Syria ah IS te omna mun Turkey in Russia hilh

Syria ah IS te omna mun Turkey in Russia hilh

Feb. 10, 2017: Zan in Russia in Turkey in IS te’ ukna a lak ding a hanciamna al-Bab, Syria ah Turkey galkapte thum tung lam panin kaplum in, 11 a kapliam manin Turkey in Syria gam-a ISte oma mun Russsia tungah hilh pah samsam hi. Kremlin spokesman Dmitry Peskov in ISte omna mun ah Turkey galkapte a om lohna dingin Turkey galkap ten thu hong zasak uh hi ci-in tu ni-in gen hi.

Russia leh Turkey kipawlin Syria-Turkey gamgi panin Km. 30 a kigamla al-Bad ah ISte nasia takin do khawm uh hi. Al-Bab ah Turkey galkap thum a kikaplup khak pen poi mahmah a, hih mun pen Turkey galkap ten ISte a dona mun hi ci-in Dmitry Peskov in ci hi. Al-Bab ah Turkey galkapte a kikaplup khakna pen thukizak sakna a man lohna (communication failure) hang hi a, hih thu tawh kisai kitel khialhna ding om lo hi hi ci-in gen beh hi.

Turkey galkap ten zong hih thupiang pen Russia ten a ngimna uh tawh a kap khial uh a, kamsiatna (accident) hang hi ci uh hi. Tu ni-in Turkey in hih thupiang hangin Russia tawh kitel khialna piang loin kitanauna hoihsak semna ding hi zaw hi ci hi. Turkey in Russia ten Turkey galkapte a kapna mun ah Turkey galkapte ni 10 bang om ta uh a, thukizaksakna a kitel khial man-a thupiang hi ci uh hi.

Kremlin in Russia leh Turkey in Syria ah IS te dona dingin galkap thusim kipiak tuahna kinei hi ci hi. Turkish deputy prime minister Numan Kurtulmus in zan a Russia in Turkey galkapte a kaplup khakna vai uh thukanna kinei lai a, Russian President Putin in Turkey President Erdogan kiangah sihna tuakte hangin a thuakpihna gen khin zo hi ci hi.

Turkey in nung kum August kha panin Syria gam ah ISte dona dingin “Operation Euphrates Shield” kici a kipat khit khit nung ISte 23 kithat ta hi ci-in tu ni-in pulak hi. Tua loin Turkey ten ISte bukna inn (building) 7 leh ISte headquarter 3 leh galvan koihna khat kikapsiatsak khin ta a, Turkey tawh kipawl Free Syrian Army (FSA) rebels ten Turkey galkapte huhna ISte pan mun, headquarters, mawtaw leh bukna 154 kikapsiatsak ta hi ci hi. Source: News agencies/ Thang Khan Lian