Kisiknalo tawh mawhna maitheilo ~ Suangh Dal
Khrih in zong ama thu-in mawhna mai sak lo hi. “No hong bawlsiate na mai sak un” ci loin “No hong bawlsiate thu na nget sakun” ci zaw hi ( Mt.5:44)
Na sanggampa uh hong khialh leh na maisak un ciziau loin “Amah taii unla a kisik leh a mawhna mai sak un” ci pan hi. Kisikna a om keh mawhna mai thei lo hi. No repentence no forgiveness.
Tuhun ah kikhami sak ci ding maw ahihkeh meidawi vai ci zaw ding maw ahihkeh a LST theihna dai lua lai cizaw ding maw hong bawlsiate in hong thum nai lo pi-a ka mai sak uh hi cih khat kizang mahmah hi. I lang khatte’ thumna kisikna ngak lo pi-a eimau thu-a mawhna ka maisak cih pen Jesuh zia le Lai Siangtho tawh kituak lo upna ahi hi. Kisikna a om keh mawhna mai thei lo hi. Khrih mahmah in zong kisikna om lo pi-in mawhna a mawk maisakna om ngei lo hi.
Ahi zongin eitungah hong khialte in hong thumin a kisik leh maisak loh phamawh hi. Kisikna thumna tawh ahihnak leh bel nikhat sungin sagihvei ciang dong hong khialh hang in a sagihvei mah-in ka kisik hi hong cihnak leh mai sak khit ding ahihna LST sungah kimu pah leuleu hi (Mt.17:4).
Thumaan lopi-a hong liamsak mi khat in kisikna tawh hong thum kei leh a mawhna na maisak theih nading thu om lo hi. Tua bang i genteh va mudah ding va thukkik ding va el viuveu den ding cihna hi lo hi. Mawhna a bawl mi khat kisikna a lah keileh mi mawh lo banga va koih ding hi lo cihna hi. Kisikna lak lopi-a mi gilo khat mawhna maisak pen a mawhna a selsak hi-in thumaanna lei sungah a phumcip hi-a thu-ummite zia ding hi lo hi.
Thu-ummite’ zia pen thumaanna le dikna a om nadinga a kiphumcipte tawhkhiatna pholhkhiatna tawh thu hoih tak khen den ding hizaw hi. Kisikna om lopi-a mawhna maisak cih pen dikna le thumaanna ii hong kalh thute a nuntakpih lo gige cihna hizaw hi. I langte in hong thumna le kisikna a kisapna pen i tual sung hoih nading hi-a lang nih tuak ading a hoih zaw kanlai thu ahi hi.
Hong thum nuam khat sang lo-a ka maisak sa uh hi na cih leh Jesuh zia le LST hong hilh zia a tel nai lo na hihna kisit phat huai zaw hi. Kisikna lak nuam-a hong thum dinga hong kuan nuam khat va sang lo cih pen a maisak lo hi gige zaw hi. A heh lua a maisak zo lo lua hi zaw thei-a langkhat te kipuah kikhel nading thu a guan lo tawh kibangin hoih lohna a thapia tawh kibang zaw hi. Hong thum nuam khat va san ding kithum sak ding ahi hi. Thuduhna hi loin kithumsak pen thu duh loh sawmna hizaw hi sanggam.
LST sungah Pasian in thumna le kisikna a om lohna mun ah mawhna a mawk mai sak hiam? Maisak lo hi. Ahi zongin i mawhna kisikin i thum leh hong maisak dingin amah citakin thumaan hi (1 John. 1:9). Christian te zong tua daan ding hi.
Thumaanna le dikna a khualna hangin kisikna pen LST in hong kalh thu hi tawntung hi. For the sake of righteousness repentance is always required.
Mi khat in sisan hong luang sak napi in hong thum keileh va mawk maisak ding hi lo mahtaleh thunget sak ding hi citciat hi.
Mai sak thei cih leh thungetsak thei cih kibang lo hi. Mai sak theihna thu khat om a tua pen a kisik leh maisak thei kici hi. Thungetsak thei cihteh hong thum hong kisik takeh i galte nangawn thu nget sak ding cihna hi. Kong maisak hangin ka sungah beli tang cia om lai hi cih mawk pen kisikna maan le kimaisakna maan kibawl nai lo cihna hi zaw kha ding hi.
Eite in mawhmaisakna khuan i neih loh hangin Pasian in a mawhna a maisak theih nadingin thu kinget sak thei hi. Eite kutai a maisak theihna khuan pen hong khial pa kutai-a kisikna tawh hong thum leh maisak thei hi hang.
Topa Jesuh in zong a mah a that te mawhna ama’ thu-in maisak thei lo hi. Banghang hiam cihleh amah a thatte in thumin kisik lo uh hi. Tua ahih manin “Pa aw amaute in bang hih cih thei lo ahih manin a mawhna uh na mai sak in” ci-in thu ngetsak bek hi ~ (Lk. 23:34)
Mikhat mawhna na maisak nop taktak leh hong thumna sang in. Kithum sak in. Hong thum nop kei leh thunget sak in. Hong thum kha ding hi. Hong kisik kik kha ding hi. No repentance no forgiveness! Kisikna thuumna lo tawh mawhna mai thei lo hi. Evan. Suangh Dal
Comment piaknop aomleh...