India ah Zomi omloding ~ J. Thang Lian Pau

India ah Zomi omloding ~ J. Thang Lian Pau

‘India-ah Zomi om lo ding’ cih tawh kisaiin i kikupnate pen thupi ka sa hi. Zomi i itna leh i lapsannopna kilang ka sa mahmah a, lungdamhuai ka sa hi. Hih tawh kisai ken zong kuppihnop kong nei hi.

India-ah Kawlgam zah mahin Zomi om hi. ZRO, Zomi Council leh a dangte India kumpi in thei bek tham loin kihopihpih khin ta hi. Om lo ding cihna Census tawh kisaiin bel Zomi kicih ding pen tu tadih adingin a hun nai kei tam ci ing.

Bang hang hiam cihleh, India paizia pen a tuampi khat ahih man hi. India kumpi in khamtungmite a recognized-na Scheduled Tribe (ST) cih nei hi. Tua nuai-ah ‘Other Backward Class (OBC)’ om lai hi. Mizoram bangah Gorkhali/Nepali tam mahmah mahleh ‘OBC’ dinmun zong ngah zo nailo uh hi. India-ah minam kici tam lua mahmah ahih manin OBC dinmun bek zong ngah haksa cihna hi. Bang hang hiam cihleh, India kumpi in ST hiam OBC hiama a recongnised peuhpeuh pen hamphatna/khualna tawh vuk khin ciat hi. Tua ahih manin India kumpi in minam kici khempeuh recognition a piak ding baihlo hi.

India hong kumpi in hong recognized-na dinga a zat ‘Tribe’ a hih lai taka i nation min ZOMI pen tribe khat va suahsak, cihlam thu tuamin koih ni. Zomi zat ding a lem nai lohna point thum gen phot leng –

• Zomi min tawh tribe recognition ngah masa lo-a Census-ah Zomi i kicih hang khiatna nei lua lo ding hi. Bang hang hiam cihleh, India kumpi in recognition a neilo namte politics-ah development-ah awlmawh thei taktak lo hi. A mihing tamin, kithutuakin, husa nasia tak bawl zo hi leng bel a dan khat om ding hi. Tribe recognition a ngahte politics-ah, sangkahna-ah, kumpi nasep zonna-ah kumpiin quota bawlsak, huhna pia, theisiamna pia cih bang hi. Tua hi keileh mihing tam mahmahna India-ah a general-in phu ding hi leng, kumpi nasep ngah zo, competitive exam phu zo kitawm mahmah ding hi. Tua hi a, tribe recognition ngah masa lo-a Zomi min tawh kalsuan pen baih lo ding hi. Paite min tawh recognition i muhma-in Mizo tribe hihna zanga a paipai thei i hizaw hi.
• Mizoramah hun sawtpi pek, 1980 khawng pan Paite min tawh tribe recognition kigen a, 2003 kumin kingah pan hi. Tun tua zang kei kik leng kum 20 val i buapih pen a mawkna suak ding hi. Mizoramah eimite gammang khin lua mahmah uh a, Paite cih bek thei uh hi. Paite sungah zong kaihkhop ding a haksat lai tak vua Zomi va genpih tohtoh pen kithuap lua mahmah ding hi. Tua banah i vekin i kilomkhawm zong a tam nai het lo ten, census-ah Paite a kici pawl leh Zomi a kici pawlin kikhen leng kitawmsuah mahmah ding hi hang. Nungin, Aizawl Radio Station-ah Radio programme I ngetna-ah mi tawm lua i hihna hangin hong kipia thei nailo cih thu kong pulak ngei zo hi. Paite pen Zomi nuaia tribe khat a hihna i san ciat khit nungsang bang phamawh lua ding hiam a ci hi ing. A mun a mual zuia Paite i kicih hang Zomi i hih lohna omlo hi.
• Census-ah i kidawk pen hamphatna i deihna a hih mah bangin, Zomi min tawh hamphatna taktak i ngahna dingin Zomi min tawh tribe recognition ngen ding hi leng, a phu dingin husa i nei zo tam, bang tan a sawt tam? Ei sung pan Zomi a kici thei nailote hong kihel lo ding bang hileh, Zomi kideidanna a hizaw tam? cihte suut huai hi. Tua hi a, Zomi sunga tribe tuamtuam ten i nation min Zomi hi cih i san ciat khit nungsang Zomi pen legislative power i neihna gam khat i sat khit zawh cianga i zat dingin hawi khinkhian zaw leng i kithutuahna pen hizaw lo ding a hiam cih ngaihsut huai hi. Legislative power i neihna gambeu khat beek i sat khit zawh ciangin Zomi leh Zogam kizuun thei pan ding hi. Gam nei masa loin gam leh minam kizuun thei hileh gam neih manphatna om ding a hiam, cih kei muhna hi.Bang teng hileh Zomi sungah tribe tuamtuam a om ding ngeina hi a, tribe min tawh kalsuanna ding munte-ah tribe min tawh kal a kisuan zongin Zomi hih lohna-in ngaihsun kei ni, kikhilkhopna Zomi buaisakna-in nei kei ni.

J Thang Lian Pau