Vondeih Kep Ding – 114 (Dimno’ Pa)

Tawngno,
Tu nungkum ka nasepna khat ah nasep ka kipatcil in store sungah ninbung khat bek aom hina pi-in bang hunkaal in kikoihman hiding hiam, tawlkhat khit ciangin ninbung nih hong om hi. Tua leh nikhat ka manager pa hong pai-in, ninbung khat paai in hong sawl hi.

‘Nih om leh anih in adim ciang ninteng kipaai pan a, thum aom hileng zong athum in adim ciang kipaai pan ding hi,’ hong ci hi. Na hitakpi mah hi. Khat bek aom lai-in, adim ciang kipaai-a, tun nih om ta ahih manin anih in adim ciang aninteng kipaai pan takpi hi.

Ka phawk khat hong om a, inn ah zong nin kholna dingin ninbung tampi leh ninbung golpi akisap loh lam phawk pha ing. Gol lua leh ni nih sung bang nin kikhol in, tuateng in inn sungteng namsia sak hi. Ninbung omlo lah pianglo-in nikhat sunga i innteng a kita ding ninbung khat bek kisam sa ing.

Ih pumpi leh i lungsim ah zong tuadan mah hikha in um ing. Thu sia la sia, paihna ding leh kholna dingin ninbung khat kisam hamtang a, ahi zongin abung golpi leh atampi kisam lua-in umlo hi ing. Hong tamlua-in, hong gol lua leh tua ninteng in hong namsia sak in hong susia kha dingin um ing!

Na Pa
May 8, 2017