Colorado Springs panin Guwahati ~ Dr. Ngul Khan Pau

Colorado Springs panin Guwahati ~ Dr. Ngul Khan Pau

Sabbatical zang dingin gelna ka neih lai-un Topa in America ah Zomite tawh khuapi tuamtuamah hong kikhawlsak ding cih ngaihsutna ka nei kei uh hi. Ama gelna ko gelna sangin sangzaw ahih manin hun nuam hong zangsak a, tua leh ‘a kisel, na muh nailohte kong lak ding’ a cih hong phawksak hi. Kum 1993 August kha in Doctor of Missiology sin dingin Portland, Oregon ka tun lai-in Zomite America gamah om pen khutme tawh kikuai thei lai ding hi. Tua ciangin, 1999 kum a kipanin American Baptist pawlpite kiangah thugen dingin kum simin ka hawh kik hi. Council of Baptist Churches in North East India ah General Secretary ka sepna hun hong cin ciangin Fuller Theological Seminary ah kum khat sung sabbatical zat ding cih ka ngaihsun hi. Tua kum khat sungin Zomi in Diaspora for World Evangelism cih research ka gelh a, tuin zawh theih dingin om hi.

Topa deihsakna hangin Jane Overstreet, Development Associates International president in hih gelna a zak ciangin Colorado Springs ah kum khat mah hong om un ci-in hong sap ciangin kum nih om dingin July 21, 2009 ni-in Los Angeles ka tung uh hi. Fuller Seminary ah 2009 July kha panin 2010 July kha dong ka om zawh ciangun, Colorado Springs ah July 2010 panin August 2011 sung ka om uh hi. Kum nih sungin nopna leh haksatna sungah Topa’n hong gualzawhpih tawntung hi. Ama gelna mah khatveivei i theihsiam loh hangin a hoih pen na hi gige cih hong musak kikkik hi.

Ka ciahna uh, Colorado Springs panin Guwahati, Assam ka tun dong uh, lam tawntungah hong tonpihna tom khat kong gelh hi. Na khempeuhah Ama minthanna hi tawntung hen.

1. Colorado Springs panin Denver:

Thawng Lam Thang te nupa thusiamna tawh Colorado Springs ah amau mawtaw toh hong pui uh a, Denver ah zan khat amau kiangah ka giak uh hi. A beisa kum khat sung Denver leh Colorado Springs kikalah tamveipi ka kilehna uh ahih hangin tutung in ciah ding ka hih manun lungleng sim giauguau hi. Thawng leh Liannu te’n limtakin hong zindo uh hi. Denver Zomi Community Church in zong pawlpi tangin sum leh pai hong letsong uh hi. Amaute hong itna uh leh hong khualna uh ka phawk tawntung ding uh hi. Colorado Christian University ah ka tapa uh Toshi Mang undergraduate kah hi. Inn lam ciah ding ka hih uh lungdamna a om bangin ka lungsim uh zong Denver ah om veve hi. Upate’n “nunglam mit nei” a cih uh bangin lungdamna leh lunglenna kigawmkhawm hi.

2. Denver panin Pasadena:

August 26, 2011 ni-in Denver vanlengtual dong Thawng leh Liannu te’n hong kha uh hi. Lai i kikhak ciang thu i hialbawlna bangin “gennop tampi tawh” cih bangin gennop tampi tawh ka kikhen uh hi. Los Angeles vanlengtual ah Sia Chin Khua Khai in hong na muak a, ama thusiamna tawh ka giahna ding uh Los Robles Road a Fuller Seminary te apartment khatah ka tung uh hi. Nagaland, India pan hong pai Joshua and Bethel Lorin te in hong zindo uh a, tua ka tunna uh zong amau hong vaihawmsak ahi hi.

Tua nitak in Pasadena a Naga innkuan leh sangnaupangte hong paikhawmin ann hong nekpih uh hi. A zing ciangin kum khat sung tawntung ka kikholhpih uh Living Water Fellowship lawmte tawh potluck leh kikhopna Roby and Shobha Sharma te innah ka nei uh hi. Dimnu in kum khat sung Pasian hong gualzawhpihna teci pang a, ken Late 77 sung siksanin hansuahna ka nei hi. Topa hoihna gen ding nei ciat ka hih manun T. Pumkhothang la phuah, “Toupa ei di’n hoih na e” a cih hong phawksak hi.

