GZA Youth Forum ah thusunna Paper
Thu Patna: Ihun ngah lah tom peuh mahin igen ding thulu lah zailua ahih manin, atomin sut ni cih ong gen masa nuam ing. Gamvai leh ki-ukna vai (Politics) cih ciangin leitung mihingte’khuasakzia khempeuh tawh akisai ban ah nisim nuntakzonna, neekzonna ah mihingte ikizopna khempeuh politics nuai ah aom ahihi. Leitungah mihing a omlai teng buaina (problem) om ding aa tua mihingte’buaina alemtuah ding leh kisapnate akicingsak dingin politics kisem ahihi. Na khempeuh kizom dimdiam tek(inter-related) aa, tua khempeuh abuptuah in politics ahi hi. Lamgei ah mehteh mehgah azuak nupinu leh anbuukah an ahuan nupinu zong gamthu hoih kei leh sukha veve hi.
Politics hoih kei leh pilna sinte in zong angah zah ding uh hamphatna vanzatte akipan pilna ngahzolo uh aa, nasemte in zong nasemta leh asepzah un thaman ngahlo uh hi. Papi khat in atate sang akahsak zawhlohna, an akhamhsak zawhlohna pen politics hoih leh sia tawh kisai mahmah hi. Zawnna leh tualniamnate zong politics ahoih loh man mah abulpi hizaw hi. Biakna, ngeina, pilsinna, nasepna, sumbawlna, nuntak khuasakna ah kideidanna leh apilte in apilna bangin thaman hamphatna angahna leh angahlohna pen gamvai leh gam ki-ukna hoih leh hoihlo tungah kingah hi gige hi.
Gamvai leh ki-ukna ah panlakna leh gualtung tuanna anei minamte in gamkhat a ut bangbang un zeek thei uh hi. Tua ahih manin, gamthu leh ki-ukna athudonlo minam leh gamte khangtolo in mite nuai ah ong den tawntung uh hi. Tua hi aa, ei khangthak Zomi momnote in politics ah munluah in ithudon ding kisam mahmah ta hi. Politics I uuk kei aa ikin kei leh mite khutsung kitung ding hi. Mihingte in hong piangsak Vanglian Pasian piaksa ipianpih suahtakna, hamphatna leh mihing bangin vaangnei takin inuntakna dingin gamvai leh ki-ukna ahoihloh phamawh hi. Kipawlna tuamtuam, gtna: GZA, Zomi siamsin, ZYA, TYF, ZNCM te zong politics nuai ah a om hi aa, biakna sia makai I Pastor te zong politics nuai ah a om uh ahih manin, politics hoih kei leh hih bang kipawlnate kineitheilo ding hi lai hi. Politics akhiatna atomin gen leeng, mihing omlai teng buaina om ding aa, tuavai khempeuh politics tawh kisai ahihi cih leh ahitheilote ahithei dingin lampi sialna pen politiciante’ nasep hi cih gen nuam ing. Tua ahih mani, an na neek aa buan na silh naak leh nainggnanzayy tawh kisai na hi aw!!!
Kawlgam Tangthu Tom
I gam in gambup thukhunpi(constitution) buli kinei ngei khin hi. Suahtakna ngah khit 1947 gambup thukhunpi(Kawlte’ aituamphattuamna ding kigelh ahih manin one group show) khat kingei hi. 1974 gambup thukhunpi pen Burma Socialist Programme Party gualtung tuanna ngiat ding kigelh kinei ahih manin (One Party show) kici leuleu hi. Tutung aa izat 2008 gambup thukhunpi leulelu ciangin mimal khat aangsung aituam phattuamna dingin kigelh hi ngiat ahih manin (One man show) cin thukhunpi siam mipilte(consitutionalists) ten minvawh uh hi. Tua hi a, hih 2008 thukhunpi tawh kikalsuansuan lai ahih manin, kuakua in kumpi sem ta leh Democracy kingah nai paklo ding hi.
