Utongmei le Numei

Utongmei le Numei

Lingzum tungah mutpuak kia leh mutpuak kitam hi. Mutpuak tungah lingzum kia lezong mutpuak mah kitam hi.

Kawl te’n u tong pen a hoih mahmah a mei hangin sihlawhbaih hi ci uh hi. U tong mei leh numei melhoihna lauhuai hi ci uh hi.

Huntom sungbek i zattheih khangno hun pen kepsiam mahmah ding thupi hi. A diakdiak in numei (nungak) te kidophuai hi. Huntomno sung gualnopna hangin khantawn ki minsiatlawh thei hi.

Tua mindaina pen ki bawlpha kik pak theinawnlo hi. Pasal te a hihkeh numei zah in mi te muhna ah siahuai lo hi. Tua ahihmanin na khangno sungin pasal (na lawmngaih) te cihbangbang zui kei in.

Hongcih bangbang hong makaihna bangbang na zuih hun dingpen na kiten khit uh teh kum tampi sung om hi.

Nungak te in kampauna a siangtho in kemcing masa ding hi. Lungsim ngaihsutna uk zo ding hi. Mi mawk zahtak lo ding hi. Na lawmngaihpa hong heh ding zongh laupah kei in.

Na lawmngaihpa sangin na pumpi it zaw in. Tua hileh na lawmngaihpa in hong zahtak pan ding hi. Tua hileh a ma pumpi deihpakna sangin na pumpi hong it sak zaw ding hi. Siamsin Library