A zing Aug 27 Nipini in Myanmar Full Life Mission Church ah ka kikhawm uh a, Pastor Chin Khua Khai deihsakna tawh Dimnu in teci panna nei in ken Hebrew 11:1-12 “Upna Tawh Kalsuan” cih hansuahna ka gen hi. Upna tawh kalsuan Abel, Enoch, Noah leh Abraham te nuntakna panin tuhunin ei thu-um mite’n bang sin ding i nei uh hiam cih ka suutkhawm uh hi. Kawlmite Khris sungah mithak suak i muh ciangin Lungdamna Thu vangliatna kimu cian mahmah hi. Adoniram Judson in kum nga tawntung gimna thuak in a zi a ta a khuai khit ciangin Khristian suak ding mi a ngahloh ciang, “Kawlmite Khristian suahsak sangin humpi ihmu lai hatang lakkhiat baihzaw ding hi,” na ci ngeu bek hi. Tua nitak Sia Chin Khua Khai leh a zi Lily te tawh hun zang khawmin amau innkuan thupha piakna leh nitak annek khopna ka nei uh hi.

3. Pasadena panin Singapore:

August 29 ni-in Joshua Lorin leh a tate’n Los Angeles International Airport ah hong kha uh a, “Topa in pha hongsakpih leh kum kik ciangin kimu ni” ci-in ka kikhen uh hi. Amah Fuller Theological Seminary ah Ph.D. in Theology sin hi a, mai kum ciangin zo ding hi. Singapore Airlines A380 double-deck tawh nai sawm sung ka len zawh uh ciangin Narita Airport, Japan ka tung uh hi. Khualzin ciangin hih bangin nai nih sung tawlngak theih hun i ngah nuam tuam mahmah hi. America leh Japan kikalah International Time Zone (hun kikkhek ciamtehna) om ahih manin nai sawm sung ka len zawh uh ciangin Aug 30 nitak lam nai 5:30 na hi zo hi. Japan Zomite zong Topa hehpihna tawh cidam ludamin a om na ding uh deihsakna thungetna ka nei uh hi. Tua panin kipan leuleu in nai guk leh a lang sung ka lenzawh uh ciangin Singapore Changi International Airport ka tung uh hi.

Zingsang nai 3 a vanlengtual ah kidawn ding thubaih hetlo hi. Ahi zongin Pu Hau Za Chin leh a zi Pi Cingpi in hong na dawn uh hi. Cidamin ka kimuh uh ciangin khualzin gim leh tawlna khempeuh hong tawldam tuampah hi. Amau innthak liklek sungah buhman leh be huansa zingsang nai 4:30 pawlin ka ne uh hi. Buhman lah lim, gennop lah tam ahih manin zingtung phalvak dong ka tu suak uh hi. Singapore gam nek ding tamna leh siangtho ahih manin lampi gei khawngah annsaite zong siangtho mahmah hi. Annsai ah pitek putek nasem a sum thalawh zo dingte in sem uh a, amau zong pension zawh ciang sum muhna nei bek hiloin cim man vetlo uh hi. Ei gam khawngah pitek putekte inngak ding bekin kimu a, mi gamah nasem in diang thei lai uh hi. Tua bek hi loin teek leh huai zong i ngaihsut dan kibanglo hi. Ei gamah mi kuama peuh kiteeksak baih i hikha kei tam ka ci hi. Migam ah pitek putekte kikhangnosak in amau septheih ding zong uh hi.

Tua nitak Zomi Innkuan Singapore (ZIS) te vaihawmna tawh biakpiakna Foochow Methodist Church, Little India mun ah kinei a, Rev. Nang Sawm Piang leh khangnote’n biakpiakna hong makaih in, ZIS makaipi Sia Pau Khan Khup leh apawlte in ZIS min tawh vaidawnna khanglui Zolapi*** khat hongsa uh hi. Zomite gamdang tung ka muh lak uh panin Singapore te laisiam, nesep hoih nei vive ahih manun lungkimhuai sa ing. Khangno laisiam nasepna kician nei leh Pasian zahtak ka muh ciangin ka om nuamin nuntak gimnam kasa hi. Topa in tuhun a dingin Daniel leh a lawmte bang Zomi sungah zong hong piak om ding hi cihbang ka ngaihsun hi. Tua nitak in Emmaus Khua Lampi (Luka 24:13-32) thulu zangin hunzatna ka nei hi. Tua nitak Sia Michael Pau Khan Thawn te innkuanin Tedim Moh (fried plain-rice cake) leh niangtui tawh mipi hong pai khempeuhte hong vak uh hi. Hi bang a kideihsak ngaungau lai Zomite i muh ciangin lungdamna lian mahmah hi.