Nung abeisa aa kibawl 21st Century Panglong Khawmpi khit ah damdamin lamlak (political roadmap 7) zui-in NLD kumpi in ong paipihsawm laitak hi. Adiakdiakin gambup makaipipa (President) pen gambu lutang leh gamuk kumpi makai himah ta leh ama thuneihna pen kiciangtanin galkapte’tuamdang thuneihna(veto power)hangin muibunzo nailo hi. National Deference and Security Council member (11) thukhensatna bek tawh gambupvai athupi tatak teng kivaihawm thei pan ahihi. Galkap lam pan mihing(6) leh kumpi lampan mihing (5) meetang atamzaw khensatna tawh thutatak kivai hawm thei bek hi. President in thugin tangkona (state of emergency) neilo hi.
Igam pen minam tuamtuam teenkhopna (multiculturalism/multi-ethnic country) hin ki-ukna vai ah State-nation tawh kikalsuan ding kimlai gamkhat ah minam khat bek atam teennate’zat(Nation-state) tawh ong paipih uh aa, kibelpawlna gam (Union) kampi bek tawh cici napi’n un atatak ah mimal tamzaw khat minamte kalsuanzia(Unitary state) kikalsuan ahih manin tudong hih dinmun kitung hizaw hi. Presidentialism ci napi un kiteel ciang lah Parliamentary gamte zat general election kizangh zel aa, Presidential election lah kizanghlo zel hi. Cabinet minister teng akoih uh ciang lah Presidential danin hih gawp zel uh hi. Tun zong cikmah hunin aom ngeilo State Counselor cih bang ong om zel hi. Leitung political scientist minthangte na ngawn alung uh amzo liang hi. Tulaitak NLD kumpi bel gamthulam kantel pawl(political commentator/analyst) ten lah akhauhluasamlo lah akhauhsim giapgiap gamukna (liberal authoritarian Democracy) kumpi ci’n minvawh phot uh hi.
Zomi leh Zogam vai mailam ading lunggulhna 1: Zogam leh Zomi icih pen koi ciang huamsak tatak ding ihihiam? Zomi leh Zogam cih leitang ciangtannna leh hilhcianna (definition) khat Zomi bup deihna leh mailam saupi ngaihsutna tawh Zomi Khawmpi (Zomi National Conference) khat tungtawnin khensat aa Zomi bup deihna lakna(referendum) khat bawlin khensat leeng kimazang leh muibun pen dingin ngaihsun ing. Kawlgam lam om Zogam cih ciangin, tulaitak Chin State bup huamsak takpi ihi hiam? Aih kei leh, tulaitak Tedim, Tonzang leh Cikha townships leitang teng kipsak ding ihi hiam? Aih kei leh, tulaitak Tedim, Tonzang, Cikha townships leh Kalay-Kabaw Valley teng huamsak ding ihi hiam? Aih kei leh tulaitak Chin State teng ci ding maw? Chin state leh Kalay-Kabaw Valley teng Chin State(or) Zomi State aa laih sawm? Teel ding nam(4) nei hihang… Tua khensatna pen mimal khat satna, party khat policy leh biakna kipawlna khat pepeuh in khensatlo-in, Zomi bup deihlakna(referendum) bawlin tua tungtawnin kalsuan leeng imailam himialmual nawnlo pah dingin, itupna leh I tungnopna kimucian sitset pan ding hi. Tua thukimna pen mipi in Zomi makaite’tungah phalna leh apna piakna (legitimacy&mandatory) hipah ding hi.
