Topa’ hong laptop ding na ut leh ~ GS Pau

Topa’ hong laptop ding na ut leh ~ GS Pau

1. TOPA ZAHTAAK IN

Pasian zahtakna in pilna kipatna hi (Paunak 9:10) George Washington Carver (1864 – 1943) in a neutung pan Pasian zahtak ngiat hi. Pasian in thupha pia a, a gol ciangin Botanist khat leh inventor khat hong suak hi. Amah in aalu (Potato) sungpan mihing neek theih an nam (150) leh mawngphal (Peanut) sungpan nam (300) bang bawlkhia hi. US President leh Uliante’ mai ah hih pilnate pen sangah a sin hilo, Mi khatpeuh tungpan a theih hilo a, Topa’thu a lungngaih ngaihna panin Topa in a hilh ahihna teci pang thei hi. Topa azahtaak mite a maa uh vang hi (Thsia 7:18). Topa zahtaak na thaman in hauhna,minthan’na leh khan’sauna a hi hi (Pau 22:4).

2. KINIAMKHIAT IN

A hun a cin’ ciangin Pasian in note hong pahtawi nadingin ama’ vanglian khutnuai ah na ki niamkhiat un (1 Pet 5:6). Topa’ zia khat in a kiniamkhiat mite laamto a, a kiphasak mite niamkhiat hi (Jeim 4:10). A kisikcip mite laamto a, mi kiphasakte lei lak den’na hi (Late 147:6) Topa’ hong laptoh ding mah ngak in. Nang leh nang ki laamto kei in. Pawl kai kei in. Mi zol kei in. Mihingte’ laptoh ding zong lunggulh se dah in. Mordekai pen amah leh amah ki laamto selo hi. Kumpipa in a laptoh nadingin zong va phuphu selo hi.Ahi zongin a hun acin teh Pasian in na laamto ziau lel hi. Topa’ lapsang mite kuamah in niamkhiat zo ngeilo hi. Ci leh sa tawh na ki lapsang leh hunkhat teh na kia kik veve lel ding a, maizumna lianpi na thuak ding hi.

3. PASIAN PAHTAWI DEN IN

Kei hong pahtawite ke’n ka pahtawi ding hi (1Sam 2:30) David in aneu tung pan Topa na pahtawi den ahihmanin Topa in zong amah na pahtawi a, Tuucing dinmun pan kumpi zaa ah na laamto hi. Lucifer in Topa Pahtawi nuamlo ahihmanin Topa in vantungpan leitung ah Khiasuk hi.Zomi sung ah zong Topa a pahtawi, Topa’ min aphat niloh den mite Topa in laamto takpi, cih kimu thei hi. Nang zong zawlla leh guallelh lapeuh sa ken la, Topa pahtawina late vive sa zaw in. Tua hi leh Topa in hong laamto zaw ding hi.

4. NU LEH PA ZAHTAK IN

Nangmah in nuamsa in leitungah na khan’ a sau nading in na nute na pate na zahtak in (Efe 6:2) Kawlte in a nu apate in pilna nei lo in, Zukham denin, vakthapin, thaikap phial ta leh zahtak veve uh a, amai ah kun ve ve uh hi. Tua hang mahin a maa uh vang a, a khan’ uh zong sau hi. I khan’tomna, i maa bin’niloh denna, lokho ta le’ng kham khop nangawn i ngah zawhlohna, sumbawl ta le’ng i tuahphat theihlohna, gamdang va tung phial mah ta le’ng zong sumnu sumpa i lamzawh tuanlohna pen nu leh pa khitui i luan’sak khakna hang khawng hi thei hi. Nang zong Topa’hong laptoh ding na ut leh na pianna nanu leh napate zahtak in.

5. BIAKNA SUNGAH KIHEL TANGTANG IN

Topa’ inn sungah amaute kisuan’ a, i Pasian’ huang sungah amaute palh uh hi (Late 92:13) Khangno pawlkhat pen aneu tung pan biakinn tung pah uh a, biakna sung pan khangkhia uh hi. Tua bang mite Topa’ mizat suak baih uh hi. Topa in a mailam nuntakzia uh a hoihpen mah na geelsak hi. Pawlkhat in pilna sangpipi nei napi Aneu tung pan biakna sungah kihel ngeilo uh ahih manin Hymn la khawng sa thei lo uh a, thu zong gen theilo uh hi. Tedim BAG pawlpi in YF (Youth Fellowship) ci-in khangno kipattahna kinei hi. YF te pan mipil, misiam, makai hoih tampi piangkhia hi. Tuate in kawlgam sung ciang bek hilo-in leitung bup dongah kizeel uh a, Topa’ nasepna ah mapang ciat uh hi. YF a kahte leh akahlote Topa’ laptohzia kinak lamdan’ mahmah hi. Nang zong Topa’ hong laptoh ding na ut leh biakna sungah kihel tangtang den in.

