Malaysia, Kluang ah Passenger tuanna meilengkhat meikanggawp

Malaysia, Kluang ah Passenger tuanna meilengkhat meikanggawp

Malaysia gamsung ah mihing Passenger apua KTMB meilengkhat meikanggawp cih Bernama pan kiza hi. Tua Passenger Train pen Kluang khuagei aom KM1 Jalan Renggam – Kluang ah mei akang ahihi.

Meiphelh thunei ahi Kluang Fire and Rescue Station operations chief Akob Sidek in agenna ah zannitak 8:21pm hunpawl in KTMB (Keretapi Tanah Melayu Berhad” meileng khat meikang ci’n hongki zasak hi ci’n genkhia hi.

Tua akizaksak phetin meiphelhding in Fire Engines 3 leh Firefighter mi 11 in aphual ah delhkhiapah uhhi. Meikuang pen zanlam 8:54pm hunpawl in ki phelhsiangthei a, 9:37pm hunpawl in Operation ki mansiangthei hi ci’n genkhia hi.

Tua meileng pen “Megat Terawih 24125” hi a, alulam Locomotive tengah meikang in, 50% bang mei kanggawp cihi.

Meileng alulam meikat akitheih ciangin akizopna ki phelkhia in, khualzinte tuanna Passenger Coach te kiphelkhiaman ahih manin, asi aliam kuamah omlo cihi.

More: Kuala Lumpur khuasung ah “KTMB Cargo Train” vanpuakna meileng khat tuahsia

Meikatna ahangpen thunei te’n kanciansan uh a, bangmah kitheinailo hi ci’n thunei te’n genkhia uhhi. Hih meileng pen Johor Baru panin Gemas khualam azuat laitak in lamkal ah akanggawp ahihi. Sawltak #zomidaily