Syria galkapte leh apawlte’n Aleppo nawk cihtak in nawk

Syria galkapte leh apawlte’n Aleppo nawk cihtak in nawk

Dec. 6, 2016: Aleppo khuapi Syria kumpi leh a pawl ten rebelste khut sung panin laksak zo takpi ding hi cih hong kitel pian ciangin nitumna gam ten zan in UN Security Council resolution ah ni sagih sung kikaptuahna khawlsakna ding (truce) thukimna neih ding hi a cih hangun Russia leh China in veto zangin dal uh hi. Syria galkap leh a pawl ten rebelste ukna Aleppo nawk cih takin nipi kal thum nawk ta uh a, seh thum suah seh khat kiim la-in zan in Aleppo nisuahna lam a om Qadi Askar la uh hi.

Syria galkapte tu-in Aleppo-a kulh sang tawh ki-umna khuapi (citadel) panin 800 metres gamla ah om ta uh a, rebelste ukna 60% la khin zo uh hi ci-in Al Jazeera reporter Stefanie Dekker in ci hi. SOHR in zong tu-in Syria galkapte leh a pawl ten al-Shaar kiim umcih zo ta uh hi ci hi. Rebels ten galvan kicing nei nawn lo uh a, al-Shaar a humbit nuam hangun lauhuai mahmah ta a, a humbit nuam teitei uh leh al-Shaar kiim teng tawh a kizopna teng khahsuah ding uh hi ci-in SOHR director Rami Abdel Rahman in ci hi.

Syria galkap leh a pawl ten Aleppo nisuahna lam leh nitumna lam panin rebelste nawk uh hi. Syria galkapte al-Shaar lut ta uh a, zan khuavak in kikapna om a, tu-in zong kikaptuahna nasia lai mahmah hi ci-in Turkey pansan ulian leh Aleppo-a rebel group Fastaqim tawh kizopna nei Zakaria Malahifji in Reuters news agencyte kiangah gen hi.

Rebels pawl dang Aleppo-a om Nour al-Din al-Zinki group kici ten bel Syria galkap ten mun tampi panin hong nawk uh a, al-Shaar ah hong khauh mahmah ding uh a, ahih hangin hong umcih nai lo uh hi ci hi. Jabha Shamiya kici rebelste ulian khat in bel Syria galkap ten al-Shaar kiim teng leh a kizopna kiim teng la ta uh a, Karm al-Jabal leh al-Shaar pen a kikhahsuah bangin kituat ta hi ci-in Reuterte kiangah ci hi.

Russia in zan in UN Security Council resolution truce veto zangin a kidalna pen a beisa bangin ceasefire thukimna kineihpih leh rebels ten kigawmna leh thauvui thautang kaihkhopna dingin hun lem la kik ding uh ahih manin Russia leh US a kiho ding vai siang zaw hi ci hi.

Syria buaina tawh kisai Russia in UN Security Council resolution 2011 panin guk vei leh China in nga vei veto zangin a dalna hi ta a, Security Council members 11 ten bel ceasefire neih ding thukim uh hi. A beisa nipi kal thum a kipanin Aleppo lak kikna dingin kikaptuahna hangin mi 319 (naupang 44 kihel) in sihna tuak ta hi ci-in SOHR in gen hi.

More: Malaysia inn kilamsan khat tungpan Crane kiasuk

Russian Foreign Minister Sergey Lavrov in Russia leh US in [Jabhat] Fateh al-Sham pen ‘terrorist’ organisation ci-in kiciamteh ahih manin Aleppo panin a kihep khiat kei uh terrorist bangin kibawl ding hi ci hi. Source: Al Jazeera News and Agencies / Thang Khan Lian