Suanggsuang na omlo hileh khawk’ (poi) si’n teh ~ Pu Khup Lian

Suanggsuang na omlo hileh khawk’ (poi) si’n teh ~ Pu Khup Lian

Thupatna – 2019 April kha in Anlang Hausalui, leibawl siam minthang Pa Thang Khan Thawn hong hawh a, leitung thupha tampi hong puak banah, kha thupha zong hong phawksak ahih manin ka nuam mahmah hi. Tua hong gente sung panin Suanggsuang tawh kisai thu kazak ngei hi napi-in, ama muh bangin nidangin kha thu lampan ka phawkkha ngei kei hi.
A hong phawksak mah bangin Suanggsuang pen Tedim uksung a om Tedim Tualnamte a’ dingin a theihhuai mahmah thu hi a, i suahtakna a pianna taangthu nei suanggmual vum khat ahi hi. (Tedim Tualnam i cih in Tedim Uksung a om Phungnam tuamtuam ahi Sihzang, Saizang, Teizang, Vangteh, Losau, Khuano, Zo… cihte ahi hi. Zomi khempeuh huamzo deuhlo hi.)

Kei phawkna-ah Meiteite in Kam Hau uk hong sim lai-in, hong lut pah ngamlo-in Mawngken, Khuadai khuataw lamah phualsat in, Suanggsuang dawn pan a lampi ding gal-et zelin a om laitak, Meitei mangpa Meng Tawl thau tawh kigaalkap in si a, a galkapte lau in nungkik uh hi. Tua pan Tedim galkapte in delh mangin Meiteite tampi si hi cih dan bek in ka thei hi. Tua ciang bek theih ding na hih tuaklo hi.

Suanggsuang taangthu

Suanggsuang pen leii maitang pan pi (50) bang a sang, suangg mual vum khat hi a, galpi – 2 (Japan gal) lai-in Japan galkapte in a dawn lam a suangtumte tampi tak phelkhia ngei ahih manin pi (7) bang niamtuam kici hi. Tua a phelkhiat suangtumte tu in a nuai pan Beltang lui dongah kiphah zihziah lai hi. A dawn ah thankik boksuk tawh kibang suang zawlpi khat hemkhia zolo in tu in tua suangpi, a galpan nangawn ah kimu thei lai hi. Tua suangg zawl’pi pen suang tawh sat leeng ging valval a, siklawng sat mahtawh kibang in a gamla pek pan a ging kiza thei ci hi. Tua ahih manin suangg long ci-in min kipia hi.

Taanglai pek, Tedim khua a kisatma tham in Zogam ah tuiciin/tuiciim tung a, tui a kiam nading in mihaute ta tui sungah kipaai leh tui kiam ding ci ahih manin mihau ahi Ngaiinu tanu Langh Ngai a mipihte in tuiciin paih in neih sak a, tui sungah a khiat ciangin tuikiam pah hi. Tui kan’ khit ciangin Ngaiinu in a tanu luang luiguam sung citeng zong kawikawi in kap kawmkawm hi. A tanu luang a muh nadingin suang buak in phuisam a, a suang ciante Suanggsuangin piang hi kici hi. Suang tang, suang tum tawh aisanna, biakpiakna pen suang buak kici hi. Suanggsuang a khiatna in suang lianpite kiciang tó, kisuangto cihna hi.

Ngaiinu in kap kawmkawm in a tanu luang a zonna, a khawlna munah a khituite Ziltui in piang a, a khitui taaknate ah Keelci kici lui gei sung pan al in piang hi. Tua bang ziltuite Cikha kuam, Beltang lui le Sialtang luite ah om ci hi. Lui sung khuat kom in Ziltuite kikhol a, Zilkhuk kici-in tua tuiite but/huan in a tui kangg sak a cikhawn kici cipei piang hi.

Beltang lui ah kum 1960 ciang dong ci kibut lai hi. Ukpite hun lai-in cikhawnte tung nangawn ah siahkai uh hi. Beltang lui ah a kinai in Zilkhuk nih om a, a al zaw pen Ngaiinu khitui ci-in, a al lo zaw pen a naptui ci selai hi. Tu in ci haksa nawnlo ahih manin Ziltui kibut nawnlo a, Zilkhuk zong leii in vukta hi. (A tung a Tuiciin/Tuiciim thupen a man dingin ki-um zolo hi).

