A et-teh huai Kawlgam Politician te kampau

A et-teh huai Kawlgam Politician te kampau

Kum 2015 I KAWLGAM kiteelna final result election makai pipa tungpanin a kizaak nailoh hangin, tuni ciang ciang news media tuamtuam pan I zaakna ah NLD in gambup phial in zawhding lametna om cih mipi’ lam et a hihi. A hizongin,hih kiteelna vai ah buaina tuamtuam a omteng kaal nih sungin election commission ah kipuakthei a, tuakhit teh atawpna (final result) pulaakna kinei panding cihthu election policy a hihi; i KAWLGAM kiteelna pen kua in zo cih siangtak kigen thei nailo hi; tua a hihmanin, Zomi te’n pilvaang mahmah tak in thu igending thupi kasa hi. A tawpna thuzaaksakna (final result) om nailopi in Zomi khat leh khat online khawngah a kilawmlo kampau, ki ko bawlna, party vote vai kilang neihna, mee khiatvai mimal kikona tam simsim mawk a hihman in kilawm kasa peuhmah kei hi; tua a hihmanin, NLD makaipinu ASSK leh USDP makai U. Nai Win Te’ kampau, leh Pu. Zo Khai laigialhna te tawm kong hawmsawn nuamhi.

USDP makaipi U. Nai Win gen na ah,” mun pawlkhat ah ko party a zawh samhangin a tamzaw ah NLD in zo zaw hi, mipi deihtel a gualzo party pen mailam kimakaih nadingin kathukim a, ko kalelh hangun ka party uh beiloding hi,” cih genhi. A lelhdinguh lam en mahmah napi in, agualzo party te’ makaihna pen lungdamtakin muak veve a, kamkha leh tona kam mal te zanglo hi. Tu laitak a lelhhangun, mailam Kum nga khit teh lametna saupi omlai thugen a, thangah huai leh et-teh huai mahmah kasa hi. (November 9,2015 RFA, VOA).

NLD makaipi Nu ASSK in zong a genna ah,” mipi te’n hihzahciang tha nongpiak manun kalungdam hi, tu ciangciang mun tampi ah gualzawhna ingah manin lungdam hang; a masa in, haksatna tampitak phuto a kidemna ah gualzawhna a ngahlo (looser) party maikai te nakpitak zahtaakna kapia a, zong na hanciamna te uh thupi kasa mahmah hi,” ci in genhi. Mipi te tung a vaikhak na leuleu ah, tu ciangciang thu kizaakna pen gambup kiteelna final result hinailo; ahizongin, mipi in natheihsa mahbang uh hiding hi- zawhding lametna lianpi nei hihang. A dang a lim vaikhak mahmah khat ah, ei party in zawhna I ngah hangin midang te tung ah kampau leh mite’ lungsim a sukha thei Kam-mal hoihlo te zangkei ni cih lim vaikhak mahmah hi.( November 9, 2015 RFA, VOA).

Pu. Zo Khai laigialhna mail pan in kasim kha a, ei party in gualzawhna a ngah manin a zolo party leh member Te tungah ak-gul-mu i bat lohding leh kampau te kidop mahmah ding limgen mahmah a, zongh a dik mahmah a hihi. Thamloin, a gual-lel party te zong i it veve ding limgen mahmah hi.

Hih atung a politician mipil te’ kam-mal zuihtaak leh I lungtang sungah kem ngit-nget huai mahmah a, hibang lungsim I neihnaak leh mikhempeuh tawh ki thutuah theihna (diversity) I neiding a khantohna I masuan ding hi.

Ei party in a lel a hihleh lungkia keini, kum nga khit teh ki zokik thei veve a, I thanemna teng kipuahpha in, ki lamthak kikleng gualzawhna in i Mai ah ong Ngak veve lai hi. Tu kum kiteelna ah I lelh hangin a zumhuai leh thanemna ding hilo hi; asawtlo kum nga teh demkik lehang gualzawhna eitung Hong kilehkik thei veve hi- lungkia kei ni.

Ei a gualzo lamte’n I gualzawhna hun pen kum nga bek a hihmanin, hih hun tomno I neihna sung ah mipi te’ lamet bangin nasem in, I gam a ding nasep kipan Ta ni. Ki kamciam bang a mipi’ phat tuam nading I sepkeh, kiteel kikciangin mipi in muantaak ong sa nawnloding a, gualzawhna in ongtaisan ding hi; I thugen a tuam, igamtat atuam ” say different act different” a hihnaak leh I gual lel kik dinghi.

A tung a politician te thugen te zuihin neipah ni in online sung peuh a I ki koko te leh party vai i ki langneihna lungsim paikhia in lungkituak gam adingin hanlung ciam khawmni! cih a kuamapeuh kong thapia nuam hi.

Political view pen mikim kibanglo a hihmanin, no ii muhna tawh a kibatkeh ong mawhmai un. Lungdam.

PA.GO LIAN KAP (law 2rd yr at Highline College)
SEATTLE, WASHINGTON STATE
USA