Zomi bup tungah thu zaksakna ~ Dr. Pau Khan En

Zomi bup tungah thu zaksakna ~ Dr. Pau Khan En

I biak i paai Pasian thupha hangin leitung buppi ah kikhenthaang a, a om Zomi khempeuh tung itna tawh thu kong zasak hi. Na omna munmun uh ah i Pa Pasian in lei thupha, van thupha tawh hong tuam ta hen, ci-in thupha hong paih masa ing.

1. Leitung bup Zomi Kipawlna (GZA) tawh kisai-in 2010 November, Kum Zacin Pawipi pan a kipanpan hi-a, khangtawn kipumkhatna ding leh nasep khopna ding i tup i geelna ahi hi. Ngimngim geelgeel phot leh kikupkup phot kul ahih manin tutawmin bangmah kisemzo nailo hi.

Hong tung ding December kha 14-18 sung Kalaymyo a i bawl ding meeting panin geelkhawmin sepkhop i kipan ding hi. Tua pen sep khiat kipatna (kickoff program) ding a i geel ahi hi. Tua ahih manin Zomi it Committee member khempeuh aw, peello-in nong kihel zawhna dingun hong hanciam un. A kipan cil i hih manin sumbei paaibei hong kisikh zolo ding hi. Ahi zongin Zomi a ding, nang leh kei in hum sam khau phel liang mahin hanciamin tukhawm, khawlkhawm a Zominamte mailam ding i geelkhop kul ding hi. Hong hanciam hamtang in.

2. Kum dang sangin tukum in tuuk guah hong tamzawk manin i Zogam ah mincim, khuacim, inncim, locim tampi om a, i minam pihte in gentheihna thuak uh hi. Lei (bridge)tampi kisia hi. Lamcipna hangin Zaang leh Kham kikawmna haksa-in, tua in neek leh dawn hong haksa sak pah hi. I Tedim khuapi ah meitaang lo-in tui kingah lo-a, guahtui bek kimuang zen hi. Khua tampi ah inn kisuan uh hi.

Tu ciangciang ah kua Pawlpi, kua Pawlpi cilo-in khawmpi (sivuai) zindo pawlpi peuhpeuh tuuk limtun in ankhing kham uh hi. Teci pan’ taak ding thupha sangkim uh hi. Zomi bup in lungdam thu hong tun Kum Zacin Pawipi (2010, November) i khaam khit 2011 kum sese-in banghangin thupha saang hohlo-a, hi bang teng tuak sese i hi hiam? Ka telzo kei hi. I minamte thuakna nasa-in ka dipngek ana hi. I biak Pasian in bang deih hi ding hiam? Ki-awi ka sa hi.

Ahi zongin i biak Pasian eite siatna ding vai a hawm ngeilo leh a geel ngei peuhmah lo, i Topa ahi hi (Jeremiah 29:11). Amah in eite telzawh loh, eite hoih zawkna ding khat teeiteei hong neihsak ding hi. A sangzaw leh a thukzaw hong hilh nop ngel khat hong nei hi thawhthawhin ka um hi.

Tua kawm mahin Zomi a it Zomi u leh nau khempeuh aw, gentuak i minam pihte mangngilh kha kei ni. Na tuntun, na omomna mun panun gentuak dongtuak i minamte mu khat pe khat mah tawh hong panpih veuveu un.

Singapore a om i Zomi pihte in ahih theihzah-un hong hanciam uha, ka lungdam hi. Thupha sanhuai ka sa hi. Gentheih hunin panghuan dih ni. A tawm a tam cilo-in Zomi lip panghuan dih ni.

3. Pasian thupha tawh Zomite kihawhhawh, sadaih (Post Office) ah lai kikhak kul nawnlo-in Information Technology (IT) tawnin Internet tawh i kiho thei ziauziau hi. I lungdam hi. Ahi zongin i zatdan i siam ding kisam ding hi. Bang hang hiam cihleh i laigelhte tungtawnin mite in i manphatna (value) hong seh uh hi. Mi a pilte in mi mawk koko lo uh hi. Mi a ciimte in mi mawk phinphin lo uh hi.

Mi a picingte in mi diksak loh dingin kampau lo, lai-at lo uh hi. Mimal khat, mihon khat leh pawlpi khat in na a sak ding leh a sinsona dingun phin lo uh hi. Tua bang ahihte pen mi picing lo leh, media pen tagah nawimuh banga a zangkhialte ahi hi.

Kidawm mahmah ni. Pasian hong piak thupha zang khialkha het kei ni. Topa Pasian in na omomna mun uh ah hong cing hong kemin, Amah leh na Zomi bup ading thupha-in hong zangkim ciat ta hen! Itna leh thungetsakna tawh, Dr. Pau Khan En