Naupangno leh Singkung
Naupangno khat zingsang pan nitak dong a inngei a singkung tungah kahto zel tuaksuk zel in ki mawl den hi. Tuabangin naupangno zong lungkim mahmah, singkungpi zong kipak mahmah hi.
A sawtlo in naupang in ‘kei nang tawh ki mawl cimtak ing…milim hong pia ve’ ci hi. Singkungpi in zong ‘ka gahte lo inla ki mawlna lei in’ ci in kimawlna leisak hi. Tuahiaa singkung kiangah naupang pai mengmeng nawnlo hi.
Singkungin naupang ngai mahmah taleh naupangin ‘kei nangtawh ki mawl manlo ding, ka lawm te’n hong ngakngak uh, ka nasep ding a tamtawh, nangbek na om in’ ci in nusia den hi.
Kum tawmkhat khitciangin lungkhammai tak in tangvalkhat tua singkung kiangah hong pai hi.
Singkung kiangah ‘Lawm aw, ka neulaipek pan hong it mahmah ing nong ci den hi. Ahizongin tuate gentak hetlo hi. Nong it taktakleh tuin zi nei ding ka hihmanin ka inn le lo ding hong pia in’ ci hi.
Singkung in a gah tebek tawh hizo nawnlo a hihmanin dah mahmah hi. A cihna dingdang theilo a hihmanin a hiangkhempeuh pia hi. Tangvalpa in hei tawh a hiang khempeuh satkhia in a inn le lo ding a bawl hi.
A sawtlo in papi khat tua singbul kiangah hong pai leuleu hi. Banghun peuhin a pai zongin singkungin maitai tak in na dawnden hi.
Papi pa in singkung kiangah ‘lawm, na kizat theihna lah a om hi nawnlo a, khat bekbek hong huhlai mai ve. Nasep hat nawnkengin tawldam a ka khualzinna ding gunkuang khat ki sam ing’ ci leuleu hi.
Singkung in zong ‘ka bul pi mahmah phuk inla gunkuang bawl in’ a cihbangin papi pa in a bulpan phuk in gunkuang a bawl hi.
A khualzin a sawtciangin hong ciah leuleu hi. Khualzin ngap nawnlo, nadang sep ngam ngap nawnlo a hihmanin tua singkung omna mun ah hong pai kik hi. Ahizongin a neutungpan a it mahmah singkung na om nawnlo hi.
Singkung it mahmah, ngai mahmah, phawk mahmah in tua singkung bul ah a tut gige laitak naupangkhat hong pai a, tua putekpa tungah a kahto hi.
Hih tangthutom pen, a beitheilo nulehpa te hong itna hong lak hi. Singkung pen nulehpa te etsakna hiaa, naupang pen tate etsakna a hihi. A neihkhempeuh khatbeek itsit loin hong it ih nulehpa te a hihi. A hun omlai in nulehpa itna phawksiam ni. Siamsin Library
Comment piaknop aomleh...