Malaysia Khuahun (May 30, 2018)

Malaysia Khuahun (May 30, 2018)

ZAM leh ZRC laihawmte a simzel ten tel ding hihang. A sim denden khollo pawlkhat in i telnaikei khak leh ci-in tawmkhat hong suahkhia nuam ing.

1. Banghangin Zomi hizahtak Malay kipai mawk hiam?

I gamah nasep ding omlo, a om sunsun lah sep thaman tawh kituaklo ahih manin nektawm zong ngiat dinga aki pai ahi hi. Pawlkhatte leuleu a innkuanbup un gam thumna lamenin hong lal uh hi.

2. Malaysia ah Zomi hizah bangci khuasak uh?

Malaysia gamah UNHCR om ahih manin UN pangbelin Zomi a tulsawm lomte nektawm zongin ki khuasa hi. Gam thumna a tungkhin zong tampi om a, a lamen zong omlai in, nektawm zong ngiat zong tampi mah ki-om lai hi.

3. Kumpi leh UNHCR in hong vankim uh hiam?

UNHCR maitang a zahtak manin kumpi in UNHCR status neiteng suakta takin omkhuan hong pia hi. Ahi zongin UNHCR status neilote pen ‘guuk om’ ci in hong ciamteh uh hi.

4. Mat le hen koibang dan ahia leh?

UNHCR leh permit neite pen hong man nuam samlo uh hi. Ahi zongin suspect leh complaint a om khak leh man uh a, thu sitin thu om bangin thu bawl thei veve uh hi. Kumpi thukhun tawh aki tuaklote man veve uh hi.

UN leh permit neilote bel palik ten a muh nak uh leh manlo cih peuhmah omlo hi. Pawlkhatte sum pia in lemtang thei a, pawlkhat pen sum tawh lemtang sak lo uh hi. Immigration ten hong mat khak lehbel sumpiak tawh lem nawnlo hi.

5. Lock up, thong leh camp i cihte koibangin kilamdang?

Mat le hen i tuahcil in lock up ah ni 14 sungbang hong khumcip phot uh a, tua panin thukhenzum hong puakin i mawhna daan tawh kituakin thong ki kia hi. I thong kiat hun zah ding a cin zawh ciangin camp hong puak uh hi.

6. Mat le hen tuakte koi bangin i gam ciah thei ding?

Camp hong puak ciangin i gamah i ciah theih nadingin Embassy bekin pan hong la thei hi. Hong kipuakna camp min leh i body nambat kiciantakin Embassy ah vapuak theih pah ding kisam hi. Thongkiate tawh kisai tavuan alate’ sep ding ahi hi.

Thong kia nu/pa pen camp atun mateng a nung panin sul zuihzuih kul hi. Camp a tun ciangin a body nambat pen Embassy ah repot piakpah theih ding kisam hi. Embassy ten interveiw va bawl ding uh hi.

Interview a bawlna ah a dot ding thute,

• Minpi le min neu
• Suah ni, kha, kum
• Nulepa min
• Suahna mun address
• Tulaitak teenna address
• Inn contact phone nambat
• Malaysia ah meltheih contact nambat
• Minam min leh biakna min

A thupi diakin hiteng pen form sungah hong phisak ding hi. A zenzenin hiteng i phitheih keileh akik ciangin Embassy ah uliante khat hong paipih dinga tuapa in hong encian ding hi.

7. Camp a tunzawh i gam ciah theih nangin bangtan kai?

A beisa kum khat lai masiah pen kha 4 ta ngak kul hamtang hi. Khatvei i phikhialh leh kha 8 ngak kul a, nih vei i phikhialh leh kum khat ngak kul ahih manin i biodata teng peuhmah lotngah kul hamtang hi.

Tunbel Embassy ah ulian ten vaihawm thakna khat nei uh a, kha khat leh alang sung bangin i gam ciah theih dingin vaihawm ta uh hi. I vaite a nung panin sulzuih den kul hi.

Embassy panin interview a vabawl khit uh ciangin matpongtin coppy leh innkuan sazian coppy hong ngen ding uh a, tua zawh a sawtlo in air ticket man ding hong ngen ding uh hi.

Tulaitak RM 650 hi. Tuateng zawh ciangin a ciah ni ding leh a hun hong zasak ding uh a, KLIA vanlengtual ah tawmvei sung kimu thei in i gam a ciah thei hita hi.

8. Mat le hen kuan tavuan la ding?

I tanau, i sanggam leh i meltheih khatpeuh in mat le hen a tuahkhak leh eimau tek mawhpuak hi a, kipawlna tuamtuamte in tavuan hong la lo ding uh hi. Ei mimal ciat, ei innkuan ciat in tavuan a kila ahi hi. A thu i kihtak leh kipawlnate ki cial thei hi.

9. Koitengah mat le hen kituakmun pen?

Tulaitakin Kawlgam pan Malaysia hong pai, nuailam hong zuite kilim mat pen hi. Puaisa tenlah semngam, hong pai dingte lah hong pai ngam, kumpi thunei ten lah na man ngam, ngam bebek ki tuahkha ahih manin nuailam tawh hong paite kiman thithe hi.

Khuapi sung neh lamah kimante pen i kan ciangin lamsap tawm bei zaw a, gamgi lamah kimante i va kan ciangin a tultul mahin bei mawk hi. Bus naleng kizui ngamlo in grab car khawng peuh sapin a kipai khiankhian hi a, vai sah mahmah hi.

10. Malaysia ah Zomi ten Pasian a phawk uh hiam?

Pasian kiphawk in i omna veng ciatah biakpiakna kinei linglingin i gamah i om sangin Pasian phawkna a neizaw tampi aom mah bangin aki suaktasak nuamte leuleu adingin suahtakna mun zong hi kawikawi hi.

Khantohna leh kiamsukna pen mimal ciat tawh kisai ahih manin a khangto aom mah bangin a kiamsuk zong mi tampi mah om hi. A hoih lawh tampi aom mah bangin a siat lawh zong mi tampi om zel hi.

Minam sungah kiukhat pan,

Dal Sian Hung
Kuala Lumpur, Malaysia.
30 May 2018