Nang kikhel masa in ~ Nk Khanno
Hun khatlai in ah mihau pa khat a om hi. Sumhau, ganhau mah taleh a mit natna nam khat a vei citciat hi. Mit lam kiva Siavuan minthangte tawh kilak in, zatui za ha tawh ki bawl kawikawi hi. A tawntung in Siavuan siam, minthang te tawh kilak den in zatui zong ne den hi. Ahi zongin amit natna pen dam lam manawh zaw lo in hong suksia zaw pian hi.
Nikhat RC topa khat mihau pa mit natna vel dingin hong pai hi. Mihau pa mit a vel ciangin, topa in mihau pa mit natna veina ahang hong thei hi. Tua hi a, mihau pa kiangah “Mihaupa aw, na mit natna pen a lamdang khat hi. A eng mel losiah bangmah na en kei in. Tua hileh hong hoih ding hi.” ci’n kam hong vaikha hi.
Aman in cileng mihau pa mit in a eng mel simloh a dang mel tuamtuam te a mu theilo ahi hi. Tua bang teng hangin mihaupa zong limsuaih siamte a inn ah sam in innza eng (tembaw si) a bungpi in lei venvan in a innsung, khansung le a vante cihte leh a et nading munkhempeuh a engza zut sak kawikawi hi.
Ni hoih khomkhat a kivei khit ciangin, mihau pa mit vel dingin topa hong hawhkik hi. Mihaupa nasem te inn kong ah puantual kang tawh hong lutsuk topa amuh uh ciangin innza eng thakhat in buak suk uhi. Topa in puan kangsilh ahih manin a pu mitnatna a suahkik loh nading in a engza ka buah uhi ci uhi.
Hih thute azak ciangin, topa zong hong nuikhia lela hi. “A zenzen in nang a eng mel mit limlang khat lei ziau lecin na sumbei nuamtuam ding bek thamlo na inn, na van te khempeuh a engza zong zut kullo ding hi. Hamsa pi in na kiim na paam a engza na zut tantan sangin, nang muhna liah ziau zaw lecin na kiim na paam zong hong kilaih ding hi.” ci’n mihaupa hong gen hi.
Lai-at siam minthang Leo Tolstoy in “Mi khempeuh in leitung kikhel na ding bek thei in, amah le amah kikhel ding phawk khalo hi.” na ci ngei hi. I kiim i paam ei deih bangin i khelsawm thei hi. Ei ma piciang tawh i teh hi. Ahi zongin tua piciang tawh eileei i kiteh ding kimanggilh kha thei hi.
Gandhi in “Leitung na khel nop dan lianin nang kikhel masa in.” na ci hi. Leitung ah thuman thutak tawh kidim hen nacih le nang thuman thutak kiplet pa himasa in.
“Hong it in cih sangin hong it ingh” ci zaw ni. Zomite akilem theilo minamte ci in a gengen khat pen a nuak masa penpen, a heh masa penpen na hi zawsop thei hi. Mi gensiasia khat, mi a zah koko khat pen lungsim picinglo, lungsim niam mikhat zong na hi kha thei hi.
Nang kikhel masa lo in, nang deih bangin kuamah hong kikhello ding hi cih ahi hi.
Lai-at ; Nk Khanno
Credit; Original writer
Comment piaknop aomleh...