Malaysia ah Zomi pawlkhat te nasepna The Loaf Company ki khakcipta

Malaysia ah Zomi pawlkhat te nasepna The Loaf Company ki khakcipta

Malaysia gamsung aom Zomi pawlkhat te nasepna ahi “The Loaf” kici Company te ki khakcipta cih NST pan kiza hi. The Loaf pen Premium Bakery namkhat hi a, abeisa in Malaysia gamsung ah Prime Minister asemngei Tun Dr Mahathir Mohamed ii neihsa Company ahihi.

The Loaf pen akizonzawh, Business asepzawh kum 12 asawtkhin ahihi.

Company aki khakcippen Social Media tungah Notice ki khahkhia a, April 9 nipan in aki khakcip kici hi.

Ahi zongin Notice sungah akikhakna ahangpen Company in bangmah gencianna neilo uhhi.

The Loaf ii ngimna “Primary Objective” pen Malaysia gamsung ah Breads leh Bakery Industry te Quality aneihtheih semsem nading cih ngimna tawh akipankhia uh hi a, angimna tangtung ahih manin Management tepen lungkim mahmah uh cihi.

Kum 12 sungbang The Loaf nong panpih, tha nongpiak manun lungdam mahmah ung. Malaysia gamsung ah Breads & Bakery Industry pen ahoihzaw, Quality aneizaw dingin ki hanciamthei ahih manin kakipak mahmah uhhi ci’n Notice ah Management te’n khahkhia hi.

The Loaf Company pen Dr Mahathir ii neihsa ahih hangin, Management pen M & M Consolidated Sdn Bhd te’n lenzaw uhhi. Joint Venture in Dr Mahathir leh Motoko Resources Sdn Bhd te’n ahon kawikawi uh hi a, Dr Mahathir in 51% Stake aneihsa ahihi.

The Loaf te ii amasa penpen Outlet pen Langkawi, Telaga Harbor ah 2006 kumin kihong masa a, Investment RM3 Million bei in akihongkhia ahihi.

Tuazawh ciangin KLCC, Kuala Lumpur sung aom Pavilion Shopping Mall, Sogo Shopping Mall, Subang Jaya aom Empire Shopping Gallery cihte ah Outlets 12 ki honbeh kawikawi hi.

The Loaf Premium Bakery akikhakding pen asungah asemlaitak nasem te’n bangmah theikhollo uh kici hi. Nasem pawlkhatte nasep akuan uhciangin tuni akipan Company ki khakcip tading hi ci’n kigenpan ciliang hi.

More: Tedim khuasung khantoh nading nasep pawlkhat pulakna

Ahi zongin thakhatthu in akikhakna hangtawh Management te’n nasem te kiangah liausum “Compensation” kong piading uh ci’n genkhia cih kiza hi. Malaysia gamsung aom ansai atamzaw ah asemte pen khakhat in tawlngak hun “Day Off” ni 2 cihbang khawngbek kipia hi. Ahi zongin hih The Loaf ah nasep alutkha pawlkhatte khakha in Day Off ni 5 kipia in, asemsuakzo te’nzong nuamsa mahmahlel uhhi. Sawltak #zomidaily