Huihpi nunma in daidide theihi ~ Lian Tuang

Huihpi nunma in daidide theihi ~ Lian Tuang

Abeisa nipi khat lai pawl a kipan i buaipih mahmah Covid-19 pen tu tadih dinmun ahih leh a sia lam sangin a hoih zaw lam manawh tawh i kibat laitak ahi hi.

Tangval pa tawh a kikhawl khate tungah natna kilawh loin, khua le tui sungah zong thu lamdang lua kiza lo ahih manin i lungdam mahmah hi. Hih natna tungtawnin thusia lasia kiza beh lo ahih manin i lungdam in i lungmuang tuam zaw deuh hi.

Ahi zongin hih bangin thu lamdang lua i zak beh loh pen hih natna tungah kigualzo ta hi cihna hi zenzen lo ahihna i phawk ding kihantawn nuam hang.

Ei kiang cih thadah gam khangto mahmahte nangawn in zong tu laitak in hih virus mah buaipih in lel mahmah uhi. Leitung bup in galpi do bangin a do laitak ahi hi.

Hih virus tawh kisai thu tampi a kigen hangin a huampi in gen ni cileng, leitung mipil misiamte in tuni ciangdong mah in hih virus pianzia taktak koi dan hiam ci in a kankan laitak uh hi pan hi, A dalna ding zatui kimu nailo hi.

Tua ahih manin Zogam ah tu laitak thusia lasia bangmah kiza loin a daih dide pen huihpi nun ma in kim le pam a daih dide dan khawng ahih khak ding zong patauhhuai hi. Tua hi a, kumpi thuneite cihna bangin kuamah pusuak sesu nai se loin i inn sung ciah mahah tawlnga lai ni. Abei sa nipi khat lai a i om bangin om lai ni.

Bangmah ci ken cia ci in nopneh bawl kha kei ni. Leitung bup in a kihtak thu pen ei ngaihsut tawm thu tawh naupang melmawl bangin gamta kei ni.

Kidon kikepzia le kalsuanzia ding pen i theih sa tek a hih manin i gen behbeh nawn kei dinga ahi zongin deih loh pen in ei sung mah ah hih virus a ngah kha khawng a om kik zenzen leh a bei sa bangin in a min a puam a mel a sa, a khua a tui khawng pulak zuahzuah nawn dah ni.

Atawpna ah hih virus a ngahte pen mawhna khialhna nei bangin ngaihsun kha kei ni. Kihtak bawl in lipkhap bawl gawp kei ni. Mi khempeuh tungah a kilawh thei natna gilo hi a, mimal hanciamna tawh a kidal thei zavat natna hi hi. (Zatui le zato pilna lam siksan loin, thu omziate siksan in i gen ahi hi.) Lian Tuang