Tua bang minam khensatna pan ilampi ding sialna (strategy) leh ilampi totzia ding(tactics) kigeel cian thei pan ding hi. Tua pen Zomi bup minam vai leh gamthu ah ilamlakpi (Zomi national&political roadmap) hong hiding aa, tua pa/nu in hih bang gen hi cihcih hinawnlo dingin, mipi zong tua lampi zui-in tangtakin taithei pan ding ahih manin, mimal khat bulphuhna(charismatic movement/personel cult) bei in minam mainawtna muibun in mazang ding hi. Naakpi takin kikum ngelhngelhin Zomibup thukimna ( Zomi national Agreement) zui-in Zomi national vision khat nei thei in, tua tungtawnin ilampi ding leh thugui let ding (strategy & policy) tawh kalsuan leeng kitung baih ding hi. India lam om Zomi te in zong amau Zogam ahuamsakna uh Manipur gam sung teng India gamsungah leitang ciangtanna kician khat na nei phot ding uh aa, eimun ciatah akilawm ciang dinmun itun tak teh adang lampite ahunzui-in zon tohtoh ding hizaw hi. Tua bang ahih kei leh ngim neimello in huihlak akapkap tawh kibang bek ding hihang.
Lunggulhna 2 : I gam zong damdamin ahoih lam ah ong mainawt tohtoh zenzen leh asawtlo-in Democratic Federal Union ah akikalsuan theihna dingin 2008 gambup thukhunpi ong kipuahzo zenzen leh I Zogam pen tu dinmun mah ah munuam ding ihihiam? Tuzawh kum(30) teh iminam igam koici lam ding ihi hiam? Tu bangin a liim(design) geelkholh hun mahmah ta hi. Isanggam mualtungmite’n amau deihna bangin a gamliim ding uh suaihsa neikhinzo ta uh hi. Tua ahih manin, tua bangin kikum tangtangin, I Zogam adingin(Zogam thukhunpi) State Consititution gelkholh hun ta hi. Isanggam Laimi lamte in Chin state consittution ding ahampi(2)vei bang apuahna uh hita hi. Zomi State consittution drafting committee bang neih huai mahmah ta hi. Federal ukna tawh kipai leh Union leh State ah thuneihna kiciantakin kihawm ding aa, eima State tekah zong State bup zatding pautaang(common language/official language) kisam ding ahih manin Chin State bup ah Zomi mintapnei, kamphenkullo 25% bang pha ihih teh thutampi geelgeel huaita hi. Federal Ukna tawh kikalsuan leh gambupah official language (3)bang kinei ding aa tua pan ah State khatciatin amau minampau zong a State vuah zangh thei ta ding uh hi. Gtna:gambup ah Myanmar, English kizangh thei kim ding aa, Member state khempeuh in amau State sungah azat ding uh pautaang khat kiciamteh ding hi. Federal Ki-ukna tawh pai le hang Zomite tawh bangdan Federal ki-ukna kituak pen ding ahi hiam? Asymetrical Federalism/Centalized Federal(India,Belgium, Spain) kituak zaw ding ihiam? Aih kei leh America te Federal danin phualpi pan thuneihna khiapna(decentralized federalism) tawh ikituak ding hiam? Gambup ki-ukzia (government system) zong Parliamentary System tawh Zomite kituakzaw ding maw? Presidentialism tawh kituakzaw ding? I gam min ding pen minammin zuisak ding maw? Igam leitangmin tamhsak ding(ethnic-based state(or) geographical state) hih ding? Cihte mailam ading kikuphuai mahmah ta hi.
Adiakdiakin, Zogam dingin tulaitak Tedim, Tonzang, Cikha huam teng ding bang hileeng, gambup constitution sung pan ingah theih ding hamphatna ei leh ei kivai hawmna koi bang ciang dinmun ngahzo leeng hoih pen ding ahihiam? Federal Union nuai ah ki-ukna adawldawl nam(6) bang om thei hi. 1. Union, (2) Member state, (3) Autonomous region, (4) Autonomous Areas, (5) National Area, (6) Native title cih bangin kikhensuk diudeu hi. Gambup Innpi (Union Assembly) leh Member State bek in thukhun bawl theihna nei uh hi. Union in Sovereignty Power aneih ban ah Member state teng in zong thukhun bawl theihna thuneihna (domestic sovereign power/internal self-determination) nei hi. Tualo teng Member State nuai ah hi. Ahizongin, Union tawh direct kizomin, thuvaihawm theihna tuamtuam om thei veve hi. Tua hileh ei koi dinmun hi ding ihi hiam? Koi tawh kituak pen ding ihi hiam Zomi bup khensatna kisam hi.
