U.S Government partial shutdown tawh kisai theihding pawlkhat

U.S Government partial shutdown tawh kisai theihding pawlkhat

I theih sa tek mah bangin “funding border wall” hangin U.S kumpi alang dek tak akikhak zawh ni 26 pha ta aa, U.S taangthu ah shutdown asau vei pen hong suak hi.

Shutdown & Kumpi/ contract/ company employees:

Kumpi nasem (federal employee) – US Kumpi partial shutdown hangin Kumpi nasem (federal employee) pawlkhat nasep khawl uh aa, pawlkhat kha sum sang loin nasep kuan uh hi. Partial shutdown hi phot ahih manin departments alang tamzaw kihong lai aa, Essential departments teng belh kihong suak suak phot ding hi. Kei nasepna department (USPTO – under Department of commerce) zong tu ciang ciang kihong lai aa, sau vei to to leh belh bangmah kigen thei lo hi.

Kumpi nasemte aading “good news” khat ah belh Kumpi a ki shutdown sung kumpi nasem te’ akha sum uh pen shutdown aman zawh ciang avekpi pia kik ding ci in President Trump in den mah in sign thu zo hi. Contractor tawh asemte – Kumpi Contract tawh asem te pawl khat zong nasep khawl uh aa, a nasep kawl sung khasum ngah kik ding leh ngah kik loh ding kitel lo hi.

Atamzaw in belh sem sem lai uh hi. Company nasemte – Company nasem te belh tu ciang ciang a nawngkai na kiza nai lo phot hi. Ahi hangin company atamzaw pen kumpi tawh na kisem khawm ahih manin Shutdown hong sauvei leh US economy hong sukha dingaa company nasem te zong hong nawngkaai thei ding hi.

Shutdown & Food-stamp:

Mipite akipia Foodstamp pen Federal kumpi in State kumpi te a piaksawn uh hi aa, February kha ai ciang ngah ding bek kamciam uh ci hi. March kha ai ding ngah ding leh ngah loh ding kitel nailo ci uh hi. Shutdown vai hangin February kha ai Foodstamp pen January 20 ma in lut sak ding ci uh hi. Department of Agriculture in belh ni 40 ai tang bek om lai ci uh hi. Tua ahi aa, “na food-stamp te uh zat siam un” ci in kumpi zum lam ten mipi te zasak uh hi.

Shutdown & Tax returns:

Tax return tuat sakding in IRS zum in kumpi nasem 4600 val sam kik uh hi. Tax-filling pen abeisa kum dan mah in pai suak ding aa, tax return zong kum dangte dan mah in ngah ding uh hi.

Shutdown & Social security, Medicare, pension:

Tu ciang ciang social security benefit, medicare leh pension te kipia to to lai aa, bangmah nawngkai na om lo phot ding kici hi.

Shutdown & U.S diplomacy:

State department zum pawlkhat zong kikhak ahih manin leitung mun tuamtuam om U.S embassy teng zong nasep pawlkhat khawl uh cih kiza hi.

Tu aa kong suahsak pak te pen ei mipi tawh akisai zaw deuh te pawlkhat ahi hi. Atungaa thu te pen ahunzui in zong kikhel to to thei aa, hong upate to to ning. Tutung U.S Kumpi shutdown pen kum dang te tawh kibang lo aa, kibuai pha deuh tamlo in mipi te zong hong buai sak ding dinmun ahih manin akua ma peuh in thu ngetna ah phawk tek ni. Thomas Mung Guite, Washington D.C