Christmas Lovestory ~ Francis Lamthang
Zan 12pm hiliang ta, kuamah lah daai nai peuhmah lo, zudawn ankham a ciakciak lah bei lo, X-mas lasak lah kitawlnga lo, Babylon la tawh nungak tangval lamlam lah suk semsem, khuasung bup gamlum ngeingai..Bang hang ai de maw? X-mas himawk hiven!
Tuabang a leitungbuppi guihtheih khamtheih tawh a kibual laitakin a siangtho siuseu, a mit cim kelkal, a teitang mahmah Dalpu leh Nempi pen meikhuk geiah mei awiin thulela hong kikumkum uh hi. Hih tegel pen neutunga kipan lawmta hi uh a, sangkahna zong kibangin laitan zong kikim toto uh hi. Tuakum X-mas pen mite adingin lungdamni himah taleh Dalpu leh Nempi adingin “Ngaihno mangpha” akicih hun hong tung ding hita mawk hi. Lungdambawl khit zingsang ciangin Dalpu pen amau khualam zuan a ciah ding hi ta hi. Tuakum pen tan 10 aphi kum uh hi a, Nempi tawh lungdambawl mang khawm nuam ahihmanin Nempi zotna a nial ngam lo ahihi.
Thulela a kikupkup laitak un DalpU in Nempi aw kong gennop khat om acih ciangin Nempi in bang ahitam cia a dot leh Dalpu in hici bangin dawng hi.
Dalpu..”Nempi aw nidanga kong gen ngam ngei loh thukhat hong gen ta ningh. Ka maizum tawntungna ding ahiphial zongin phamawh kei.”
Nempi.. “Bang hi mawk a hia Udal, hong gen dih ve leh.”
Dalpu.. “Nempi aw nang tawh i kimuhni a kipan tuni ciang dong ka mitkha leh ka lungsim sungah hong mangngilh thei ngei keng……..Nempi aw ken hong it hong ngai lua ingh…” hong ci ngeungau hi.
Nempi in a Udal thugen a zak ciangin amai hong khingin, a mit hong kawt a, a sawt lo in a biangah khitui hong tak suk detdet hi. Dalpu in tua amuh ciangin a anglam ah Nempi kai phei in pom hi. Nempi hong pau thei nawn lo hi. Tawlkhat sung tuabanga a kipom khit uciangin innpualam khataang nuaiah hong pai khia uh a, Nempite innka tungah anih un liangko kimat in hong tukhawm ta uh hi.
Zingsang lam hong hi ta a, huih hong vot semsem in khuazong hong dam semsem ahi tam aw Nempite lawmta zong hong ki angpom ta uh hi. Ki angpom cihciangin a zulhtat tulai khangnote dan hi lo hi. Nempi in a khitui kawmkal panin a Udalpu ento kawmin hibangin hong ci ta hi.
Nempi.. “U Dalpu aw ih neu tunga kipan a kikhawlden hi hang a, tanlang a kipan tan 10 dong, tuciang dong i kikhen ngei kei hi. Nangpen zingcianga innlam zuan a ciahkik ding hi ta, bang hunciang kimu kik ding kithei nawn lo…bang hangin nong Itna thu tu phingphing in hong gen pan mawk na hi hiam? Ken kong ngaihzawh kum tampi hi ta hi. Ahizongin numei khat ka hihna tawh bangmah kong gen masa ngam kei a, nang nong gending bek a ngak ngak ka hi hi. Bang hangin kum tuatan hong ngaksak mawk na hi hiam? Udal aw kiawi sam ciai mete..” Nempi hong kap ahih manin bangmah gen thei nawn lo hi. Dalpu inlah hehnepdan ding thei tuan peuhmah lo hi. A sawt lo in Nempi in a thugen hong zomto kik hi.
Nempi.. “U Dalpu aw..telsiam ta ingh. Na lungsim thei ta ingh. Ka khantawn a lunglen khuangaih tawh ka tul ding nong deih mana hibang thu hong gen hi teh mete…..”
Dalpu lungsim leh Nempi ngaihsutna ki elpuak ahihmanin kuamah kiho lo in dai dide uh hi. “Dai dide Zan siangtho” acihdan ahi tam aw…
Bawh-al hong khuang taikhua hong val ding hi ta..khua lah dam semsem, Dalpu leh Nempi lah kinai semsem..
Dalpu.. “Nempi aw tuma kum tulnih hunlaiin Bethlehem khua ah hisangin khuadam zaw lai ding cileng, tuahun laitak a hong suak naungek Zeisu in khuadam sa tak inciai mete…Nempi ih mailam hun ding khempeuh Topa khutsungah ap ni..hong zui o Nempi biakinn ah va kikhawm ni. X-mas missa sungah va kihel ni maw Nempi.”
Dalpu leh Nempi pen St. John Cathedral ah X-mas Missa ngai ding in hong tonkhawm uh hi…. “Topa tawh tawnkhawm leng nuam ei” cih lapi a sak khop lian loh uh hangin a tonkhopdan uh a galmuhte ading panin kitel mahmah hi. Francis Lamthang
Comment piaknop aomleh...