2018 kumsung Thailand pan Myanmar gammi 70,000 ki hawlkhia ciahkhiasak

2018 kumsung Thailand pan Myanmar gammi 70,000 ki hawlkhia ciahkhiasak

Thailand gamsung ah Myanmar gammi nasem in aom pen tammahmah hi. Tualak ah 2018 kumsung bekbek inzong Thailand panin aki hawlkhia, aki ciahkhiasak, Deportation atuak Myanmar gammi 70,000 bang pha cih Myanmar Times pan kiza hi.

Hihvai tawh kisai in Bangkok khuapisung aom Myanmar Labour Attaché te’n Wednesday ni in Statement akhahkhiatna ah tua Myanmar gammi aki ciahkhiasak mi 70,000 tepen Thailand gamsung ah Legal takin naseptheih nading Permit bangmah tawineilo, Undocumented vive ahih manin aki ciahkhiasak hi ci’n genkhia uhhi.

Tuabang in aki ciahkhiasak te lakah amau thutawh Thai Immigration zumpi ah aki ap honkhat zong om uhhi. Permit bangmah aneihloh uhciangin Thai Immigration kumpi tungah ki ap masa uh a, tuakhit ciangin Thai kumpi thunei te’n Myanmar Government tungah apsawn in, akisam laidal teng aki bawlsak khitciangin Myanmar gamsungah aki puakkik tampitak om cihi.

Tuaban ah Thai gamsung muntuamtuam ah kumpi thunei te’n Crackdown bawlin tuahunsung inzong akimankhia illegal Myanmar workers tampitak kihel uhhi.

Thai leh Myanmar kumpi thunei te’n thukimna bawl uh a, tuabangin aki ciahkhiasak tepen Myanmar gamsung atun ciangin apaikiktheih nadingin akisam Documents te kibawlsak dinga, tuakhit ciangin Thailand ah paikik theiding uhhi ci’n Myanmar Labour Attaché U San Maung Oo in Wednesday ni in genkhia hi.

2018 kumsung in Thai gamsungpan Myanmar Migrant Workers aki ciahsakte lakah mi 651 tepen Shan State sung aom Tachileik gamgi zui in aki ciahkhiasak ahihi. Tuaban ah adang mi 70,740 tezong Kayin State sung aom Myawaddy gammi zui in ki ciahkhiasak a, Tanintharyi Region sung aom Kawthoung Township gamgi zui inzong mi 3340 ki ciahkhiasak hi.

Tuabang in aki ciahkhiasak te lakah mi 246 tepen mihing kizuakna athuak “Human Trafficking” tawh kizom uhhi ci’n Myanmar Labour Attaché Office in genkhia hi.

Thai Labour Law kithu thukhunzui in gamdangmi khatpeuh Permit neilo in agamsung ah akimatleh liausum Thai Baht 5000 panin 50,000 bang ki liausakthei a, tuakhit ciangin agam ah ki puakkik sawnsawn hi. Tuabangin agamah aki puakkik tepen kum 2 khitciang bekin Thai gamsungah lutkik theipanding cih thukhun aom ahihi.

Tuabek thamlo, illegal Migrants te nasep aguankha nasepnei Boss tezong nasem khat ciangin Thai Baht 10,000 panin 100,000 ciangbang ki liausakthei hi.

More: Malaysia zuandingin apai Myanmar gammi 40 tak Thai gamsung ah kiman

Thailand kumpi thunei te leh agamsung aom Myanmar Embassy te pulakna ah Thai gam panin Myanmar gammi nasem mi 20,000 tabang khasim in ciahkhiaden uh cihi. Tuapen gamnih kumpi te Agreement tungtawn in aciahkhia uh hi a, tualak ah Thai gamsung aguklut illegal te kihelnailo hi. Sawltak #zomidaily