6. THUMAN TAKIN NUNGTA IN

Pasian in i sepna (doing) hong en lo a, i hihna (being) hong en zaw hi. Mite’muhna ah koici nuntak cih hong enlo a, mite’ muhlohna mun ah koici nuntak cih hong en zaw hi. Tua tungtawnin thupha hong pia hi. Danial in zu tawh a nuntakna ninsak nuamlo hi. Daniel in paulap tuamtuam na zong selo hi. Tuamanin Pasian in laamto a, ulianpi khat suak hi (Dan 1:8). Joseph in a tonu’ zolna nialin taisan vingveng hi. Tua manin Pasian Egypt gam ah ulianpi khat suaksak hi (Pian 39:12). Nang zong inn ah na om zongin, mun gamla ah na om zongin, nang kia na om zongin, Lawm leh gual tawh na om zongin thuman takin nungta photphot dih in.Tua hi peuh leh Topa in hong laamto lel ding hi.

7. HANCIAM IN

Thomas Edison (1847 – 1931) in,”Gualzawh nadingin pilna 2% hi a, hanciamna 98% hi,” ci-in gen hi.Laisiangtho in ganhing lakpan a neupen ahi miksite’ hanciamna etteh dingin hong hilh hi (Pau 6:6-11).US gamah Abraham Lincoln (1809-1865) suahni khatin tadensa (Newspaper) sungah cartoon lim khat kisuai hi. Mualdawn khat ah US kumpi inn (White House) om a, mualbul ah singluang tawh a kilam buknosia khat om hi. Tua innte gel kikal ah kahlei khat kidawhto hi. Tua lim kisuai nuai ah,”Lawm aw, nang zong tuni in hih kahlei tung ah na kahnop leh kah thei hi teh. A hi zongin a dawn dong na tun’ nading in na khua-ul tampi a luan’kul hi,” cih lai kigelh hi. Pasian in a thanuam mite leh a hanciam mite thupha pia a, Laamto hi. A thadah mite thupha pia ngei lo a, Laam ngei lo hi. Nang zong Topa’ hong laptoh ding na ut leh thanuam in. Nasep hanciam in.

8.CITAK IN

A citak mipa in thupha tampi ngah ding hi (Pau 28:20). Pasian’ laptoh mite i et ciangin pilna a nei a, a nei kei zongin a citak cinten teng a hi uh hi. Mikaangte’ paunak ah,”Man crowns success, God crowns Faithfulness” (Mihingte in a lawhcingte pahtawi uh a, Pasian in ahih leh a citakte pahtawi hi) cih khat om hi. U Thant (1909 – 1974) pen Khristian zong hi beeklo hi. A neutung pan mah in citak ngiat ahihman in Pasian in UNO Secretary General dinmun ah na laamto hi. Leitungthu leh kha thu-ah na lianpipi aseemzote a gualzawhna uh thusim in cihtakna ahi hi. Nang zong nasepna peuhah na cihtak cinten naak leh, na lawhcing kei phial zongin Pasian thaman hong pia ding a, Hong laamto veve ding hi.

9. SEP PEUHPEUH KICIAN TAKIN SEEM IN

Mi naseem bang bek hilo-in, Topa’naseem bangin na hihna khempeuh uhah itna lungsim tawh hihta un (Kol 3:23) Nasepna peuhpeuh Topa’ naseem in kingaihsun den in (Kol 3:23). Na vaipuak (tavuan) Zo sitset den in (Pau 22:29). Nasep neupente nangawnin limtak na sep leh Pasian in nasep a lianzaw hong pia ding hi (Lk 16:10). Na neukha khat peuh nasep teh Thaman deih pahpah kei in. Na deih pah pah leh na thaman a kikhol om nawnlo ding hi (Matt 6:16). Topa in laibu khat nei a, tua laibu sungah na nasepte ciamteh denin,Tua tungtawnin nang’ tungah thaman hong pia den hi (Mal 3:16). Min deihna tawh sepna,tavuan khitna lel tawh sepna, khasum san’na bek tawh sepna, sawlman’na lel tawh sepnate tawh thupha na sang kei ding hi.

10. KIKHALNA NEI IN

Khuapi khat ukna sangin eima’ pumpi ki uk zawhna hoih zaw hi (Pau 16:32)

Topa in a neutung pan mahin gamtat hoih pah a, kikhalna (Discipline) anei mite laamto hi. Kawlte in, “Kikhalna in mihing’ manphatna hi a, Kikhalna a om ciangbek in kikhangto pan hi, ci uh hi. Napil zongin nasiam zongin kikhalna na neih kei leh Topa in hong laamsang tuanlo ding hi. Zomi gam makaite sung ah Col. Khen Za Moong, sangsiate sungah siapi P. Gin Kho Thang, biakna makaite sungah Rev. Dr. Do Suan Mung, kimawlna siamte sungah Sia Thang Sian Khup @ Mg. Phyu cihte in kikhalna nei uh ahih man in hih dinmun ciang a tung uh ahi hi. Nang zong Topa’ hong laptoh ding na ut leh kikhalna nei in. GS Pau