Thal lam cil siat ei tung hong tu
Khangluite in thal lam cil siat eimau lam hong tu kik na ci uh hi. Upna thu a kigen ciangin zong thu-um lo mite in a zuih zawh het loh uh thukham kal nuam se uh hi. A langkhat leuleu ah zatepna, zudawnna, khaini-sahdah kunzaa muamna le zakaang zatna cihte tawh vangam kitaan pah hi kei a ci tengin zong thukham (10) hong kal se ding uh hi.
Tua bangin upna thu ah a kician nai lo mite in gamtatna hi, sepna hi, thalawh a kul hi, thukham (10)te zuih zawh kei leh vangam kitung lo ding hi ci kik kawikawi thei uh hi. Mawhna hanga Jesuh ong tatkhiat lungdamna singlamteh thu tawh kisai ah upna thu nuaisiah-in gamtat hoihna a bulphuh teng pen zu a ngawl zo lo, za-kunzaa le khaini-sadah a kidek zo lo, mite sangin thumaan aa a nungta zo zaw tuan dek lo mi teng kek hi zaw sawp den thei uh hi.
Khangluite’n langbawm a ek aa awk a cih dan hi a, tua bang mite mahmah in thukham a zuihzawh lohna uh a kam un tetti a pangpang hi gige a, thukham zuih zawh sitset lohna tawh vangam kilut lo ding ahih manin amau mahmah zong vanggam lut thei lo ding ahihna uh thumaan a gengen zong ahi uh hi. Upna bek tawh vangam kingah thei ding hi a ci pawlkhatte leuleu in zong zatep lai, zudawn lai na hih manin na upna maan ken teh ci-in tatkhiatna thu pen gamtatna le thalawhna mah suah kik zelzel uh hi.
Thu-ummite in zatep thei zu dawn thei cihna hi loin, a genbaang lo gamtat hoih zawhna kuamah in nei lo, no not one cih nopna hi masa hi. Tua bangin gamtatna, sepna, zuihzawhna le thalawh zawhna saktheih bel-a a nei mite tungah a thal lam cil siat amau tung mah ah tu kik den lel hi. Thal lam cil siat ei tung hong tu kik hi.
Mihingte in ih upna kinuntakpih tek hi. Ih up zawkzawk thu ah ih lungsim kinga sakin a nungta a gamtang kihi gige den hi. Gamtatna tawh dikna kingah cih thu bulphuhna pen uplohna hi zaw hi. A maan zaw thu upna pen Upna kici bek hi. Gamtatna tawh Pasian’ maipha kingah cih pen eite’ adingin a maan zo nawn lo thu ahi hi. Tua ahih manin gamtatna tawh dikna kingah zo lo cih ki-upna pen upna maan ahi ta hi. A up huai thu ah ki-um nuam loin, a up huai lo thu teng ah kilu phumna pen kiphatsakna ahi hi.
A maan zaw thu le ih kinial theih loh ding thu-in kuamah in gamtatna tawh Pasian’ maipha kimu lo hi cih thu ahi ta hi. Maan na sa hia leh? Maan na sak keileh na bulphuh zawk zawk thu pen nang adingin thukhenna tetti hong hi ding hi. Thal lam cilsiat ei’ tung hong tu kik hi. Hih thu tawh kisai in Lai Siangtho in, “Thukham laibu sunga kigelh khempeuh a vekpi-in a zuikhin tawntung lote in Pasian’ samsiatna thuak hi,” ci ahih manin Thukham a suangte pen samsiatna a ngah mite ahi uh hi (Galati 3: 10) na ci hi. Upna tawh dikna ih ngah khit ciangin bel gamtat hoihna a delhdelh dingte ih hi uh hi. No one can attain perfection here on earth but perfection can be pursuable.
Evan. Suang Dal
Comment piaknop aomleh...