Kawlgam Gaalkaap Kumpite’ Silate

Post-independence Idea-pen akip ding-a phungvuhna hunbii kum 60 vaal honghih-tawh kituak-in atung-a minam asusia namneu minvawhna-in naakpi-in Zomi-sung hongvaat phadiak-hi. Unau behkhat, sungkhat suak vive kimlaai, Tedim, Dim, Khuano, Siyang, Guite, Zo, Thado cihbang-in code hongpiak-pen “minam sukkhapna” nasia penpen ahihi. Hinapi-in, tua-thu eimi mahmah ngiat-in kitheihmawhbawl-in tua-thusia pomkip-a tuamdin nading lampi bekbek saat-in, kizuihsawm dinmun hongtun-hi.

Tua sung-ah Kumpi naseem ulian honkhat-in atua minam sukkhapna gaalvan-mah pomkip kenkan-in, Tiddim Chin cihnengneng mah-tawh minam hongvaat den-hi. Hihbang mite-pen Kawlgam thunei adiak-in Gaalkaap Kumpite’ silate ahihi. Atote’ thunsa, atote’ naakpheh vawhsa bang-a gamta kampau-uh ahihi. Ataangpi-pen Zomite leh Kawlgam mite-in “Kumpi Naseem (A-so-yah won-thaán)” teng hiphadiak-hi. Tuate bekmah khauhpai zawdeuh-hi. Thuneihna aleencip (atung-a I-gelhsa) Gaalkaap Kumpite’ Naseem taktak-mah himawk-uh ahihman-in mipi’ na seemlo uhhi.

Gam leh minam vaaihawmna sung-ah Kumpi’ Naseem peuhmah Kumpi’ sila ahihi. Mipi’ naseem – mipi’ deihna kumpi-ah apuakluut, agenngam, apulaakngam mite mipi’ naseem ahihi. Kumpi’ naseem khempeuh kumpi’ sila ahih mahbang-in mipi’ naseem khempeuh mipi’ sila ahihi. Kawlgam-a ulian khempeuh (khatlehnih minam’ ading avei, aphu a-omteei haang-in) ataangpi-in kumpi’ sila ahihi. Tua kumpi I-cihpen 1962 kum pan-in Gaalkaapmaang Ne Win leh anungzuuite ahihi. Thuneihnaleencip Ne Win’ silate cihna ahihi. 1988 kum-a kipan-in gaalkaap puan asuah vetlo Gaalkaapmaangte-in hong ukto leuleu-a, thuneihnaleencin Gaalkaap Kumpi-mah hong hito suak-hi.

2010 takciang-in Gaalkaapmaang te-mah makaai-in Union Solidarity and Development Association pan-in Union Solidarity and Development Party (USDP) min-tawh gaalkaap vaaihawm Kawlgam Kiteelna-ah ulian tutphah 1154 lakpan 883 hongluah uh-a, amakaai Thei Sein-in Kawlgam President hongseem pongmawk phot-hi. Thein Sein-pen gaalkaapmaang hi-in Ne Win mahbang-in “gaalkaap puan asuahpak” gaalkaap-mah ahihi. Tuu-gun asilh keiivom ahihkeileh Civil puan asilh Gaalkaapmaang ahihi. Tua ahihman-in 1962 kum pan-in tuni ciangdong “Kumpi’ Naseem khempeuh Gaalkaap Kumpite’ Naseem” cihna ahihi.

Hih “Kumpi’ Naseem” idea-pen Kawlgammi khempeuh’ khuak sung-ah naakpi-a zungthuuk akha khinzo thusiahuai mahmah khat hi-a, “Kumpi’ naseem I-hihteh kumpi’ deihbangbang sepding-a kizawh hiilhialna” uplehsaanna-in hong uk-hi. Thumaan mahmah bang-in kiseh-hi. Kawlgam buppi akhantoh theih lohna abulpi-pen “Kawlgam Ulian khempeuh Kumpi’ Naseem Hi-uh” ahihman ahihi. Kumpi’ na seemlo-a mipi’ na aseemding cihthadah Kumpi’ na sep kawm-a mipi’ na sep-tawh thuahding nangawn “Kumpi’ thu nialna” ci-in Pasian’ naseem kicite nangawn-in “akhial” bang-in genta kuunkuun laaideep uhhi. Biakna lam-a makaai upate-zong tua Kumpi’ Naseem lungpuakzia mah-in nelhsiah ahihlam kilangh-hi.

2015 Kiteelna lawhcing dinghiam, lawhsam dinghiam kithei naailo-hi, kei mimal’ muhna-ah ahihleh thutanna-tawh kituak lawhcinna kimu loding-hi. Azenzen-in, 2010 Kiteelna mahbang-a hong hihtohgawp uhleh Gaalkaapte mah-in ukna hong leento lelding uhhi. Kua party bang party akah zong-in akah khempeuh-in mipi’ na hongseem lo-in kumpi’ na-mah hongsep zeelleh Kawlgam buppi kikheelna peuhmah piang deksuai loding-hi. Zomi lak-ahbel gennavet omlo lelding-hi.

