A manpha Numei te ~ Pau Tun Thang

A manpha Numei te ~ Pau Tun Thang

Numeite pen Pasalte tawh om khawm dinga Pasian bawl ngiat ahi hi. Pasian in mihing a bawl tungin pasal na bawl masa hi. Ahi zongin pasal khatguak bek om ding hoihsa loin akithuahpih ding numei bawlsak hi. Mihing nam nih; numei leh pasal hong om cihna hipah hi. Tua mah bangin Numei leh pasal ii thupitna leh manphatna tuam ciat om hi. Tuhun ciangin numei hi napi a, pasal lungsim apua leh pasal hi napi, numei lungsim pua zong om hi. Tua hi in tukum Nute’ Ni (Mothers’ Day) muakna kawmin numeite manphatzia cih tawh kisai kikumkhawm ding hi hang.

Minam tuamtuamte tangthu (history) kan leeng numei nuaisiahnenniamna tam peuhmah hi. Tua bang dan kipawlna/ innkuan (society)te pen Patriachal Society kici in pasal thuneihna (Male dominated culture) ahi hi. Juda leh Zomite zong hih dan namte lakah i kihelkha hi. Tudong mahin mun tuamtuam ah numei thupi simlohna leh pasalte kiphatsakna om tham hi. A hihtheih leh hih bang dan lungsim pen puak huai nawn lo hi. Numei manphatzia a thei leh zi neih a hun ten zi nei lel uh hi. Pasal zi nei nuam lo ten numei manphatzia a theihloh man bek uh hi.

Pasal te zi dinga hoih pen numei mah hi. Pasal leh pasal kiteeng cih lawm lawm pen nuihzak huai liang sam hi. Suan leh khak tampi nei a leitung a luah dingin Pasian in hong deih hi. Tua Pasian deihna pen numei le numei or pasal le pasal kiteenna pan lawhcing thei ngei lo a, numei leh pasal kikal bek pan lawhcing thei hi.

Tate pattahna ah numei ten mawhpuakna lianpi nei uh hi. Naupang pahtah pen kitangsam mah mah ahih manin nu leh pa pankhawm siam kuul peuh mah hi. A diakin pasalte sangin numeite kitangsam zaw lai uh hi. Pasal te sangin numeite pen tate tawh tam vei kithuah/ omkhawm zaw uh ahih manin taten zong ngaizaw uh hi. Zan lama laihilh, laisiangtho tang simpih etc. te nute mawhpuakna hi phadeuh hi. Paten bel ahih le zi le tate vaakna ding tawh kibuaisak in manlah den pongmawk uh hi. Kei bang khualzin ka tun ciang ka nu na om kei leh nuamsa lo kai ve. Ta ten pate sang nute kisun zaw lai ci hi. Mi lawhcing tampi te kan leeng a nute uh kizeenna hang tam zaw mawk hi. Numeite pen pasal te ading bek hilo in tate adingin zong akisam le amanpha mah mah uh ahi hi.

Inn sung nasepna ah pasal sangin numei kizang thei zaw lai hi. Numei te pen pasalte sangin nasem in kizang thei baihzaw hi. Zomi innkuan sung ngaihsun leeng Pasal ann huan tamlo in, numei ten huan zaw uh hi. Inn sung nasep dangte ah zong pasal sangin numei nasep tamzaw hi. Puansawp, sualnawt, vawk ann piak natawm numei ten sem zaw uh hi. Inn sung khuasakna ah zong numeite pen manpha mah mah mawk uh hi.

Pasal te pen a ciakciak mawk uh hang numei tawh loin nuamsa tuanlo uh hi.I Zomi Paunak ah, ”Pasal ten a teek dong zi deih numei in a teek dong silh leh teen deih” kici hi. Mei gawng khatin Inn suang zo pagawng khat in inn suang zolo a ci pawl bang om liang hi. Nu le pa vai thutheihna (Sex Education) lam a sinte bangin pasal lungdamsak thei pen numei te ci uh hi. Numeite pen pasal te sangin a thupi zawkna khat uh pen numeite bekin naupaai thei se uh hi.

Pasal ten numei te thupi sak khat peuh bawh pah uh hi. Nidang lai in Mizoram ah nungak ten Driver(Motor hawl) te thupi sa uh hi. Tua hun ciangin pasal motor hawl a sin kibehlap pah hi. Tua khit ciangin numei ten Galkap thupi sa kik uh a, tuhun tak ciangin galkap kilut ngeingai leuleu hi. Numei ten indirect in pasalte carreer ding lamlak uh suak hi. Numeite thupisak (value system) pen Pasian nasem te khawng hong hileh deih huai mahmah hi.

Pasal pawlkhat kimawk pasal sak keei pongmawk uh a, tua pen tuhun ciangin kitamzat thei lua nawn lo hi. Bang hang hiam cih leh nidang lai i pu leh pite hun banga thatang zat hun hi nawn loin, tuhun ciang ngaihsutna khuak kizang zaw ta hi. Innkuan sungah zong numei leh pasal akihuhtuak siamte khangto uh hi. Pasal ten numei na cise loin akitangsap hunah numeite huh ding kisam hi. Numei te manphatna a thei siam namte khangto uh a, Numei kinuaisiahna innkuan, pawlpi le kipawlnate (society) peuhmah nam khangto lua om lo hi.

Tua ahih manin, tukum NUTE’ NI ( Mothers’ Day) ni ah Numeite le Nute khempeuh zahtak bawl le thupisakna tawh innkuan, pawlpi le minam khangto asuak thei dingin Pasian in Nute mahmah thupha hong piaksak hen. Nute khempeuh cidam in kum sawt hong damm ciat ta un. N. Pau Tun Thang