Suanggsuang dekah mihing awmtal a thawl zawh na ding kuavang sukvan khat om a, ngil mahmah hi. Gulpi, sahang cihte a om ding kilau-in kua mah lutngam lo hi. Phalbi hun in tua vang pan meikhu suakkhia thei a, kum 1956 kum ciang dong Suanggsuang ah zanin meivak kimu theizel ci hi. Kum 1960 pawlin gamsung ka vak uh ciang Suanggsuang bul Dawnlui kiltungah sahang sanek na saguh tampi kikhol kamu kha lai hi.

Meitei Gal

Zomite Kawlpi kuamah Shante tawh a teenkhop lai uh 1300-1400 AD pawlin Meitei/Manipurte in Kawlpi sim uh a, a makaipa Hkang Ko kithahsak ahih manin Meiteite in lel uh hi. Tuapa kiphumna a han tudongtak in omlai ci hi. Meiteite lungkim lo in tua nungah sim kik leuleu a, Kawlpi khua a tuinekna sungah bum le ai khahsak in gilsan/zavat tungsak a hih manin Meitete in zo hi napi, a vanh deihteng uh la bekin a gam uah cihkik lel uh hi.

Pu Kam Hau hong khan ciangin Falam Ukpite tawh kipawlin gamtampi uk hi cih thu a zak ciangin Manipur Maharaja Nilsein (Leng Mangpa) in 1834 pan Tedim hong sim pahpah hi. 1857 kum in galkap 3000 tawh galhiam bucing takin hong kuan uh a, Meitei gundung Tualmu khuataw lam tuidaiina mun Tuithau ah tuimaitang tawh kikimin singluang tampi gun sungah gualin phut uh hi. A ngimna in – gal a lelh khak uh leh tuate tung tawnin gaalkah in ciah kik ding cih ngimna ahi hi.

Hih thu tawh kizawi tawnin Kawl Kumpi Bayint Naung khanlai-in a thahat mahmah Prome sim dingin a paina uh ah, khuapi kulh a sim ma in, a zat gunkuang le phongte a veksek in susia phot hi. A deih na in – gal a lelh uh leh a nungkik nading gunkuang om nawnlo ahih manin galkapte in a sih dongin hangtakin gal sim ding/do ding longal nuntakna ding lampi om nawn lo hi cih a theih nading ahi hi. Lunghiang lo in galsim’ uh ahih manin zo takpi hi. Meiteite in bel gallelh ding tawh kiging khol masa uh ahih manin daupai huailo pah hi.

Muanheng zang pan Khuadai gam Suangkang mual dungah Meitei te’n gialhphual satin om hithiat uh a, Tedimte thu zasak hi. “Nong kap uh leh anuai a bangin hong piang ding hi” ci sak hi.

• 1. Nathau naseh kuang sungah tui phul ding a, thau suak theilo ding.
• 2. Phim le khau hong lengin na mit uh hong khui mat ding.
• 3. Nâng khau hong lengin na khutte uh hong hen ding – ci-in liinphawn hi.

Tua hun lai-in bum le ai nasia lua a, Galngam leh Dawi Kungpute ai kidem mah bangin a tanggtun pahpah ding Tedimte patau uh hi.

Tua tungtawnin Tedimte a makaih Pu Za Tual hi a, amah pen, a teiitang, galhang khat ahi hi. Meiteite lau nadingin galkhemna bawl hi. Lailui khuakhung pan Leitawhtan dong mualdungteng ah taksing mett sakin nitak simin taknai halsak hi. Singbul phungte ah zong meiphual cih sak hi. Tua meivakte amuh ciangun Tedim galkap phual tam salua in Meiteite linglawngg uh a, sim’ pak ngam lo uh hi. A gal panna uah vaka ham a “Tak Tapa” ci-in za uh ahih manin, a Khuasiam uh zong Tak Tapa ci-in minsial liang a hih manin zawh baih lo ding hi ci pah phot uh hi.

Meiteite Gallelhna

Tua hun sungin minam a vei, galhang Gualnam beh Pu Eng Tuangin aisanna khat nei a, a zi lutungah aktui koihin, “Leng Mangpa ka thah zawh di leh kei honsiam Pasian Phaza aw, ka zi lutung a ka aktui koih hon khasak in,” ci-in phuisam in a gamla simkhat pan ngimngim in thau tawh a kap leh a zi khalo in aktui khakham takpi a, Meitei Mangpa that zo takpi ding ci-in lawp mahmah hi.

