna leh tutkhopna ka nei uh a, Senior Pastor Rev. Dr. Cin Sian Pau in thungetna tawh hunte Topa tungah apna hong neihsak hi. Biakinn nuam in aircon sungah puanzanel kiphah tungah tu hithiat in ka holim uh a, nuam kasa mahmah uh hi. Tua ka holimna uh panin Zomite koi mun peuh ah i om zongin khut kilen a nasem khawm ding leh mapang khawm ding, kalsuan khawm a Zogam paallun sak ding hihang cih ka lunggulhna uh na kibang mahmah hi. Tua ahih manin:

1. Tukum Zomi Nam Ni zong Malaysia ah bawlkhawm kik in semkhawm ding hanga, Singapore pan a tam thei pen Zomi Nam Ni zangkhawm dingin Malaysia ah pai phei ding hi. Vai khempeuh ah Malaysia Zomite in inntek sem dinga, thu leh la, thusinna leh thusunna hunte ah ZIS leh ZAM in a kisam bangin mapang khawm ding hi.

2. April 23-26, 2015 sung Tedim khuapi a kibawl ding Zosuan Tuailai Khawmpi a 2veina zong mapang khawm a semkhawm dingin thukim takin ka gen khawm uh hi. Zosuan Tuailai Khawmpi (ZTK) ma sung nipi kal 2 sung in Tedim khuapi ah Manglai Sinna (English sinna) kibawl dinga, tua ah laihilh dingin India pan Manglai siam hong pai ding uh hi. Hih Manglai sinna pen kizom toto dinga mailam ah khua tuamtuam ah kizom toto ding hi.

3. Zosuan Tuailai Khawmpi ah Tukpeng kidemna om dingin kilunggulh a tua ah ZAM in ZOMI CUP INTERNATIONAL bawlsak dinga, medal tawh thuah in vaihawmsak ding cih hong pulak uh a, nakpi takin lungdamna khut kibeng ziahziah hi.

4. A kisam banga khut kilen toto ding leh semkhawm dingin lunggulhna khempeuh Topa tungah ap in hunte ka hial bawl uh hi.

Tua banga hun nuam ka zat khit, ZOMI CUP 2014 Champion Anlangh Khua tawh ka suih khit uh ciangin nitak ann limtak nekhawm kik in, tua pan in Singapore lam zuanin ka ciahkik uh a, cidam takin Topa in inn hong tungsak hi. Topa min phat in om hen.

Lungdamna: Ka tun uh pan ka ciah dong uh hong dawn, hong kha, nek leh dawn khempeuh hong sik ZAM makaite tungah Zomi Singapore a om khempeuh tangin lungdam thu kong puak hi. ZAM makaite in hong vaidawn pen Zomi Malaysia ah om khempeuh hong vaidawn, hong zindo na hih manun Zomi khempeuh tungah nakpi taka ka lungdamna uh kong pulak uh hi. Topa in a nuamzaw hunte ah hong lamsang in Zomi leh Zogam paallunsakte hi ciat dingin thupha namkim hong piata hen.
Zomi hih mah nuam ngaungau ei. Hau Za Cin, Phuitong Liim