Atung-a kum tampi Kumpi’ Naseem I-cihte’ lungtang-ah minam hong suksiat nading tua Gaalkaap Kumpite’ gaalvan: Tiddim Chin, Falam Chin, Hakha Chin cihte leh namneu Code hongpiakte naakpi-in belhcip-in kheengcip bikbek-hi. Ci tung-a abelh civom ahihkeileh meima-pawn bang-in belhcip-hi. Tua ngaihsutna paihkhiat nading naakpi-in haksa-a, meima-pawn temta-tawh at-khia lehang anat mahbang-in tua ngaihsutna-pen Kumpi’ Naseemte’ lungtang pan-a laakkhiat nading naakpi-in naasa uhhi. Kuamah-in lakhia ngamlo-hi. Naasa lua-uh ahihman-in tua khaici phungvuh vet uh-a, honkhatte-in Kumpi’ gaalvan hawmthawh-in, Zo Chin, Siyin Chin, Khuano Chin cih nangawn-tawh behlap toto liang uhhi.

Hihte ahiding mah-a uplehsaanna I-neih naakleh eizong Kumpi’ Naseemte’ sawltaakte (servant of the servants of government) I-hi dinghi. Tua Zomite-in “Kumpi” acihteh Government (Gamukte) acihna hi-a, tua Gamukte-pen Gaalkaapte ahihi. Tua ahihman-in atung-a minam sukkhapnate “thumaan-a I-seh” naakleh eizong Gaalkaap Kumpite’ sila (slave of Military Government)-mah I-hi dinghi. Tua-hi. Democracy khawng kamdimdim-a I-lawhlawh hang-in tungsiah maaivil, nuaisiah nencip paizia-mah ahihi. Tuabang lungsimpuak-tawh vaaihawmna peuhmah Pasian inzong deihlo ahihman-in:

• Tungsiah maaivil, maai-et, “khial” taleh pumgup, mawkpan cihte khiam ta-ni!
• Nuaisiah bang-a I-seh mite’ thugen “maan” taleh awlmawhlo, dawntaak salo, nehpiik, zahpih, langbawl, siatgen, zahko cihte khiam ta-ni!
• Gaalkaap kumpite’ gaalvante “ahi, amaan” sa-a, I’ kingaapna, I’ kitangpeekna, I’ tuamtatna abeisiang dong-in khiam ta-ni!
• Biakna lam-ah, ei’ kikhopna-a hong kikhawmlo mite Satan bang-a sehna, gaal bang-a neihna khempeuh abeisiang dong-in khiam ta-ni!
• Pulpit tung bek-a Pasian’ na akiseem, upaphualpi khawngbek-a minam’ na akiseem I’ sakna/I’ kisakna, mipi’ maai-a thugen lasakna leh Pasian’ thugenna aneilo mite mi-maimai-a sehna khempeuh khiam ta-ni!
• Akual akhawk, abeh aphung, akhua atui bih-a mi piimuhna leh neumuhna khempeuh abeisiang dong-in khiam ta-ni!
• Mindeihna, dawknopna, “pil, siam, hau, thukhual” hong kicihding lunggulhsiatna khempeuh abeisiang dong-in khiam ta-ni!

• Pasian-in Zomi cih minam lian khat-in bawl khinzo ahihman-in tua Pasian’ maaipha zonna-ah Zopau, Zongeina, Zola leh Zomi Pupa’ cihtakna lamsang saangkhaan ta-ni!
• Thumaan genngam-a, thumaan it theih nading leh “akhial” te gaalbawl lo-a, amaan apomkip nading itna-tawh pulaak ciatciatna lamsang saangkhaan ta-ni!
• Behlehpung, sunghlehpu, tuù-leh maak-a kizom vive I-hih man-in tong kisaang, zaila awi-khawm tengbeek ngaattak-a pankhopna lamsang saangkhaan ta-ni!
• Biakna lam-ah, ei’ kiang-a hong kikhawm lote-zong I’ beh I’ phung, I’ tuú I’ maak, I’ sungh I’ pu-mah ahihna phawk-a kizop siamna lamsang saangkhaan ta-ni!
• Pulpit hitakeileh, Lai Siangtho tawi-a thugen hitakeileh, upaphual-a vaaihawm ulian hitakeileh mipih sapih khempeuh Pasian’ maai-ah akibang/akikim ahihna phawkthak-a, mikim zahtaakna piak siamna lamsang saangkhaan ta-ni!
• Koi-khua, bang-khawk, bangbeh hitaleh tong kisaangthei ahihnaakleh “kei-tawh unau hive hang-e” ci thei-a, itna-tawh kimuak siamna lamsang saangkhaan ta-ni!
• Pilna, hauhna, siamna, thukhualna maantak lunggulh thei-in, tuate ngahtheih nading lamzing maante hahkat tak-a zuihzawh nading lamsang saangkhaan ta-ni!

Khiapding thu 7 leh Saangkhaanding thu 7-tawh Zomite baanzaal ziat suankhawm-in maaciang suankhawm theile’ng Tuunnu’ Zogam niibang luun-in paalluun dinghi. Tua ciang-in Gaalkaap Kumpite’ Sila hihna pan-in Zomite’ Naseem Muanhuaite I-suak ding-a, Zomite Piangsakpa naakpi-in lungkim dinghi. Pulpit tuhngah kuul sese lo-in, upaphual tutphah luah sese kuul lo-a, “Nahibang-in, kahibang-in” Pasian leh Zo Tuunnu-in hongngaak gige-hi!

Zomi Pasian’ Thupha!

Zokhai