Marn (Photo) ~ Peter Suumpi

Marn (Photo)

Alex pen aminthang journalist khat ahihi. Africa lopate (ahk) Amazon gammangtu lak sung ah pai in Discover channel aa ding thu avakan ding cih pen Alex ii alianpen ah lungtup ahilam azi ahi Julie in thei hi. Tua ahiman in naupangthum ii nu ahi Julie in ahun tampi te a innkuanpihte aa ding in zang hi. Atate pattah in innvai lovai zong avankawm in apasal Alex ii nasepna te daitak in tha apia hi.

Amau ii kitenzawh uh kum 10 acinna pawi ong tung dektak ciang in Alex in ama zaih marnte lahkhiatna khat nei hi. Mite lamdang sakpi pen in omdan atuamtuam tawh nungzang marn veve ahihi. Tua marnte pen atut laitak, adin laitak, anasep laitak, atawl ngak laitak cihdan khawng zong om hi. Tua marnte pen post modern pilna zangin akibawl tawh kibang hi. Marn sung aa mipen Julie ahihi. Tua te pen abeisa kum 12 hun akimuh tuung lai pan tu kikal aa azaih Julie ii nungzang marnte ahihi.

Akimuh tuung lai un Julie pen asam san hi. Cuba tuipi gei ah nitum en in ading hi. Anung zangin mite mitla in mite lunglut sak hi.

Akingaih zawh uh kum 2 acin lai in Alex in Interview khat ah thuthang valakna hangin Julie ii suahni mangngilh hi. Julie lungkimlo in akinial khit uh teh Julie tua akinialna niangtuisai sungpan paikhia hi. Kawngkhak gei atun ciangin Julie in khedap tulsang bulh ahiman in akawng kihei geihgeih hi. Tu laitak in Alex in amarn zaihna amanlang in mek in marn azaih hi. It te mai ah lungtom in nuakin apai numei khat ii lim le mel pen tua nungzang marn sung ah kilang sak zo hi.

Tacil apai lai in Julie in asamtom met hi. Hong suak ding naungek aa ding naupang vanzatte lei in naupang van kizuakna sai ah naupang puante avelvel hi. Gaipuan tawh ading linlen Julie pen tuikoihna pipa bung tawh kibang hi. Ahihang tua pipa bung tawh akibang nungzang in adai hithiat na khat ii hoihna te kilang khia sak hi.

Nausuah khitteh Julie ii nungzang pen nupi khat ii tate a itna le angaihna te kilang sak hi. Alukun in apum awn in atano hoihtak tawi in anawi apai hi. Atapa a angsung ah tawi in lungkimtak in a en hi.

Ata sang akah hun hong tun ciangin Julie in nitak nitum ma in innkongkhak mai ah ding in atapa aciah ding angak hi. Sang pan hong ciah amuh ciangin akhut tegel zaak in atapa a angkawi hi.

Paak huansung ah Julie in asamte lomhen in paak atuang bialbual puan asilh hi. Agei ah apalh lihleh lingpaak kung khat a om hi. Atal ah asam pawl khat kia suk hi. Tua pen aman paakte kem in akhoina lim akilang sak ahihi.

Nitak lam ciangin Julie in angdal adal hi. Agei ah moh emna set pan moh emsa asa lia pongmoh pawl khat om hi. Hi pen anbuuk sungah Julie in nitak an ding abawl laitak nungzang lim ahihi.

Marn khat pen agol in bawl in akilatna munkhat ah akoih hi. Tua marn pen guahzuk nikhat aa naupangte sangpai gai khin, hun awng angah laitak in Julie in laibu khat tawi in tawlet gei ah atut laitak marn ahihi. Akha akhut tawh dom in apualam aen hi. Akim apan teng pen meikhu mel hi in Julie ii ngawng pen kilang takin kidot dingdiang ahiman in tua in zong in ahoihna khat hong kilangsak hi.

Hih marnte etna hangin innkuan lutang pa khat ii muhna le numei khat ii khantoh kikhelna te kimu thei hi. Zi in apasal nungah daitak in tha apiak mah bangin pasal in zong azi nung pan in daitak in don veve hi. A marnzaihna tawh azi ii kihelna te ciamteh zo hi. Azi ii hoih laitak hunte marn zaihin ciamteh hi. Alex in hibang aa marn lahna abawlna pan hithute Julie in thei pan hi. Kum tampi sungin alex in Julie tung ah amanpha mahmah itna te apia hi.

Ama ii nungzang marn te bang hangin zaih sese nahiam ci in Julie in adot ciangin Alex in …

“Akipat cil lam inbel marnzaih pilna siksan in nungzang marn zaihpen pilna pa mahmah hi. Hoih zong sa ing. Ih kiteen khit nikhat anbuuk sungah nitak anding nabawl laitak in na samte na nungah ahi thei bangin na hen hi. Na nungzangte zen diikdeek in nang kong etciang in ahoih mahmah Greek te tonu khat tawh kibang teh. Tua ni pen anbuuk sungah nai 1 sung kim nasep na buai hi. Innkuan khat aa ding thu neuneu te ah hizah in akin ding in cikmah in kong ngahsun kha ngei kei hi. Tua bang aa na nasepna in ka awmsung hong lokzo hi. Hibang dan innkuan nuntakna in numei khat pen numei khat bang in hong khangkhia in apicing sak zong himai in um ing.”

Hun le nite, khua hun le kumte in numei khat ii hoihna alak theih hangin hibang aa na neu nono te thupit bawlin akin veve tua numei ii itna le hoihna te selzo lo ding hi. Hibang hoihna te in apasal, atate ii lungtang sung alawkzawh ding bek thamlo in mikhempeuh ii lungtang zong lok zo hi.

Peter Suumpi
7.6.2014
Source: Yan Ping (2012. No 11, Reader Sen magazine)