Christmas tangthu ~ Peter Suumpi

Christmas tangthu ~ Peter Suumpi

Lokho pa ii kum sawm gual, atapa pen om mawh mahmah hi. Amah pen azak ngei thute, amuh ngei thute -amitkha ah bawl in alungngai thei zel khat ahi hi. Adiakdiak in nipi ni Pasian’thusinna aa kigen Laisiangtho tangthu te zaknopsa in lunglut phadeuh hi. Tua ahihman in Pasian’thu ahilh siate in amah pen cinnop sa uh hi. Ahizong in tua alamdang nipi ni khat in ahileh tua a om mawh mahmah naupang pa pen hong dai dide hi.

“Bawi nang ngap lo maw?”

Tua bang aa om atapa amuh ciang in apa lungnuam lo in adong ahi hi.

“Dam mah e pa …, nipi ni Pasian’ thusinna aa hong kigen tangthu pen ka lungsim hong do gige thu khat om in um zopha lo hiveng aw”
Lungnuam lo tak in atapa in lukun sa in adawng kik hi.

• “Bang tangthu aitam maw?”
• “Christmas tangthu hi”
• “Christmas tangthu e?”
• Lamdang satak in apa in dongkik hi.
• “Himah pa…, Christmas tangthu hi”

Lungnuam lo takin naupang pa in hong dawng kik hi.

Topa Jesu in mihing suahna hong lakna thu ka uplahna pen Pasian ka simmawhna tawh akibang khinta maw le.

“Akoi teng mun um zolo na hia, Bethlehem aksipi hong suahna pen maw?”

“Tua pen bel um mah ing pa… tua khitteh mipil thum te hong pai in kham, saledi paknamtui le myrrh paknamtui letsong te pia in avabiakna uh zong sangzo ing …”

“Tua ahileh nungak siangtho sung pan hong suahna maw … nang Tonu Maria ii mawhcilna neih lohna thu asang zolo maw”

Apa in lamdang sakna tawh hong dong hi.

“Tua zong um mah ing pa … ataktak in mawh cilna neilo nungak siangtho sung pan hong mihing aa hong suahna thu zong um mah ing pa…”

“Tua ahileh akoi teng san ahia hong do gige thu pen bawi …”

“Thu khat hong dong ning pa … na khansung in hih ih khuakim pan hong pai meltheih khualzin mi khat ahizong, midang khualte khat ahizong in zintun nading hong ki-ngen leh pialo in na nial ngei na?”

“Khat vei zong nial ngei keng” Lokho papi pa in atapa ii dotna mantak in adawng hi.

“Hih ih khuasung ah zankhat giak nading innkhan ngen mi khat peuh anial ngei na meltheih innkuan na mu-ngei na leh pa?”

“Kei theih na ciangciang ah bel tua bang dan innkuan om nai kei … tua bang aa zan giak nading azong mite sam in hoih tak in zindo ding ahi, hih ahoih ngeina te hong kihilh suk sawnsawn hizaw hiven bawi …”

“Tua ahileh khualzin kawm aa naupaii nupi hiphial leh zong sangzo mah ni mateh pa …”

Naupang pa in apa thugen hong behlap hi.

“Sang zo mah lo dia bawi” Apa in aw-nem in dawng kik hi. “Ka lungsim hong do gige thu pen hih aive pa …

Maria le Joseph te in annsai ii kongkhak akiuh uh leh amau aading mun om nawnlo na kici hiven. Tua inn le tua kim aate kua mapeuh in bawngbuk sung ah Maria nau asuak ding phal hetlo ding hiveh aw. Ei inn le ei khua lam hileh bel Topa Jesu om nading innkhan om lua inteh mateh pa …”

“Hi mah ei bawi … tua ban ah Christmas le kumkhat ii nisim te ah Topa Jesu om nading ih lungtang sung ah mun khat atawntung in omden ding in ken lam-en ing ei bawi …”

Tangkona: Juan M. Flavier ii gelh “The Christmas Story” pen laigelh sia Zo (Tedim) in “ခရစ္စမတ်ပုံပြင်”ci aa burmese lai alet pen zolai in ka letkik hi. Lailet: Peter Suumpi