Hih late zakik nuam tak ing ei

Hih late zakik nuam tak ing ei

Ka neu thu mangmawh, kum 11 kaphak, 1976 kum March kha kipat lam hi. Tedim pan Tonzang lam ka nu leh ka u tawh Jeep khat tuang in ka pai laitak un, Tungtuang khen’ Tonzang gal lamphei munkhat ah ka mawtaw uh ong sia citciat hi.

Nitak 7:00pm pawl hita a, khua mui, mial lua taktak nailo hi. ( Tonzang pen khuagal lam ah nitum ahihman leh khuakhal ni sau laitak ahihman in khua mialhak zawdeuh hi ).

Mawtawte buai mahmah laitak BBS ( Burma Broadcasting Service ) pan Zohun ong pai hi. Zohun pen Laizo pau tawh kikhah hi a, kanu’n Laizo pau (Falam pau) thei ahihman in thuthak theihnopna tawh ngai thei zel hi. Ko bel news manciang a ong pai ding late zanuam in radio um tiltel thei pahpah hi ung. Radio, BBS pan Zohun ahih nak leh kuamah gamlum theilo.. hilian hi.

Tua ni in, mawtaw bawl ngakkawm in kanu leh ka u tawh koteng bel radio ngai in tu lingleng hi ung.

News manciang …

– la a masa pen ” Go Khaw Pau’ sak…. Hambang huai siam, Sen a tunnu”.. ong pai tautau, ngaih salua, zaknop salua, khuasik mul tho liang in ka ngai uh hi.

– Tua khit ciang Falam la, Khalkha la.. cihte dawng 2 khawng ong pai a,

– tuateng khitteh ” Theu Mang Za Suan’ sak …. Tung sunni lenmual dawn pan hong suak ciiciai a……… …… lalala, pianna Zogam lungnopna dim hen, nang le kei tang bang dam in khan kumkhua sawt tahen..” …..

A ngaihdan bel, kum 40 cin’ khit, tuni dong bilkha ah ging tautau lai hiven! Ka khan sung ka zakngei la khempeuh lak ah ngaih sapenpen ing. Radio “Zohun” pan ong paikik ding a kingak ngiungeu himawk… tuhun hileh, lehpei kik, repeat kik ziau thei mah ding hiveng.

Khatvei zakik nuam tak ing ei..
“Hambang huaisiam, Oh.. Sen a tunnu aw “..
“Tung sun ni lenmual dawn pan..
Pianna Zogam lungnopna dim hen…”

NB: lamal nei a om leh ong pia thei le uhteh nuam mahmah ning. Pau Khat Suan