Lunggulhna3: Zomi tampi tak kumpi nasepna mun thupite iluahzawh nadingin, thasankik leh hanciamkik huai hi. Gambup thukhenzum lam, pilsinna zumte, galkaplam(airforce, navy), police force lam, cidamnazum lamte ah zalianpipi nei le hang, gambup hauhna igam ilei ading kizeek ziahziah thei ding hi. Kawlgambup kalsuanzia ding lamsialte(policy maker&stragegists) lam dong leh department tuamtuamte ah mipil dinmun (scholar)isuahzawh nang munthupi diakdiakte iletzawh nang lunggulh huai mahmah hi. Tua bang hileh mimal itawm mahmah hangin ikhutsungah Kawlgam nopsakna, hauhna kizeekkhazo pan ding hi. Zomi min tawh political party khat peuhmah athahat detna ding leh Kawlgambup ah Zomi minpua MP ong omzawh detna dingin kipawlna phuahphatna(institutionalization)bawl zelin, athahat semsem na dingin akisam siamna(technical support) piaktheihna lampi zon ding ahihi.
Lunggulhna 4: Zomi sung kipawlna tuamtuamte in ahih leh mipi amitkeuhna dingin pilna piakna(capacity building) khuakimah neihzawhna ding lampi zon aa sepkul ding hi. Gammi hoih leh Democracy ki-ukzia ngeina(democratic culture) ineih theihna ding, khua leh tui, beh leh phung, biakna pawlpi zui-in kigimneihna leh mittawsialkhau letna(stereotye&prejudice) abeitheihna dingin Zomi cih minampi lungsim a om theih nang nuntakzia(civic education) te Zomi nautang sungah akizalh theihna ding panlaak hunta hi(gtna:ZYA, TA, Zomi Siamsin, GZA) cihte… Zomi sungah gamvai minamvai leh biaknavaite(politics&religion) amau mun ciatah kihualkimin atonkhop theihna ding pilvangtakin kalsuan kul ding hi.
Lungulhna5: Zomi sung kipawlna khempeuh in atawntungin mimal hamphatna(personel interest) sangin, akipawlna thahatna dingin nasep khopsiamna lungsim(team spirit) aneih ding akisap ban ah, kipawlna hamphatna ding sangin Zomi Zogam hamphatna, khantohna ding(Zomi national interest) masakin minam tungah acihtak ding kisam pen ding hi. Minam sungah gamvai leh biakna makai semte in zulhtatna golhgukneekna(corruption) a om leh apholhkhia ding leh mipi atheisak den ding thukizakna(media) kician leh a encikden ding kipawlna (watch dog) tampi kisamlai hihang. Tua bang hikei leh makaite simtatna gam-le-lei hamphatna ding azong mi om thei tawntung ahih manin, amaute a encik, acingding kipawlna tuamtuam(institutions) neihkul hi. Mihing pen thu nei leh paikhial thei(when people are in power, they are corrupt) zel ahih manin akisaikim ding( check and balance) Zomi sungah kisam hamtang hi.
Thugawm Khopna
Gamvai sepna, kumpi sung nasepna, minam ading ameet omlo aa kipawlna tawh mapang kipawlna khempeuh amau mun tekah gamtangin akisapna munah minam hamphatna ding leh mailam ading akalsuan diamdiam loh in minam khat leh gamkhat khangto theilo hi. Minam khat leh ki-ukna athahat nadingin, CSOs te athahat loh in minam khat leh gamkhat khangto theilo hi. Tua ahih manin hih hun panin Zomite’ mailam koici bangin kalsuan ding ihiam cih lamlak(poltical&national roadmap)kician khat mipi tungah tangko khiat ding hun hita hi. Minam ading na hoih gengenna panin nahoih sepna ah paita ni cih tawh ka thusun hipan ka hial bawl hi.
Vekpi tungah Lungdam mahmah e!
Thusung: Bob Tuangpi 22.10.2016, Yangon.
Comment piaknop aomleh...