Suahtaakna ih zuunsiam tatak hiam – Can we really handle freedom?

Suahtaakna ih zuunsiam tatak hiam – Can we really handle freedom?

Lungsim suahtaakna pen ei khatciattung ah, kinga phadiak himahleh, pumpi suahtaakna bel a thutuampi a hihi. Eithukimpih lo-in midangte’n ih lungsim hong hencip zolo a hihna dungzui-in, ei leh ei bekmah kihutkhiat kul hipah hi. Pumpibel ei thukimpih kullo inzong hong kihencip theilel hi. Lungsim suaktatlohna in pumpi nangawnzong, sihna hongtunpah keizong in, gilbeem hong tunthei hi.

Suahtaakna a ngah veve, kepzia leh zuunzia pen gamkhat leh khat kibang lo hi. Pawlkhat te’n gammite thupisak uh aa, a langkhat ah mimal angsung a thupisak om cih ih theiciat hi. Tua hi-in, British Empire pan suahtaakna ngah veve, USA, Singapore bang gamte leh Zimbabwe, Kawlgam cihtepawl kitehtheilo leuleu hi. Bang in kilamdangsak hiam cihleh, suahtaakna-zuunsiamna dungzui na higige hi.

Ei khatciat ih nuntaakna leh kikhuasakzia zong, ih suahtaakna ih zuunsiamna leh kepsiamna tung ah tampi kinga hi. Mimai ah ih gamtat-luheekna kantan-in, kuamah muhlohna, eiguak ih omciang’ ih ngaihsutna leh gamtatna pen a thupizaw a na hi hi. Tua hunciang-in ih suahtaakna bangci zatsiam cih hong kilang zawdeuh hi.

Gamtatna leh kampau tawh a kilakkhiat masiah, utbangbang ki ngaihsut thei aa, zong hong kikhaam theilo hi. A hizong-in, a diklo gamtat luheek leh kampau hoihlohna pen ngaihsutna a hoihlo pan, hong pokhia theideuh kici hi. Tua hi aa, kua mah in hong thei keitah ci-in, hongsuak bangbang ngaihsut huailo hi. Sialehpha khentel theihna in, a uk kul hi.

Sialehpha khenteltheihna (conscience) leh suaktatak aa deihteeltheihna(Freedom of choice) pen pianciil pek in, a kingahkhinsa cih ih upna ahihi.

Tua hi-in, ih telkhakloh hang’ pianpih suakta tak-in ngaihsut theihna, ki neiciat hi. A hizong suakta tak-in pulaktheihna leh gamtat-luheektheihna pen teenna gamlehmun zui-in kingahkim lo hi. Theihciat hilel ci-in, mipiicing nailo khat, kikhahzau samlo hi. Naupang temhiam-piak tawh kibang ding a hih man-in, hongbawl hong Siampa’n zong eitawh a kituaklo khat hong pialo a hihi.

Itna zong tuamahbang in, mikhempeuh itding kikhaamlo napi, lakkhiatdan siamding’ a thupi a hihi. Suahtaakna bangmah-in, it-khialh ngaih-khialh, it siamlo cihbang a om thei hi.

Itna leh suaktaakna pen thudang khempeuh sang-in, zuunsiam ding’ kisam phadiak hi.

Kawlgam pen gaalkaap uniform tawh a ki-uklai-in gambup-in thongsung ah a omtawh kibang hi. Suaktalo-in, heina khempeuh ah ih kidawmtek hi. A tamzaw in gampua-pusuahding bek kingaihsunsun hi. Khumcip kuamah ih ut kei hi.

Tuhun ciang, thongkong kihong ding’ kipan diaidiai pen, tagah nawimu bang-in ki diang heethaat nuam hi. Kiim leh paam ah thautang leengleeng lai a hihlam, kiphawklo, kiza khalo thei hi.

Antah in hong kineipakzong hithei hi. A hizong, hunhoih in ngaihsun aa, suaktaakna diktak ih muhnading’ lawmhoih leh panmunhoih zonhun a hihi. Deihlohpen hunsia khat in hong nawk-kik leh, thu baihlo, nanbaihlo ding a hih man-in, ‘Buipi leikei inzong khuangai’ ih cih paunak phawkkawm in, kidawm-aa, maikhuat ding a hihi.

Tukum gambup kiteelna mitsuan in, thuhoih bulphuh mitampi a ommahbang inzong, a beisa ah vawhlo semlo na-pi’ ngiabang in, ankhing buluhnuam, anla-nuam pawlkhat zong hong kipanthei ding a hihman-in, pilvangna kisamta hi.

Ih suahtaakna mi-ap khazeelte ih hihloh ding ngaihsun in, a pua-tham leh a sungthu khenteltheihding thupi hi. Siingkuang leh aikuang khekkha nawn kei ni. Mikhat, pawlkhat noptuamnading bek in, mipi saltansakden ding’ ki-awihuai nawnlo hi.

A tawpna ah, suahtaakna pen eisung ah a omsa hi-aa, ih hinsak tawntung nopleh, kep leh zuunsiam, huaisiam ding bek hita hi. Nantal’suan (Mangkaang khutpan-in Kawlmang khutsung ih tunni January 4th phawkna tawh)