Amah zong bak-ek thauvui a khauh mahmah dingin suu a, lungmuang takin Thangzang gam Sahei mual, Suanggsuang gal’ Dawnlui pammual ah Leng Mang pa a khuadak ding pang gige in om hi. Ahih ngeina bangin Meitei Mangpa Meng Tawl Suanggsuang dawnah lampi ding gal-etin a khuadak laitak Pu Eng Tuang in ngimngim in a kap leh a ngawng kha in kîa suk a, Dawn lui sung kidensukna in sipah hi. A luang koi ah, kibang cih hiam cih kigen na om tuanlo hi.

Tuapa dinna pen a kapna mun tawh kigamla mahmah a, Zothau tangg tuk zawh nading hi peuhmah lo hi. Ahih hangin Lai Siangtho sungah Davuih suangtang thupha a pia Kha Siangtho in Goliath Mangpa’ taltang khauhtakin a vá khaksak mah bangin Zomite a siiam Pasian in Pu Eng Tuang thautangpi zong Meng Tawl ngawng vá tusak in a gamlat hangin si zo veve hi. Pu Sian Lian Pau at na-ah Makaipa Pu Za Tual kap hi a, a nuai a bangin la phuak ci hi:

• (a) Hang kisa a sak ciang Teimei, keimah bang hang phuk ing e.
• (b) Kei mah bang hang phuk ing e, gunlui ah mang bang diang e.

Tua hi a Leng Mangpa a kap mi nih hong om ahih manin kitukalh zek hi. Ahi zongin tua hun lai ukpite in Gal le Sa minthang a kap a om ciangin, a kappa lungkimna tawh Ukpite min puasak thei hi. Sa man lo mi khat in tuasa aai in a kappa Zu le Sa tawh vak leh a kap min ngah cih zong a nuai a la dawngin hong siang gen hi.

• (a) A that a thang ta zawm aw e, a aai a thang ta zawm aw.
• (b) A that in zu le sa lawh e, a aai lawi bang thang zaw e.

Meng Tawl kua kap hiam cih thukhen thei ding hilo i hih manin thu le la paizia tawh i khinkhai ding kisam veve hi. Kua kua kap ahi zongin, i gualzawhna, i suahtakna suakpah ahih manin ei a’ in lungdam huai mahmah hi.

Meitei Mangpa a sih ciangin a galkapte lau in nungkik uh a, Tedim galkapte in nung delh pah uh hi. Nawh sa takin a tai nalam uah tunpi kua sikkha sawnsawn in, na deh gawp a, “A thote uh zong hang lua,” ci-in lau sem’sem’ uh hi. Tedim Thukante in Meitei gun sung a khuam kiphutte na botkhia uh ahih manin, gun kantan zolo in galkap 3,000 lak pan 2,000 te tuikia in si hi. Meiteite thauzat (zothau) lawng 226 Tedimte in a ngah ban uhah, Meitei be, Meitei singgah cihte kingah kha pah hi.

Meiteite in a mau lelhte Tedim ci-in theilo uh a, Kam Hau gam, Kam Hau mi ci uh hi. Atate un galsimna thu a dot ciangin dawng selo in Falam zasante (ukvm;atmf) nuaizan-in, “Hih tawh kibang hi,” ci-in a tate kam ah baak uh ci hi. (Hih Meitei galdo vaii pen Tedim kum 2000 thunget khopna laibu pan Dr. Vum Lian Thang atna ka bulphuh ahi hi).

Singlamteh phuh huai

Atung a thute i ngaihsut ciangin Tedim khuapi a suah theihna a bulpi ngaihsun leeng, Suanggsuang pan a kipan hi kici thei hi. Suanggsuang mualvum om kei leh Meitei Mangpa khuadak namun kimu khalo ding a, Pu Eng Tuang in na kap khalo ding hi. Mi pawlkhatte in Suanggsuang a om loh hangin mun khat teeiteei ah Pasian in hong that zosak ding hi aci zong omkha ding hi. Ahi zongin tua mun khat teeiteei pen koi lai hi ding hiam cih ngaihsut haksa mahmah hi. Tu in ahih leh Suanggsuang om a, a sihna mun kitellian’ ahih manin, hih mun mah i thupi ngaihsut kul hi.

Meng Tawl silo hi leh Tedim sim’ dingin Meitei galkapte hong kuan tó ding uh a, galkap a tam banah thau tampi nei-in, namsau, teiipaakte tawh mi tampi hong vatmai ding a, Tedim uk khuaneute nangawn duih (duih = suakta, pengg) tuanlo ding hi. Tua hi leh tuni a i mimal zah lang zong kipha zo nailo ding a, Zomi sung a, i suan i muan, i mipil mihau le Pasian mizatte tam om nailo kha ding hi.