September 1, 2011 nitak biakpiakna kinei kik a, Topa Kilamsak Ni (Late 127:1-2) cih thulu tawh thugenna ka nei hi. Khangnote lapawl lah siam, thungaih zong siam, thudot zong siam kasa hi. Dotna leh dawnna hun tawlkhat sung kizang thei in, dotna tampi mah kidongin tuate zong kidawng hi. Sia Hang Khan Lian in lungdam thu siamtak siangtakin hong gen a, Singapore Zomite mawkmawk cih ding om hetlo cih hong musak hi. Tua ciangin ZIS min tawh hong deihsakna uh letsong hong pia uh hi. Tua nitak Sia Pau Khan Khup suahni lungdamkohna hangin nek ding leh dawn ding a lim nono mah hong lui zihziah uh hi. Topa in thupha hong piaksak hen.

4. Singapore panin Kolkata:

September 2 nitak Changi International Airport panin Kolkata, India lam zuan dingin ka din khiat sawm uh ciangin Dr. Hau Za Chin te nupa, Sia Hang Khan Lian te nupa, Sia Michael Pau Khan Thawn te nupa, Sia Pau Khat Suan te nupa in hong kha uh hi. Hih bangin ZIS makaite leh upate mangpha khakna ka ngah uh ciangin khualzinna lamzang ding hi, cih ka um hi.

Nai thum leh alang ka len zawh uh ciangin Kolkata cidamin ka tung uh hi. Lian Naulak te pata in hong muak uh a, amau mawtaw tawh Salt Lake lam ka zuan uh hi. Zintunna Sia Lalzamang in hong na vaihawmsak a, Salt Lake ah nuamtakin tua zan ka giak uh hi. EBC Pastor Pumsuanthang leh church secretary Albert Munsongte in zong ka zintunna uhah hong na muak uh hi. Tua ni in Salt Lake Stadium ah Argentina Football Team, Lionel Messi makaihna tawh Venezuela team tawh na kimawl uh a, Argentina in goal khat in na zo uh hi. Kolkata ka tun uh ciangin mite kihona pen tua ni tuukpeng kimawlna thu bekbek hi.

5. Kolkata panin Guwahati:

Pastor Pumsuanthang in thungetna tawh Guwahati lam zuan dingin ka kithawi uh ciangin hong kha khia hi. Guwahati vanlengtual ah Shillong ah Students Chaplain ka sep lai a ka sangnaupang khat Ashim Luikham in hong dawn hi (aman tu’n hotel leh sumbuk bangzah hiam nei hi). Guwahati na lum mahmah in 34 degree Celsius hi. Tua banga khualum sungah mei hong mit lailai ahih manin hong lum henhan keei a ‘warm welcome peuh mah ei maw,’ ka kici uh hi. Tui hong kailo ahih manin tui kilei pah a, hong lungkiat-huai sim hi. US khawngah tui deih zahzah kingah bek hiloin a lum a vot kingah tawntung hi. Tua in gam nuam i cih, i kisap teng baihtakin kingah, kicing ahih lam ka phawk hi.

Mawtaw zat ding nei nailo ka hih manun Lia Marina Simte in ama car thak liklek Hyundai I-10 hong kawmsak hi. Hih bangin mi kiphalte hangin Topa tungah lungdam mahmahna ka koko uh hi. Nehemiah thungetna bangin, “Topa aw, ko tunga a nasep hoih mangngilh kei in,” cih ka thupha piakna uh hi. Internet connection ding leh mobile phone neih ding ka buaipih uh a, tu’n kinei khinzo hi. Mikang la: One day at a time sweet Jesus cih lungsimah hong suak a; Topa aw, tuni ading kisapna hong gualzawhpih in cih ka thungetna uh hi. Rev. Dr. J.M. Ngul Khan Pau