The Miller of the Dee ~ Hau Za Cin

The Miller of the Dee

by Charles Mackay (1814-1889)
Dee lui gei ah a cidam a thahat
Ann gawina nei mi khat a om hi
Zingsang pan nitak dong na sem in
Amah zaha lungdam lasa omlo hi
Ama lasak a lungdamsak pen thu
A laigil a deihpenpen in,
“Ken kua mah englo,
Kuamah in kei hong englo!”
Cih ahi hi.

Kumpi Hall hong pai in,
“Na khial hi, ka lawm aw,
Nang hong eng omlua hi”
“Ka lungsim nang bangin suakta ding hi zenleh
Nanga tawh kong khek nuam hi
Hong gen in, bangin lungdam
Lungnuam in la hong sa sak hiam?
Kei kumpipa hi napi,
Dahna tawh kidimin,
Dee luipi gei ah ka teeng hi.”

A lukhu la khia in hong nui a,
“Ka nek ding ka ngah a,
Ka zi ka ta ka it a,
Ka lawm ka gual ka it hi.
Leiba thangba ka nei kei a,
Ka ann gawina a pei
Ka ann nek ding hong gawisak
Dee lui hangin ka lungdam a,
Tua in ka lung hong damsak hi.”

“Hoih hi, ka lawm it aw,
Lungnuam takin na om in,
Kei na pai ta ning.”
“Ahi zongin hih bangin na ci nawn ken,
‘Kua mah in hong englo hi’
Na lu tunga buhvai,
Ka kumpi lukhu zahin manpha a,
Na ann gawina pan na ngah lungnopna,
Ka kumpi gam sum khempeuh tawh kilei zolo hi.
Nang banga mi lungdam te England gam hauhna hi,
Dee luipi gei a ann gawipa aw!”

(My free translation. Zolai tawh kong teikhiat pong hi)

Kuppihna: Lungnopna i cih pen leitungah sum leh pai hauhna, min leh za hang na hi masa hetlo hi cih hih Dee lui gei a ann gawipa leh England Kumpipa Hall kihona panin i mu hi. Lungnopna taktak pen eima nuntakna ah kingazaw a, i hihna ciangciangah lungkimna pan kingah hi. Innkuan ki it diamdiam-a omna, sum leh pai leibat neihlohna, lawm leh gual tawh kikholhsiamna, eima nasep khat peuhpeuh nuamsa, huaihamna leh duhhopna neilo cihte pan lungnopna hong pai hi. Lasiam Dolly Parton “Coat of many colors” banga puan kilawm na neih hangin lungnopna na nei thei veve hi. “Lungdam ing Topa Na thuphate hangin (Thank you Lord for your blessings on me)” cih la bangin na ngah thupha khempeuh hanga lungdam koh tawntungna panin zong lungdamna na ngah thei hi.

Christmas lungdamna nang leh na innkuan sungah hong tungta hen, like The Miller of the Dee.

Hau Za Cin
Phuitong Liim