Somalia gamsung Truck Bomb puakkhapna hangin asi mi 231 pha, 275 liam

Somalia gamsung Truck Bomb puakkhapna hangin asi mi 231 pha, 275 liam

Somalia gamsung ah Truck Bomb khat puakkham asi pen ki behlap toto hi. Tuciangciang akizakna ah hih Truck Bomb kitapna hangin asi pen mi 231 phakhin a, aliam bekbekzong 275 pha cih Fox News pan kiza hi.

U.S. Government inzong hih Somalia gamsung Bomb ki sukham pen meidawi gamtatna taktak hi ci’n Sunday ni in mawhsakna pulakkhia uhhi.

United States kumpi in Somalia leh African Union tawh migilo terrorism te siansuahding sepkhopna pen hih meidawi gamtatna in hong thakhauhsak semsemzaw hi ci’n U.S. mission to Somalia te’n Statement akhahkhiatna ah genkhia uhhi.

U.S. Military te’n tukumsung in al-Qaida tawh akizom al-Shabab kici migilo tepen alimdopih mahmah laitak ahihi. Hih migilo tepen Somalia gamsung ah om uh a, Somalia khuapi Mogadishu City sungah buaina apiangsakding in akithawi uh ahihi. Tuabangin agitloh gamtatte asiansuah dingin U.S. Military te’n vanleng Drone Strikes leh adang tuamtuam tawh apahpih mahmah laitak ahihi.

International Committee of the Red Cross te genkhiatna ah hih Truck Bomb kitapna hangin Somali Red Crescent Society panin Volunteer asem mi 4 inzong sihlawh cihi.

Tuateng bekthamlo, adangzong asi ki behlap totothei khading hi. Banghanghiam cihleh Volunteer asemte sungpan in amangcip, aki muzonailo tampi omlai hi ci’n Sunday ni in Statement ah Red Cross te’n genkhia uhhi.

Asi tawh, aliam tawh tamlua mahmah ahih manin Mogadishu khuasung aom Hospital te’nzong aliam abaai te akepnading cimawh mahmahliang uhhi.

President Mohamed Abdullahi Mohamed inzong hih Bomb kitapna hangin ni 3 sung dahnahun ci’n tangkokhia hi. Tuaban ah Hospital ah cina aliam te sisan piakding akisam aomleh nahuhciat un ci’n hanthotna zong neikhia hi.

Police Capt. Mohamed Hussein in agenkhiatna ah Hospital paninzong asi tampi omkhin hi ci’n genkhia hi.

Related: Numei khatin Bus tungah bombi sungteen nusia ahih manin Driver pa nuamhetlo

Prime Minister Hassan Ali Khaire in agenkhiatna ah hih migilo te’n Somali mite, nupi, papi, naupang cihte awlmawh hongneilo hi. Mogadishu khuasung ah mi atamtheithei asiding in hanciam in, khuasungmi tampitak hong thahlupsak uhhi ci’n genkhia hi. Sawltak #zomidaily