Numei note theihding a thupi khat om ~ Job Cinpi
Hih thu pen pasalte gensiatna le pasalte hoihlohna a pholak thu hi, ci-in kong ciamtehsak nuam kei hi. Bang hang hiam cih leh laigelhpa zong pasal hi a, sanggam zong ka nei hi. Tua hangin pasalte hoihlohna gen hi, ci-in na ciamteh kei un. Sanggam pasal ka neih mah bangin sanggam numei zong ka nei hi. Nang zong sanggam numei na nei kha ding hi. Na u ahi a, na nau ahi zongin om kha ding hi.
Ahihkeileh tanu zong na nei kha ding hi. Tua ahih manin hih thu a sim pasalte in pasal hihna tawh sim loin na sanggam numeite na thuhilh theih nading le na tanute thu na hilh theih nadingin na sim ding kong deihsak hi. Sanggam numei nei lo a, tanu na neih kei leh zong na lawm numeite na thuhilh nadingin nei le cin phattuamna ngah ding uh hi.
(A diakin, nungak tung, lawmngai cilte ading deihsakna ahi hi. Amaute in pasalte lungsim en thei nai lo uh ahih manin pasalte thu theih ding deihsakna ahi hi.)
Pasal khat in numeino khat a khemzawhna a hang tampi om lo hi. Bang hangin pasalte in numeite khemnopsa uh hiam?
Hih dotna pen a thupi mahmah dotna ahi hi. Numeite pen ngian siam mahmah uh hi, kici hi. Numei khat in pasal galhang khat a lei tawh sat puk zo hi, kici liang hi. Ahi zongin a taktak ciangin pasal khat in numei khat bek hi loin numei tampi satpuk zo mawk uh hi. Numei pen kineusek lua mahmah ahih manin numei khat in pasal khat a zawh ciangin tua numei hangin numei khempeuh in min hoih min pha ngah zo uh hi.
Kim le pam i et ciangin numei bawl a kisia pasal sangin pasal bawl a kisia numei tam za tham uh hi. Numei hanga innkuan kisia sangin pasal bawl a innkuan kisia tam zaw tham hi. Gentehna, a tate le e pasal taisan a a nung lam a zuan numei sangin a zi a tate taisan a zi dang a nei pasal tam zaw uh hi.
(Numei ginatlohna hangin a pasal in zi dang nei hi na cih nop leh kinial hun ding om lo hi. Na up bangin na um phot thei hi.)
Pasal khat in numeino khat a bawlsiat zawhna le numeino khat a thuzawhna bang hiam cih pen numeite mahmah in zong thei lo uh hi. Numei a thuzawh pasalte nangawn in zong amau mahmah in thei lo thei lai uh hi. Numei ngiansiamna pen thu tampi tawh kigena tehpih theih ding, tehkak theih ding kammal tampi om hi. Tua hangin numeite ngiansiamna pen a nasia mahmah bangin kimu hi.
Ahi zongin pasalte ngiansiamna pen tehpih ding, tehkakpih ding kammal om lo zah dingin pasalte ngian khauhpai uh hi. Khanglui mite in, “ Pasal in a zih dongin a zi khemzo hi,” na ci uh hi. Khem cih ciangin, it mahmah napi a it lo banga omna zong khemna nam khat ahi hi. Tangthu khat sungah numei a khem ngei lo pasal a om leh tua pasal pen a pau theilo, ahihkeh mihai hi dong hi, ci uh hi.
Pasal khat in numeino khat a khem zawhna bang hang hiam cih leh, “ Hong muang zo keng,” cih numeite kammal hamg ahi hi. Tua ahih manin sanggam numeinote aw lawm na ngaih uh ciangin na lawmpate tungah hong muang keng cih kammal na gen khak loh ding uh kidawm un, kong ci nuam hi.
Bang hangin hong muang keng cih kammal hangin pasalte’n hong khem zo hiam cih leh na muan loh pam a theih ciangin na muan theih nadingin hanciam hong kipan ding uh hi. Na muanloh lam a theihma in na muan nading hanciam lo ding uh hi. Na kammal pan muang lo cih kammal na gen khao ciangin na muan theih theih nadingin kamciam, gamtat, kampau le na lung a kim theih nadingin hong vaiham ding uh hi.
Pasalte lungsim pen a lawmngaihnu in amah ngai hi cih a theih nak leh a ngah theih nadingin bang thi bang thu tawh numei in a kiciamsak zongin kiciam ngam ding uh hi. Ngah nopna lungsim nei ahih manin van a aksineelkai la dingin na sawl zongin kamciam hong pia lai ding uh hi. Mual kua khum in tui na tawisak zongin tawi nuam ding uh hi.
Ahi zongin na kingaih khit uh ciangin a tuitawisa dawn kha dingin kipamen kei in. Tua ahih manin lawm na ngaih ciangin pilvang inla kamsiam tungah kinga kha peuhmah kei in. Na lawmngaih ding pa na muan kei leh zong na lungsim sungah kemcing inla amah theisak kei in. Tua hi leh a lungsim taktak na thei pan ding hi. Na muanlohna na g n khak nini ngian zon a kipatni hi pah hi.
Hih bang thute ka gen ciangin pasal khempeuh cihna hi pah lo hi. Ahi zongin pasalte taltangah a gina a ginalo ci-in ciaptehna lai kisuanglo hi. Tua manin kidawm a, pasalte lungsim na sittel ding thupi hi. Pasalte ading kamsiam le zuau gen pen supna a om lo matbawl a khat ahi hi. Amau lam pan supna om lo ahih manin a ngah uh leh a mat hi lel uh a, a ngah kei uh leh supna om tuan loin a zian mah ngah kik lel uh hi. Tua manin pasalte metbawlna a tangtungsak na hihloh ding deihsakna tawh kong gen nuam hi.
Theih ding
Nong ngaih kei leh si ning ci liang ding uh hi. Ahi zongin na ngaih kik loh hangin bukkhun zong vei tham lo ding uh hi. Tua pen pasalte ngeina hi cih ding ahi hi. Na lawm numeite ahi a, na deihsakte ading ahi zongin na Share sak in. Lungdam, Job Cinpi (Zomi Laisim Nuamte)
Comment piaknop aomleh...