Tua ahih manin Leng Mangpa a sihna mun Suanggsuang pen ei a dingin ci le sa lampan i gualzawhna mun, Pasian in i Taangthu a hoih lam a hong heisakna mun ahih manin phawkna Singlamteh, lungdamkohna Singlamteh lianpi khat phuh ding kisam hi ci-in Pasian mizatte in mukhia uh hi. Tu in ahih leh Singlamteh neu khat kiphut khin zo napi lungkim huai deuh lo hi.

Lai Siangtho sungah Israelte Canaan gam zuanin a pai na uh ah, Jordan gun in khaktan napi Pasian in guntui kikhensak hi (Joshua 4:5-7). Thukham singkuang mai ah Jordan guntuite khentan in, a laizang ah suangtum 12 lasak a, tua suangtumte gun laizangah phutsak hi. Hong tung ding hunte ah na tate un, “Hih suangte bang a cihnop na hiam?” ci-in hong dot leh Topa Thuciamna Singkuang mai ah Jordan tuite kikhen tan hi,” na ci ding uh hi acih mah bangin i suan i paakte in hih Singlamteh bang a cih nopna hiam” ci in hong dot leh “Hih mun ah Pasian in Tedimte le Meiteite hong khentan hi a, gualzawhna lianpi i ngah ciilna mun hi,” i ci ding hi.

Hih thu lungdamkoh ding banah Leng Mangpa le a galkapte ei hangin tampi si uh ahih manin Pasian tungah Mawh pulak ding leh Mawhmai nget ding zong kisam lai hi. Hih gal kidona ei pat ahih loh hangin Pasian in sihna a piangsakte khempeuh mawhsak ahih manin mawhmai nget loh phamawh hi ci-in kiphawk kha hi.

2007 kum TBC-Y Khangnote Karen gam oHawmifBuD; a Nam Bu Baw Thungetna Mualdawn khat ah Thathak lakna nei dingin pai uh a, Salween gun (oHvGifjrpf) leeipi a tun uh ciangin Khami nupi pawl in Thusuak ngah a, Karen mite tungah Zomite in mawhmai nget ding kisam hi ci mawk hi. A phual a tun uh ciangin mawh pulakna leh mawhmai ngetna nei ngeiingaii uh a, lungkim huai mahmah ci hi. Zomite hih ngeiloh khat Zomi bup tangg in a seem suak uh ahih manin lungdam huai takpi hi. A tatak in ci leeng Zomi galkapte in hong uk Kumpite thumangin Insein gal hang takin a do uh hi a, ei a mawh in i kituat kei hi. Ahi ta zongin galte tampi si ahih manin Pasian lungkim lo hih tuak hi.

Khatvei Falam khua huang Ramthlo khua gaal pan, a khuakhung mualsangpi tungah Suangg tawh kibawl Singlamteh lianpi khat kiphut ka muh uh ciangin ka tonpih Syapa khat in, “Singlamteh pen hia dawn khawng a phuh ding hilo a, i sung a phuh ding hizaw hi,” hong ci hi. Kei zong thu nialkhah khat ka hih mah bangin, “Hi mah hi Sya aw, ahi zongin hia Singlamteh i muh ciangin Jesu hong gupkhiatna thu i phawk kha pak a, a zenzen in mu khalo hi leeng kiphawk kha khollo ding hi. Na sungah na puak hangin tu lian’ in phawk kha lo thei ding hi teh,” ka cih leh aimit deh hong bang pah bilbel hi.

Thu khupna

I Thulu ah Suanggsuang om kei leh khawk’ si’n teh i cih ciangin, hun khat lai-in Kam Hau Uksung mi i bei mangg lohna in Suanggsuang a gualzawhna pan hi a ci nuam i hi hi. Hih gualzawhna tungtawn in sep ding thu thum om a, (i) mawh pulakna, (ii) mawh maingetna leh (iii) lungdam kohnate neih ding cih i theih sa ahih mah bangin, mit a muh theih dingin Suanggsuang dawnah Singlamteh lianpi khat i phut ding a, tualai-ah Tedim Tualnam sungpan ma i pan khop ding kilunggulh mahmah hi. Mikhat guak in phut ding ci leeng zong, a phut ding tampi ki-om ding hi. Ahi zongin a taangthu tawh kizui- mi khat bek thupha dingin pammaih lua hi cih Topa mizatte genna tungtawn in kong pulak sawn hi. Pu Khup Lian – Zomi Daily